Oz 4 - Kalate Zambe Nnomo a Mfefe Mfefé Nkôñelan

Zambe ba Israél be bili ajô

¹ Vô'ôla'ane nkobô Nti, a mia bone b'Israél! Nti a bili ajô a mia bôt mi too *si nyô, amu bebela na, nye'ane bôte bevok a ñyemane Zambe bi ne momo e si jenan.

² Nkanane mengana, medu'an, mewôé me bôt, wup a *mejian bi ntoo abui abui: nkulane metyi wua wo tôñe wu ôvok.

³ Ajô te si ja yôn. A bôte bese be too été be ne nte'an, nalé fe betite ya fé a anone ya yôp; ja'ana kose ya mañe fe ja ye man.

Betuni ba bo abé

⁴ Sa ve môta môtô nye ba yiane soman nge ve mekua. Ve bia wo bi ne ajô a wo Ntuni nnen, nalé Nti a jô.

⁵ Wo ye kolé ôbak a amôs, mia *nkulu mejô fe mia ye kolé ôbak a alu; ma ye jiane nyua wôé.

⁶ Bôte bam ba ye jañ amu ñyemane momo, amu ô nga bene ñyemane mam; ma ye bene wo a wo ye fe beta bo *ntuni wom; amu ô nga vuane metiñ me Zambe wôé, ma fe ma vuane bone bôé.

⁷ Bese, abime be né, be nga bo ma *abé, ma ye veñesane duma dap e bo ôson.

⁸ Ba nyiñ a *bityi'a, bôte bam ba yiane mekua ba ve, a tindi be na be bo aval'abé be fe ba bo.

⁹ Jam da ye kui be bôt nde fe da ye kui be betuni. Ma ye yaa be amu ntabane wop, ma ye bo na be tôbane nju'u y'abé be nga bo.

¹⁰ Be kusa di abui ba ye bo te jaé; be kusa bo *mejian abui, ba ye bo te biaé *bon. Ya be nga bene ma, ma Nti, asu ya bo ébamba.

Ayoñe bôte Zambe da lumbu e njañ

¹¹ Ebamba a nso'one bilam bia dimili môte fek.

¹² E bôte bam ba sili élé jabe fek, a ntyaé élé wop ñwô wo kate be mam, amu *nsisim ébamba wo yale be fé, a nté ba bo ébamba, nté ôte ñwô ba kôlô be Zambe wop.

¹³ Be bili fulu ya bo mimvean, e mebôbône minkôle yôp, a di'i fe mimvean e bone minkôle yôp, a e bilé mevale mese si, ba dañe nye'e éjijine jap! Ajô te bengo benan ba bo ébamba, a mimbome mienan mia bo *mejian.

¹⁴ Ma ye bo te bo sito'o y'ébamba bengo benan ba bo, nge nyô mejiane mimbome mienan mia bo, amu betuni bebiene fe ba ke avie, ba be binga b'ébamba, a kabane *bityi'a ba be binga ba bo mfufub'ébamba; tame yen ane bôt be n'asuk ba kee bebiene njañ.

Yuda a sa'ale'e mboone Israél

¹⁵ Nge wo, Israél, wo bo ébamba, Yuda a tame nja'a bo te fubu été! Te kean e Gilgal, te betan e Bét Avén, a te kanane ngana na: ane Nti a vee!

¹⁶ Israél a dañeya kañge ane nyak ja ben be futi'i je ébome *tyiñ. Amu jé Nti a yiane ñhe bo be ane bone mintômba ba kee be e vôme beta miñyanebe be né'

¹⁷ Bôte y'Efrayim be maneya ndamane bebien e be bengunemelan: jôka'ane be!

¹⁸ Nné ane ba mane nyu, be nga bum ébamba été. Bivete biap bia dañe nye'e mam me n'ôson.

¹⁹ Evuñulu ja ye kee be, a ba ye wô'ô metuna'a mab ôson.