Oz 2 - Kalate Zambe Nnomo a Mfefe Mfefé Nkôñelan

Beta môse Yizrél

¹ Ve tañe bone b'Israél ja ye bo ane nsele'e ya mañ ñwô be se nguleya vek nge lañe tañ; a ye bo na vôme be nga jô be na: mi nji fe bo bôte bam, ba ye jô be na: mi ne bone be vevea Zambe.

² Eyoñe te Yuda a Israél ba ye beta bo jôme jia, ba ye telé bebien évete jia a vambane si éte, amu môse Yizrél wo ye bo beta *môs.

³ Lo'one bobenyoñe benane na: bôte bam, a bekale benane na: ba ma dañe nye'e!

Israél minga bijabô

⁴ Bo'one nyua wônane mejô, bo'one nye mejô, amu a nji fe bo minga wom, a ma me nji fe bo nye nnôm; a tame vaa mendem m'ébamba me ne ny'asu, a ma *mejian me ne nye mebé.

⁵ Nalé momo wôna ma ye telé nye soé ne ngeññ ane *môs a nga so nyia abum. Ma ye bo nye éfunan ane *nkôte si, éfunan ane si é n'ayet a bo nye na a wô'ô évé.

⁶ Ma ye bo te ko bone bé éngôngo

⁷ amu be ne bone *mejian. Yaa! E nyia wop a boya *mejian. Nyô a nga nyoñ abume dap, a jaléya émien a ôson, éyoñ a mbe a jô'ô na: ma ye tôñe bibone biam, ba ba ve ma bidi a mendim, mevule me ntômba mam a ndombo, mbon a menyu.

⁸ Ajô te ma ye dibe zene jôé a biyo, a dibe je a nka'alé, nalé a ye bo te beta yene mezene mé.

⁹ A ye tôñe bibone bié ve teke koone bie, a ye jeñe bie, ve teke yene bie. A ye jô na: ma zu bulan e be nnôm wom me nga taté bi, amu éyoñe te nje me nga dañe yene mvaé a dañ éyoñe ji.

¹⁰ A nga bo teke yeme na ma me mbe me va'a nye fôn, mfefé woon, mfefé mbon, a me mbe me va'a nye abui argent a or, ve a nga belane bie asu Baal.

¹¹ Ajô te ma ye bulane zu nyoñe fône jam éyoñ ba kôane je, a mfefé woone wom éyoñ ba miate wô. Ma ye wôlé nye mevule me ntômba mam a ndombo jam, mbie bi mbe bi buti'i soé jé.

¹² Eyoñe ji ma zu kulan ôsone vié e mise bibone bié, a teke môt a ye wôlé nye e wo wom.

¹³ Ma ye bo ava'a dé ese na e man, nalé fe mebô'ô mé, meté me ngone mé, besabate bé a e beta bisulane bié bise.

¹⁴ Ma ndamane ndi'i woone wé, a e figié wé, mbie a mbe a jô'ô na: tame yene ma'ane bibone biam bi veya ma. Ma ye bo ndi'i woone te a befigié bete afan, a bia ye bo bidi betite ya fé.

¹⁵ Ma ye bo na a simesane melu bezambe ba loone Bebaal, Mbe a mbe a diki'i bityi'a a jaék bilondo a bivongo biap. A mbe a tôñe bibone bié, ve a mbe a vu'ane ma, nalé Nti a jô.

Môs Elat

¹⁶ Ajô te ma ma ye wone nye a kee nye e *nkôte si, ma ye kobô nleme wé.

¹⁷ E wé nye ma ye bulane nye mefube mindi'i mi woone mé; ma ye bo mbi'ili Akor ô bo nye wu wo ve nye ndi *nlem: éyoñe te a ye yalane, ma ane melu a nga too ésoé ngone minga, aval'ane *môs a nga kôlô Ejipte.

¹⁸ A ye bo *môs ôte na: wo ye loone me na: nnôme wom, nalé Nti a jô; ve wo ye bo te beta loone me na: Masa wom.

¹⁹ Ma ye vaa biyôlé bi Baal anyu dé, a ba ye bo te beta tot éyôlé jap.

²⁰ Môs ôte ma ye bo élat asu bôte bam, ba be betite ya fé, anone ya yôp, a betit ba nyi'itane si; elaé, nkpwaté mekôn a bita, ma ye vaa bie a bia ye bo momo si éte; a ma ye bo na bôt be too été, be ke ôyo teke woñ éziñ.

²¹ Ma ye lu'u wo nnôm éto, wo ye bo minga wom amu *zôsôô, nya ntyi'ane mejôô, nye'an a binyeñge ma ye liti.

²² Ma ye lu'u wo a nye'an ôse, a wo ye yeme ma na me ne Nti.

²³ Môs ôte, nalé Nti a jô, ma ye bo e Zambe a yalane miñyangan: Ma ye yalane jame yôp da yange, a yôp da ye yalane jame si ja yange,

²⁴ a si ja ye yalane jame fôn ja yange, e ne na mfefé woon a mfefé mbon, a biôme bite ki bia ye yalane jame Yizrél a yange.

²⁵ Ma ye bé y'Izréél asu dam e si éte. Ma ye nye'e Bebene, a ma ye jô nyô a ne jôé na: Lô Ami na: ô n'ayoñe bôte dam, a nye ki a ye jô na: ô ne Zambe wom.