NLITAN 22 - Kalate Zambe Nnomo a Mfefe Mfefé Nkôñelan

¹ Ane a nga liti ma ôsôé bevevee mendim, me ngemba'an ane kristal, ô vamek éto njôan Zambe a Mone Ntômba.

² Ezezañe tison a e mefase me beta ôsôé mebaé, élé ényiñ é tele, é wumu bibuma biyoñ awôm a mibaé e mbu, éyoñe jia ngon ése, ja ve bibuma bié, a mekaé mé asu ya yete *meyoñ.

³ Biyo'é bia ye bo te beta bo. Eto njôane Zambe a Mone Ntômba, ja ye bo e tison été, a bebo bisaé bé ba ye kañe nye.

⁴ Ba ye yen asu dé, a jôé dé da ye bo ntilan e mvome mesu jap.

⁵ Alu daa ye fe bo, teke môt a ye yi éfufube lambe, nge ji jôp, amu Nti, Zambe, a ye lôm éfufube jé e be be. A ba ye jôô nnôm éto a nnôm éto.

Melebe ma su'ulan

⁶ Ane a nga jô me na: Mejô ma me ne été, a bebela; Nti, e Zambe minsisim bekulu mejô, a lômeya éngele wé a liti bebo bisaé bé e mam ma yiane boban ana'ana.

⁷ Ô lôô ma zu ana'ana. Ebotan a môt a ba'ale mejô me nkulane mejô ya e kalate nyô.

⁸ Ma Yôanes, me nga wôk, a me nga yene de. A éyoñ me maneya wôk a yen, me nga kute meboñe si a kañe nye e mebo me éngele a nga liti ma mam mete, asu ya kañe nye.

⁹ Ve a nga jô me na, tabe'e ntyele ya bo nalé! Me ne ébe mboésaé mfa'a wôé a bobenyoñe bekulu mejô, a e mfa'a ba ba ba'ale mejô ya kalate nyô, Zambe e nye wo yiane kañ.

¹⁰ Ane a nga jô me na, te ba'ale mejô me nkulane mejô ya kalate nyô nsolan. Amu éyoñ é nto bebé.

¹¹ E nyô a ne ékotekot, a kele ôsu a bo ékotekot, a nyô a ne mvin a kele ôsu a nyiñe je été. Ve *zôsôô môt a beta'a bo *zôsôô, a e nyô a ne étyi, a kele ôsu a telé émien étyi.

¹² Ô lôô ma zu ana'ana, a me bili ma'ane mam asu ya ya'ane môt ase aval ane mboone wé ô né.

¹³ Me ne Alfa a Oméga, Nyô ôsu a Nyô a su'ulan. Atata'a, a susu'a.

¹⁴ Ebotan a ba ba sôbe melô'ô map, ane be ne bi nguleya di élé ényiñ, a nyiin, e tison été be lôtôk e mimbé.

¹⁵ Ve atan, a ne bemvu a bebo majik bebo mam bisôk bewôé bôt, bekañe bezambe befe, a môt ase *a nye'e minsos nge laa mie.

¹⁶ Ma Yésus, me lômeya éngele wom na a zuu mia nkañete wu ajô bekeké. Me ne nkañ a mvoñe David, ôteté wo faé mametyé!

¹⁷ Nsisim a mbom ba jô na: Za'ak! E môt a wôk, a jô'ô na: Za'ak! E môt a wô évé a za'ak, e môt a kômbô, a nyoñe bevevee mendim e zesé.

¹⁸ Ma kate môt ase a wô'ô mejô nkulane mejô ya kalate nyô na: Nge môt éziñ a kô'ôlane jôm été, Zambe a ye kô'ôlane nye bibubua bi ne ntilane kalate nyô été.

¹⁹ A nge môt éziñ a vaa jôm e mejô me kalate nkulane mejô nyô, Zambe a ye vaa ngabe jé élé ényiñ a e mfufube tison bi ne ntilane kalate nyô été.

²⁰ E nyô a yemete mame ma, a jô na: Yaa, ma zu ana'ana. Amen. Za'ak a Nti Yésus.

²¹ E *mvam e Nti Yésus é tabe'e e be be bese!