NLITAN 3 - Kalate Zambe Nnomo a Mfefe Mfefé Nkôñelan

E be keké ya Sardés

¹ Tili'i éngele a nee keké Sardés na: Avale di nde nyô a bili minsisime mi Zambe zamgbwa a ateté zamgbwa a jô na: Ma yeme mimboone miôé: wo wume na ô vee, ve ô ne ñwuan!

² Mombô'ô! Yemete'e *mebuka'a me ntoo bebé ya wu, amu me nji yene mimboone mi mam miôé njalane *mvo'é e mise me Zambe wom.

³ A jô te simesa'ane jam ô nga nyoñ a wôk. Ba'ale'e de *a kôñelane nlem! Nge wo bo te mombô, ma ye zu ane ñwuwup, wo teke yem awolo ma ye zu e be wo atemetem.

⁴ Akôsa bo nalé ô bili bôt b'éziñ e Sardés valé mbe be nji ve mengômesane mabe mvin. Ba ye li'itane ma, be be'e ndombo amu ba yiane je.

⁵ Nalé ate e nyô a dañ, a ye jaé e mengômesan ma fum. Ma ye bo te tyame jôé dé e kalate ényiñ, a ma ye yalan ajô dé asu ésaa wom a asu beéngele bé.

⁶ E môt a bili melo, a wô'ô mam e Nsisim a jô bekeké.

E be keké Filadélfi

⁷ Tili'i éngele a nee keké Filadélfi na: Avale di nde Mfufup wo kobô, e nyô a ne Nyaa, e nyô a bili édiba'a David; e nyô a diin, a teke môt a ye dip, nge dip a teke môt a ne diin:

⁸ ma yeme mimboone miôé. Tame yen me teléya *mbé ôsu viôé, ô yoo, a ñwô teke môt a ne dip. O bili ôyôme ngu, ve akôsa bo nalé ô nga ba'ale ajô dam a teke kate jôé dam.

⁹ Tame yen ma ve wo bôte ya aba Satan. E ba ba jô na be ne beyude a be nji bo be, amu ba laa minsos. Ma ye bo be na be zu kute meboñe si a ésemé e mebo môé e si, a ba ye yeme na me nga nye'e wo.

¹⁰ Amu ô nga ba'ale ajô dam a mban ôse, ma fe ma ye ba'ale wo awolo *meve'ele da ye zu e be bôte binam bese, a ve'ele ba bese be too si.

¹¹ Me mbeme zu, tuka'a bi e jôm ô bili, môt a za nyoñe wo ékate jôé'

¹² Nyô a dañ, ma ye bo nye akône ya *nda Zambe wom, a ye bo te beta kôlô été. A ma ye tili e jôé Zambe wom e be nye, nalé fe jôé tisone Zambe wom, mfefé Yérusalém, nye a sis a so'o yôbe be Zambe wom, a mfefé jôé wom.

¹³ Nyô a be'e melo, a wô'ô jam Nsisim a jô be keké.

E be keké Laôdisé

¹⁴ Tili'i éngele a nee keké Laôdisé na: Avale di nde Amen a jô, nya ngaa, a nyô a ne bebela, tine ntéane biôme Zambe:

¹⁵ ma yeme mimboone miôé na. O nji bo avoé, nge ayôñe da kundi. Bo'o avoé, nge ayôñ da kundi.

¹⁶ V'amu ô ne ntôton, teke avoé, nge ayôñ, ma ye yô wo anyu dam.

¹⁷ Amu wo jô na: Me ne kum, me maneya bik, me nji fe yi jôm. Ve ô ne te yeme na, ô ne bua, éngôngo, azoé, ndim, a soé.

¹⁸ Ma lebe wo na ô kuse or a ne ntumane nduan e be ma, ô bo kum, nalé fe mengômesan me ne éfumulu ô jaé, nde ôsone ya soé jôé wo ye bo te yené; ô kuse fe mbone ya wo'o e mise môé ô yen.

¹⁹ E ba bese ma nye'e mbe ma komekane be *a lep. Ajô te va'a ngu, *a kôñelane nlem!

²⁰ O lôô me tele *mbé si a ma kut. Nge môt éziñ a wô'ô tyiñe jam a diine ma *mbé, ma ye nyiine be nye a di be nye a nye be ma.

²¹ Nyô a dañ, ma ye ve nye na bi tabe éto njôane jam, aval ane ma fe me nga dañ, a ke tabe bia Esaa wom éto njôane jé.

²² E môt a be'e melo, a wô'ô mam Nsisim a jô bekeké.