Oz 14 - Kalate Zambe Nnomo a Mfefe Mfefé Nkôñelan

¹ Bôte ya Samari ba yiane jibi be'e mam ma tôñ ékobe jap, amu be nga bene njôane Zambe wop: ba ye wu bita, ba ye jiane bone bap a sale bone babe mebum.

Mengaka'a y'ényiñ

² A Israél, bula'an e be Nti Zambe wôé, amu ékobe jôé nje é nga bo na ô ku.

³ Bula'ane be Nti mi jô'ô nye na: wo jamé minkoban! Nyoñ, ékaña'a bia kañe wo *mvo'é!

⁴ Asiri a se nguleya nyii bia! Bia ye bo te beta bet e bikabela mewosane yôp. Bengunemelane bangan be ne ve biôm bi ne mboon a mo; bia ye bo te beta jô be na be ne Zambe wongan. Amu wo étam wo yeme liti monenyui mvaé.

⁵ Nti a jô na: ma ye saé Israél mfa'a bijabô bié. Ma ye bo te tindi mamien, asu ya liti nye nye'ane wom, amu me nji jeñe nye *abé.

⁶ Ma ye bo ane mfô mendim asu Israél, a ye kui sam ane ayañ, a nyiñeli minkañe si été ane bilé ya Libañ.

⁷ Mintyaé mié mia ye mialan, a ye bo abeñ an'ôlivié, a mbamba ényume wé a ye mialan, a ji mefane ya Libañ.

⁸ Embam ba ye bulane zu tabe éjôé jame si. Ba ye bé fôn, a yaé ane ndi'i woon, Ba ye wum ane beta bewoone ya Libañ.

⁹ Mfula'ane *mbé a ngenan e zañ Efrayim a bengunemelan' Ma, ma yalane meye'elane mé, a ma ba'ale nye. Ma me ne aval'ane élé Sipré, élé é ne kom ése ve nyumi. Ma ma ve nye bidi a kôan.

¹⁰ Nge môt éziñ a ne fek, a ye wô'ô mejô m'Ozéé. Nge môt éziñ a yeme yemelan, a ye yem atinane y'été. E ne bebela na Nti a kôme mezen me ne tek'ékotekot. Bebuni be ne wulu été, ve bôte be ne melo ba ye ku été.