Oz 6 - Kalate Zambe Nnomo a Mfefe Mfefé Nkôñelan

Ndi nleme bôt be bili mekua

¹ Za'an, mbula'ane be Nti! Amu a maneya nyabe bia, a nye fe a ye saé bia. A bibiya bia, ve a ye tiñeti bia meveñ.

² Mvuse melu mebaé, a ye bulane ve bia ényiñ, e môse lale, a koé na a teléya bia betetele, a bia ye beta nyiñ asu dé.

³ Ajô te ñyemane nye na a ne Zambe, a bi jeñe na bi yeme Nti. Nzuane wé ô ne bebela ane melenda me tyé; a ye zu asu dangan ane mendim, ane mveñ ésep ja ve si mendim.

Ntyi'an ajô

⁴ Ma ye bo wo aya a Efrayim' Ma ye bo wo aya a Yuda' Nye'ane wôé ô ne ane nkute ya mametyé, aval'ane mfô ya mametyé a lôt.

⁵ Ajô te me nga bibi be a bekulu mejô, me nga wôé be a mejô y'anyu dam; a ntyi'ane mejô wom wo so an'éfufup.

⁶ Amu nye'an ñwô ma yene mvaé, saake metuna'a; a ñyemane Zambe ñwô ma top, a dañe mimvean ba di'i ngumba.

⁷ Ve be ba tyam élat ane bôt. Vôme nyô nye be nga kuane ma:

⁸ Galad a ne tisone bewôé bôt. Njalan a minlene metyi.

⁹ Nsamba betuni wo wôé bôt e zene ya Sikem, aval'ane nsamba wo yabe bôt asoé. Beangôndô be mam ba bo mbe le!

¹⁰ E *nda bôt Israél, me yeneya beangôndô be mam; e li a ne ébamba Efrayim, Israél ki a wundiya mvine y'été.

¹¹ Ma kômesane fe nkôane bidi asu dôé a Yuda, éyoñe ma ye tyendé asu'ulane ya bôte bam.