NLITAN 20 - Kalate Zambe Nnomo a Mfefe Mfefé Nkôñelan

Ejôé tañe toyini mimbu

¹ A me nga yen éngele a sisik, a so'o e yôp. A nga bili édiba'a ya beta yee, a beta adite ngôkop.

² Ane a nga bi dragoñ, nnôme nyo, nye a ne Debele a Satan, a ka'a nye ngôkop tañe mimbu toyini.

³ Ane a nga wua nye e beta yee, a dibe nye, a fete na, a bo te beta du'u *meyoñ akekui mimbu toyini mia nkpwaan. Mvus éte, a ye beta suubane nté éziñ.

⁴ A me nga yene bito bi njôan. Nguleya tyi'i mejô é nga veban e be bôt be nga zu tabe bie yôp. Me nga yene fe minsisime ya ba be nga wôéban amu nkañetan Yésus a ajô Zambe, a e ba be nga bo te kañe tit, nge éve'ela jé, a bo te nyoñe ndem e mvome mesu nge wo. Be nga wômô, a jôô baa be Krist tañe mimbu toyini.

⁵ Miñwuane mivok mi nji wômô nté mimbu toyini mi ngenan te nkpwaan. Ñwôman miñwuane ya ôsu ñwô ñhe le.

⁶ Ebotan a étyi, bi ne e be ba be ne benyoñe ngabe ya ñwômane miñwuan ôsu. Awu baa e nji bi ngu e be be. Ba ye bo betuni be Zambe a Krist, a jôô, baa be nye tañe mimbu toyini.

Ndañan wo su'ulan a ntyi'ane mejô

⁷ Eyoñe mimbu toyini mia ye jaléban, Satan a ye kui mimbô'ô mié.

⁸ A a ye ke wone *meyoñ me ne e meku'u menyiine ya si, Gôg a Magôg. A ye sulane me amu mewosan: e tañe jap é ne ane nsele'e ya mañ.

⁹ Be nga yandan ngume si ôse, a nyoñe minkane mimfufup a e tison ba dañe nye'e. Ve nduan é nga so yôp a di'i be.

¹⁰ A Satan, ñwone wop, a nga wuaban ébé nduan a sufre, e fefele tit a *nkulu mejô minsos. A ba ye wô'ô mintaé mi édeñela'a *môs baa alu nnôm éto a nnôm éto.

¹¹ Ane me nga yene beta éfumulu éto njôan, a e nyô a nga too je e yôp: ôsu vié, yôp a si bi nga tup, teke li'i awoé.

¹² A me nga yene miñwuan, beta a bone miñwuan, be tele asu éto njôan, a bekalate be nga kuiban. Kalate mfe a nga kuiban, kalate ényiñ, a miñwuan mi nga tyi'ibane mejô aval ane mimboone mi mame miap mi né, avale e mbe ntilane bekalate.

¹³ Mañ me nga kuli miñwuan mié. Awu a vôme miñwuan mi né be nga bulan miñwuane miap, a môt ase a nga tyi'ibane mejô aval ane mimboone mié mi né.

¹⁴ Ane awu a vôme miñwuan mi né be nga wuaban ato'o nduan été. Ato'o nduan, awu baa ñhe le.

¹⁵ A e môt ase jôé dé e nga bo te yené ntilan e kalate ényiñ a nga wuaban ato'o nduan.