Oz 8 - Kalate Zambe Nnomo a Mfefe Mfefé Nkôñelan

Ntyi'an ajô baa

¹ Loñe toñ! Amu bidim bia ku si y'Israél yôp ane ndôé, amu bôte y'été be tyameya élate jam, a bene metiñe mam.

² Ba yône be ma be jô'ô na: a Zambe wom, bia yeme wo, bia, ayoñ Israél!

³ Israél a nga bene mvaé: besiñe bé be ntoo ñhe ve tôñe nye!

⁴ Be maneya telé bejô bôt, ma momo été, a telé fe bivet ma momo été. Argent a or wop be maneya bo bie bengunemelan, asu ya jañele bebien.

⁵ Nti a beneya mone nya'a wôé a Samari! Ayaa dam da yôñe be nyô. Ba ye kate bo *mfuban a kui éyoñ évé'

⁶ Amu mone nya'ate a so Israél môte a mé biôm nye a nga mé nye, ve a nji bo zambe; ajô te nde mone nya'a ya Samari a ye bôébane bifus.

⁷ Mbôlô be nga mias évuñulu, ba ye kôan ôkôs; ba ye bo tek'atine fôn; jôme ja faa, ja ye bo te ve avut, a nge avut e nga too, bikuu bia ye mine de.

⁸ Israél a minebaneya e *meyoñ mevo'o été ane jôme môt éziñ a nji kômbô!

⁹ Eyoñe be nga bet Asiri, an'éjakas y'afan ja wulu étam, éyoñe te Efrayim a nga kus émiene bibon.

¹⁰ Akôsa bo biôm bise ba ke ba ve *meyoñ bikule mefe, éyoñ é kuiya na be kôane be. A li'iya ve tyôtyoé, wôna ba ye tôbane njuk, amu adite mbe'e njô bôte y'Asiri a ye titi be bituu.

¹¹ Efrayim a nga lôñ abui meta'a metuna'a, ve meta'a mete me nga saé ve na bone b'Israél be tu'a bi mekua!

¹² Me kusa tili nye toyini memvinda ya metiñe mam, ba yene me ane jôme ja so bikuu.

¹³ Ba nye'e ba ve ma *bityi'a, amu ba kômbô di tit. Ve Nti a nji yene bie mvaé. Me nji vuane mewôé me bôte map, ma simesane bikobe biap. Ba ye bulan Ejipte.

¹⁴ Israél a maneya lôñ émien beta menda, a vuane Nté wé. Yuda fe a maneya lôñ abui bitison e bili alem, ve ma ye futi nduan e bitisone bite, a nduan ja ye mane di'i mbamba menda map.