Oz 11 - Kalate Zambe Nnomo a Mfefe Mfefé Nkôñelan

Bikala'a b'Israél a nkoon éngôngole Zambe

¹ Eyoñ Israél a mbe mongô, me nga nye'e nye; a me nga loone mone wom a so Ejipte

² ve be nga ke ba be nga loone be ôyap. Be nga ve Bebaal bityi'a a di'i bengunemelan be ne nkpwelan ôtu.

³ Ma me nga ye'ele Efrayim dulu; me bili mo mé; ve be nji yeme na ma me nga saé be.

⁴ Me nga limiti be a minkole y'ényiñe bôt, a bengôkobe ya nye'an. Me mbe mfa'a wop ane nyô a te suu ébôñeté jap, me nga ve be jôme ya di.

⁵ Ba ye bo teke bulane si y'Ejipte, ve mon Asirieñ, éyoñe jé, a ye bo njô bôte wop, amu be nga bene bulane be ma.

⁶ Nkpwaté mekôn wo ye biban e bitisone biap, a jiane mefôla ma bômane be, wo ye mine be, amu asimesan be nga bi.

⁷ Bôte bam be ne beyeñeyeñ mfa'a wom, ba loone be e be nyô a ne yôb été, ve wua y'été teke kôlô si.

⁸ Ma ye bo wo aya a Efrayim' Ye me ne nguleya kuane wo, a Israél' Me ne nguleya bo wo aya ane Adma' Ye ma ye bo wo ô funane Sebôyim' Nleme wom ô ne ntyendan, biôm bise y'abum bia fô'ôsane ma.

⁹ Ma ye bo aval'ane ôlune viam wo yôñ. Ma ye bo te zu jian Efrayim, amu ma me ne Zambe, saake môt. Me ne étyi e zañe jôé, ma ye bo te zu a ayaa.

¹⁰ Ba ye tôñe Nti, Nye a ye bam ane ngbwengbwem, amu a ye bam, a *bon ba ye mate mbi be so'o mañ be fô'ôba'an.

¹¹ Ba ye mate mbi be so'o Ejipte, be fô'ôba'an an'ônon, be so'o fe si y'Asiri, ane zum. A ma ye bo be na be tabe menda map, nalé Nti a jô.