NLITAN 4 - Kalate Zambe Nnomo a Mfefe Mfefé Nkôñelan

Eto njôane Zambe a biôme ya yôp

¹ Eyoñe mam mete me lôteya, me nga yene *mbé ô yoo yôp, a *tyiñ ôsu me nga taté wôk é kobô'ô ma é funa'ane nyô toñ, é nga jô me na: Betek e va, a ma ye liti wo e jam da yiane tôñe valé.

² Eté été, Nsisim a nga bi ma. A ô lôô, éto njôan é nga tele yôp, a môt éziñ a too je yôp.

³ Nyô a nga too éto njôane yôp a mbe a funa'an ako'o ba loone Yaspe a di ba loone Sardôan. Etôtok é mbe é bôma'an éto njôan a minkôkô mi émerôd.

⁴ Bito mewôm mebaé a binyin bi mbe bi bôma'an éto njôane ji, bemvendé mewôm mebaé a benyin be mbe be too bito mewôm mebaé a binyin, be be'e bifumulu mengômesan, bikate bi or bi too be minlô.

⁵ Befeleves, metyiñ a zo'oyañ bi mbe bi so'ok éto njôane te. Beta belambe zamgbwa be mbe be yôñôk éto njôan. Belambe bete be ne minsisim mi Zambe zamgbwa.

⁶ Ôsu éto njôan, jôm é too ane mañ m'évet é funa'ane kristal. Betite benyiin, njalan a mis ôsu a mvus, be tele ézezañ éto njôan, be bôma'ane je.

⁷ E tit ôsu é funa'ane ngbwengbwem, e nyô baa é funa'an étoñe nnôme nyak, e nyô lale, é funa'an asu môt, e nyô nyini é funa'an aval ane ndôé ja yele.

⁸ Betite bete benyiin be nga bili, tit ése, mefap mesaman njalan a mis mbôma'an été a atan. Be ne te jô'é jô *môs baa alu na: Etyi, étyi, étyi, Nti, Zambe a ne ngul ése, nyô a nga too, nyô a too, a nyô a zu.

⁹ A, éyoñ ése betit be nga ve étôtok, duma a akéva e be Nyô a too éto njôan a a vee nnôm éto a nnôm éto,

¹⁰ bemvendé mewômebaé a benyiin be nga kumbu si asu nyô a too éto njôan, be nga kañe Nyô a vee nnôm éto a nnôm éto, be wu'a bikate biap asu éto njôan, be jô'ô na:

¹¹ wo wo yiane nyoñe duma, étôtok a ngu, a Nti e Zambe wongan, amu wo ô nga té biôme bise; ô nga kômbô na bi boban, ane bi nga téban.