Oz 1 - Kalate Zambe Nnomo a Mfefe Mfefé Nkôñelan

¹ Zambe a nga kobô Ozé, e mone Béri, melu Ozias, Yôtam, Akaz a Ezékias, bejô bôte ya Yuda, be nga too, melu fe Yérôbôam e mone Yôaz, njô bôte ya Israél, a nga too.

Zambe a bendé Ozé jame ya bo

² Atata'a nkobô wé, Zambe a nga belan Ozé a jô nye na: kelek a nyoñe womiene minga ébamba a bone *mejian, amu bôte y'Israél ba nyiñ e *mejian été éyoñ ba kandane Zambe.

³ Nde Ozé a nga ke lu'u Gômer, ngone Diblayim, je ve nyoñ abum a biaé nye monafam.

⁴ Zambe nye Ozé na: yôlé'é mon ate jôé na: Yizrél, amu a li'iya ve tyôtyoé wôna ma ye kune metyi me nga kui Yizrél e nlô *nda bôte Yéhu yôp, a ma ye tyame njôane *nda bôt Israél.

⁵ A ye bo *môs ôte na: ma ye bu'u *élaé Israél e mbi'ili Yizrél été.

⁶ Gômer a nga beta nyoñ abum a biaé monaminga. Nde Nti a jô Ozé na: yôlé'é nye jôé na: bebene, amu ma ye bo te beta nye'e *nda bôt Israél, nge jibi be a lôte nné.

⁷ Ve ma ye wô'ô *nda bôte Yuda mintaé; ma ye nyii be, ma Nti, e Zambe wop; ma ye nyii be tek'élaé nge nkpwaté mekôn, nge bita, nge bikabela nge bebebe bikabela.

⁸ Eyoñe Gômer a tyiliya Bebene mebé, nde a beta nyoñ abum a biaé monafam.

⁹ Nti nye Ozé na: yôlé'é mon ate jôé na: Lô-Ami, amu mi nji fe bo bôte bam, a ma ki me nji fe bo Zambe wônan.