Oz 10 - Kalate Zambe Nnomo a Mfefe Mfefé Nkôñelan

Israél a tôbane minjuk

¹ Israél a mbe ndi'i woon ô n'atek, a wumu bibuma. Ve abime bibuma bié bi nga dañe bo abui, nde nye ki a nga ke ôsu a dañe lôñ abui meta'a metuna'a. Abim ane si jé é nga dañ abeñ, nde nye ki a nga dañe bo mekôn m'azezambe mé abeñ.

² Nleme wop ô ne nkaban: ba ye be'e mekua y'été. Nti a ye bôé meta'a metuna'a map, a tyame mekôn m'azezambe map.

³ Eyoñe ji ba jô na: bi nji fe bi njô bôt, amu bi nji ke ko Nti woñ; a jé njô bôt a ye bo asu dangan'

⁴ Ba tote bifia, be kane mengana me ne teke mfi, a bo fe bilat. Ajô te ntyi'ane mejô wo ye faa ane ébébéa é bili nsu, e minnoñ y'afub été.

⁵ E bôt be too Samari, ba ye ko woñ ajô bone benya'a ya Bét-Avén. Bôt ba ye yône *ngunemelan été. A betuni ba saane je ba ye fô'ôban ajô dé, ajô duma dé nde da kôlô e zañe jap.

⁶ Ba ye fe kee mone nya'ate Asiri a bo mvean ba ve njô bôte Yaréb. Oson via ye bi Efrayim ajô te, a Israél a ye wô'ôsone y'asimesane dé.

⁷ A maneya mfa'a Samari a njô bôte wé, aval'ane avul e mendime yôp.

⁸ Bito ya bikôndô'ô yôp Bét-Avén, vôm Israél a nga bo *abé bia ye tyamban; biyo a ndôé bia ye fa'a e meta'a metuna'a mabe yôp. Ba ye jô minkôle na: buta'ane bia! A bone minkôle na: kpwa'ane bia yôp!

⁹ Ataté melu Gibéa, o nga bo *abé, a Israél! Be ngenane teke tyendé. Ngaa da yiane na bita bi kui e be bewôé bôte bete fo'o ve Gibéa'

¹⁰ Ma ye ve be meleb avale mamiene ma kômbô, a *meyoñ me bôt ma ye sulan a wosane be, éyoñe ba ye ka'a be ngata'a amu be boya abé biyoñ bibaé.

¹¹ Efrayim a n'étoñe ngale nyak be nga ye'ele, a nje ja nye'e é tya'a fôn. V'éyoñ me lôteya a yene mbamba tyiñe wé, nde me nga futi nye ndutane bikalik. Yuda a bo'o ésaé ya senane si, Yakob ki ji ya bôé bibañkelek.

¹² Ve mia, béane mbamba ntaban, éyoñe te mia ye kôane *mvo'é. Liane mfefé afup, amu éyoñ é kuiya be mia na mi kôñelane be ma Nti, akekui me zuya sôé ényiñe be mia.

¹³ Ve mi nga bé *abé, a kôane mewôé me bôt, a di ébuma akute mboon; amu ô nga tabe zene jôé ndi a tañe biwôlô bi bôte jôé.

¹⁴ Beta zô'é a ye bo e bôte bôé été, a bitisone biôé bi ne nlôñan alem bia ye tyamban, avale njô bôte Salman a nga tyame Bét-Arvél e môse bita bi nga boban. A vôm ate nyia *bon a nga fiteban e bone yôp.

¹⁵ Jame Bétél a ye dutu mia nde le, amu *nkpwala wônan ô nembaneya. Melende me tyé, éyoñe mewosan ma taté, a maneya mfa'a njô bôte y'Israél!