Oz 12 - Kalate Zambe Nnomo a Mfefe Mfefé Nkôñelan

Mekua m'Israél aso atata'a

¹ Bôte ya Efrayim ba bômane ma a mboon akut. Nda Israél ki a medu'an. Ve Yuda nye ba Zambe be ngenane nsamba, a ngenan a wulu'u e *zôsôô Zambe a dañ étyi été.

² Efrayim a di évuñulu, a tôñe fe évuñulu ya jôbe da tôô. Môs ôse, a fôlô minsos a éndaman. Ba Asiri ba bo élat. A ba be'e mbon a kee wô Ejipte.

³ Nti ba Yuda fe be bili ajô. A ye tôñesane Yakob aval'ane mboone wé ô né. A ye ya'ane nye, aval'ane mimboone mié mi né.

Mimboone mi Yakob aso atata'a

⁴ A too nyia abum, Yakob a nga bi monyañ étimekili. Eyoñ a ntoo nyamôtô, a nga juane Zambe.

⁵ A nga juane éngele, nye ve dañe nye. Yakob a nga yôn a sili *mvam. A nga tôbane Zambe e Bétél, nde Zambe a nga kobô nye.

⁶ Zambe ya émo ése, nyô ba loone na Nti,

⁷ a nga jô Yakob na: wo yiane bulane be ma me ne Zambe wôé. Bo'o mvaé a semé nya ntyi'ane mejôô. Tabe'e ndi be Zambe wôé melu mese.

⁸ O bili ékotekote kobe mo, ane bekuse kekaa, a Efrayim! A wo nye'e wo du'u bôt.

⁹ Wo kôme jô na: yaa me maneya bik, me biya abui akum. Abé e nji bo na môt a bi minseñge, nalé a nji bo ékop.

¹⁰ Ajô te ñhe ma Nti, e ma me ne Zambe wôé, ataté éyoñ ô mbe Ejipte, ma ye bulane wo ényiñe ya bôt be nji bi ngum étaba'a, aval? an'éyoñ bia wo bi nga tôban.

¹¹ Me nga kobô bekulu mejô, a lôme be mevale miñyenane mise anyu bekulu mejô, me nga ku minkana asu ya liti mam ma ye bo.

¹² Bôte ya Galad be mbe benya beboo mbia be mam. Jôm éziñe ya be be é nji beta li'i. E ata'a metuna'a ya Gilgal, be mbe be va'a *bityi'a beyôm benyak. Ve meta'a metuna'a map me n'éyoñe ji ve mevise *mekok me ne teke mfi.

¹³ Yakob a nga tup a ke mfa'a ya Mézôpôtami, nde a nga saane môte mbok, asu meve'e me minga. Yaa, amu meve'e me minga, nde a nga bo mba'ale mimbame biyem.

¹⁴ Ve Nti a nga belane nkulu mejô asu ya vaa Israél a kôlô Ejipte, nde fe a nga ve nkulu mejô ésaé ya ba'ale ayoñe bôte dé.

¹⁵ Bôte ya Efrayim be nga dañe bo Nti na a wô'ôlun abui. Ve Masa wop a ye wua e mam ma tôñe mbia mimboone miap e be bebien, a ye bo na ébiasé jap é su'ulane zu e be bebien.