NLITAN 21 - Kalate Zambe Nnomo a Mfefe Mfefé Nkôñelan

Mfefé yôp a Mfefé si

¹ A me nga yene mfefé yôp a mfefé si, amu e yôb ôsu a e si ôsu bi ntoo momo. A mañ me nji fe bo.

² A e mfufube tison, mfefé Yérusalém, me nga yene wô, ô sise si, ô so'o yôbe be Zambe, aval ane mbom ô maneya kômesan amu nnôme wé.

³ A me nga wô'ô *tyiñ é so'o éto njôan, é jô'ô na: Mi lôô étaba'a Zambe é ntoo e be bôt. A ye tabe baa be be. Ba ye bo e bôte bé, a nye a ye bo e Zambe baa be be be too.

⁴ A ye fimi mili'i mese e mise map, awu daa ye fe bo. Ôlun, nge ñyôn, nge mintaé, biaa ye fe bo. Amu mam ya ôsu me lôteya.

⁵ A nyô a too éto njôane yôp a nga jô na: Ô lôô, ma bo mam mese mimfefé. Wôna a nga jô me na: Tili'i: mejô ma me ne été, a bebela.

⁶ A a nga jô me na: E bobaneya nalé. Me ne Alfa a Oméga, atata'a a susu'a. E môt a wô? évé, ma ye ve nye a nyu anjeñe bevevee mendim e zesé.

⁷ E nyô a ye dañ, a ye nyoñe biôme bite ane *ngab élik. A ma ye bo e Zambe wé, a nye a ye bo e mone wom.

⁸ Ve mfa'a miñwôwoñ, a ba be nji bo ba ya tabe be ndi, a mbia be bôt, a bewôé bôt, a be te wô'ô mam bisôk ôson, a mimvimvi'i, a bebo majik, a bekañe bezambe befe, a belaa minsos bese, e ngabe jap é ne ato'o da yôñe nduan a sufre. Awu baa ñhe le.

Mfefé Yérusalém

⁹ Wôna, wua ya beéngele zamgbwa be nga bili bisua zamgbwa njalan a bibubua zamgbwale bia su'ulan, a nga zu kobô ma, a jô me na: Za'ak, ma ye liti wo mbom, nga Mone Ntômba.

¹⁰ Ane a nga kee ma e *nsisim été, e beta ôzomezome nkô, a a nga liti ma mfufube tison, Yérusalém, ô so'o yôbe be Zambe.

¹¹ Etôto'o jé é nga faé aval ane ji Zambe ébien. Mfaane wé, ô bo'o na bi simesan édima ako'o éziñ, aval ane ayet ako'o da faé abui ba loone yaspe.

¹² O nga bili mimfin mi ne afip a ôyabe yôp. O nga bili mimbé awôm a mibaé, a e mimbé mite, beéngele awôm a bebaé a môé ntilan: môé *meyoñ awôm a mebaé me bone be Israél.

¹³ E jôbe da tôô mimbé milaa, akôé mimbé milaa, e nké mimbé milaa, e jôbe da dim mimbé milaa.

¹⁴ Mimfine ya tison mi nga bili brik nlôñan minnoñ awôm a mibaé. A e minnoñ mite yôp ntilane môé minlôman mi Mone Ntômba awôm a mibaé.

¹⁵ E môt a mbe a kobô'ô ma, a nga bili ôvek, ndene or, nje a ve'e je tison, mimbé mié a mimfine mié.

¹⁶ Tison é mbe meku'u mese nté wua. Nté a ndam abime da. A nga ve'e je a nden. Nté, tañe méta toyini awôm a ébaé. Nté, ndam, a mbetane yôp nté wua.

¹⁷ A nga ve'e mimfin, mi mbe menyi'i me mo ntet a mewôm menyin a menyiin, ôve'e môt ñwô éngele a nga belane wô.

¹⁸ E biôme melôñ be nga belane bie mimfin bi mbe yaspe. A tison é nga too nya or a funa'ane nya kristal.

¹⁹ Minnoñe mimfine ya tison mi mbe mboone nyanga a meko'o me ne édima mevale mese. Nnoñ ôsu ô mbe yaspe, e wu baa safir, e wu lale kalsédôan, e wu nyiini émerôd,

²⁰ e wu tane sardôan, e wu samane kornadine, e wu zamgbwale kirzôlite, e wu muame béril, e wu ébulu tôpaz, e wu awômô krisôpraz, e wu awômô a da, hiaséñte, e wu awôm a baa, Amétiste.

²¹ Mimbé awôm a mibaé mi mbe señ é ne édima awôm a ébaé. Mbé ôse ô mbe señ é ne édima jia. A nseñe ya tison été ô mbe nya or ane abeñe kristal.

²² Ve me nji yene *nda Zambe e tison été, amu Nti, e Zambe a ne ngul ése, a Mone Ntômba e mbe be ne *nda Zambe jé.

²³ Tison été é nji yi jôp, nge ngone na, é bi éfufup, amu étôto'o Zambe ja faé je, a lambe ya été a ne Mone Ntômba.

²⁴ Meyoñ ma ye wulu a éfufup jé, a bejô bôte ya si ba ye zuu étôto'o jap été.

²⁵ Mimbé mié mia ye bo te diban *môs ane *môs, amu alu daa ye fe bo vôm ate.

²⁶ Ba ye zuu étôtok a duma ya *meyoñ été.

²⁷ Teke mvit éziñ ja ye nyiin été, nge môt a bo mbia be mam a laane minsos, ve ba étam môé map me ne ntilan e kalate ényiñe Mone Ntômba.