NLITAN 19 - Kalate Zambe Nnomo a Mfefe Mfefé Nkôñelan

Alu'u Mone Ntômba

¹ Wôna, e mvus éte, me nga wô'ô aval ane beta zô'é ya beta nsamba bôt e yôp été, a jô'ô na: Alléluia! Nyian, étôtok a ngu, bi ne e be Zambe wongan.

² Amu mintyi'ane mejô mié mi ne njalan a bebela a *zôsôô. A tyi'iya beta minga a ébamba jé ajô. A kuneya metyi bebo bisaé bé e be nye.

³ Be nga ba'alane jô na: Alléluia! A ôtita vié wo bete yôp nnôm éto a nnôm éto.

⁴ Bemvendé mewôm mebaé a benyiin a betite benyiin be nga kumbu si a kañe Zambe a too éto njôan be jô'ô na: Amen. Alléluia!

⁵ Ane *tyiñ é nga so éto njôan é jô'ô na: Kañane Zambe wongan, mia bebo bisaé béé, mia mia ko nye woñ, ayôme bôt a beta be bôt!

⁶ A me nga wô'ô zô'é, aval ane nyô beta nsamba bôt, avale fe ane nyô beta be mañ, aval a ne mvame mingungule bezo'oyañ é jô'ô na: Alléluia! Amu Nti, Zambe wongan a ne Ngulése a litiya éjôé jé.

⁷ E mva'an a fôn a ve nye duma, amu éli'iti mone ntômba é soya. Mbome wé ô maneya kômesan.

⁸ E nga vebane be nye na a jaé éfumulu éyé ja ngemban é too mfuban amu ndombo é ne bezôsôô mimboone mimfufup.

⁹ Engele éziñ a nga jô me na: Tili'i na: Ebotan a ba be ne nloon e beta ndiane ya éli'iti Mone Ntômba! Wôna a nga jô me na: A ne nkobô Zambe ôbien.

¹⁰ Ane me nga kumbu e mebo mé si na me kañe nye. Ve a nga jô me na tabe'e ntyele ya bo jame te. Me ne ébe mbo ésaé mfa'a wôé a mfa'a bobenyoñ ba ba'ale nkañete Yésus. Zambe nye wo yiane kañ, amu nkañete Yésus ô ne nsisime nkulane mejô.

Ndañane Mesi

¹¹ Ane me nga yene yôp e yoo. E teme na éfumulu ékabela, e môt a bete je yôp a ne jôé na: Etabendi a Bebela. A tyi'i mejô a wosan e *zôsôô été.

¹² E mise mé me ne ayôñ ane nkaba'a nduan. E nlô wé abui biyañese bi duma, a jôé éziñ é too ntilan e nyôle jé, nye étam a yeme de.

¹³ A be'e alô'ô e too ndubane metyi, jôé dé na: Ajô Zambe.

¹⁴ Minsamba mewosane ya yôp mi nga tôñe nye, mi bete e bifumulu bikabela yôp, bi be'e éfumulu éyé, é too *mfuban.

¹⁵ Nkpwaté mekoñ ô too akap ô nga kui anyu dé asu ya bibi *meyoñ a wô. A a ye kee me vôme ya di a nkasa étyé. A ye tibi fandé woon ayaa Zambe a ne ngul ése a kundi,

¹⁶ alô'ô dé e yôp, a abo dé, a be'e jôé ntilane na: Njôô ya bejôô a Nti ya beti.

¹⁷ A me nga yen éngele a tele e jôp. A nga yôtan anon ese da yele ézezañe a beta tyiñe na: Za'an a sula'ane asu beta ndiane Zambe,

¹⁸ mi di minsône bejô bôt, minsoñe bivet, minsône biwôlô bi bôt, e mi bikabela a e mi mi ba be bete bie yôp, minsône mi bôte bese, beti a belo, ayôme bôt a beta be bôt.

¹⁹ A me nga yene tit, bejô bôte ya *si nyô a minsamba mewosane miap, nsulan asu ya wosane nyô a wulu ékabela a nsamba mewosane wé.

²⁰ Tit é nga bili baa *nkulu mejô a ne minsos, nye a nga du'u bôt be nga nyoñe ndem tit, *a kañ éve'ela jé, éyoñ a nga bo mesimba ôsu vié. Bese bebaa be nga wuaban vevee ato'o nduan da yôñ a sufre.

²¹ E ba bevok be nga wu a nkpwaté mekôn ô nga kui anyu mbebe ékabela. Ane anon ese e nga di minsône miap a jaé.