NLITAN 5 - Kalate Zambe Nnomo a Mfefe Mfefé Nkôñelan

Kalate a ne mfetan a besitame zamgbwa

¹ A me nga yene kalate, ntilan été a atan, mfetan a besitame zamgbwa e mbo nnôme Nyô a too éto njôan.

² A me nga yene ngungule éngele, ô mbe ô kobô'ô tyiñe yôp ô jô'ô na: Za a yiane kui kalate, nge vaa besitam y'été'

³ Ve teke môt e yôp été, e si nge si été, a mbe ngule ya yooé kalate, nge wua mis été.

⁴ Me mbe me yônôk abui amu teke môt a nga yené na a ne ngule ya yooé kalate nge wua mis été.

⁵ Ve wua ya bemvendé a nga jô me na: Te yôn! Tame yen, ngbwengbweme ya ayoñe Yuda, éfa'alé David a dañeya, a ye yooé kalate a besitame zamgbwale bé.

⁶ Ane me nga yene Mone Ntômba a tele ézezañ éto njôan a betit benyiin, e zañe bemvendé, a funa'ane nyô a ne ñwôéban. A nga bili minla'a zamgbwa a mise zamgbwa me ne minsisim mi Zambe zamgbwa *nlôman e si ése.

⁷ A nga subu ôsu na a nyoñe kalate e wo ya mbo nnôm nyô a too éto njôan.

⁸ A éyoñ a nga nyoñe kalate, betit benyiin a bemvendé mewôm mebaé a benyiin be nga kumbu e si asu Mone Ntômba. Môt ase a nga bili mvet a bilaé bi or njalan a ôlobinda, mbie bi ne meye'elane mimfufup.

⁹ Be nga bo be yi'a mfefé jia na: Wo wo yiane nyoñe kalate ate a tyame besitam ya été, amu ô nga wôéban, a ô nga kôté asu Zambe, ba ya meyoñe mese, *minkobô mise, bôte bese a mesi mese, a metyi môé.

¹⁰ A ô nga bo be ngum éjôé a betuni mfa'a Zambe wongan, a ba ye jô'ô e *si nyô.

¹¹ A me nga yen a wô'ô *tyiñ abui beéngele mbôma'an éto njôan, betit a bemvendé. E tañe jap é mbe beakutu beakutu, betoyini betoyini.

¹² Be mbe be yôta'ane tyiñe yôb na: mone ntômba a nga wôéban a yiane nyoñe ngu, akum, fek, éwôlô, duma, étôtok a ékaña'a.

¹³ A me nga wô'ô ntéan jôm ôse ya yôp a si a e si été, a e mañ, e biôme bise bi vee été, bi jô'ô na: ékaña'a, duma, étôtok a ngu bi bo'o e be nyô a too éto njôane a e be Mone Ntômba nnôm éto a nnôm éto.

¹⁴ A bevevee be biôme benyin be mbe be jô'ô na: Amen! A bemvendé be nga kumba si *a kañ.