NLITAN 15 - Kalate Zambe Nnomo a Mfefe Mfefé Nkôñelan

¹ A me nga yene ndeme fe e yôb été, é too anen a jame ya semé. Beéngele zamgbwa be bili bibubua zamgbwa, e bi bia su'ulan amu ayaa Zambe da tôébane be be.

² A me nga yene jôm é funa'ane mañ me ako'o e ne édima, fufulu a nduan. Bedañe be tit a éve'ela jé a ékanga tañe ya jôé dé, be nga tele e mañe me ako'o e ne édima, be bili memvete me Zambe.

³ Be nga bo be yi'a jia Môze, e mbo ésaé Zambe a e jia mone ntômba na: Mimboone miôé mi ne anen a jôme ya nye'e wo yen, a Nti Zambe a ne ngul ése. Mezene môé me ne *zôsôô a bebela a njôô *meyoñ.

⁴ Za a ye bo te ko woñ, a wumu jôé dôé, a Nti' Amu wo étam ô ne mfufup. Meyoñe mese ma ye zu, a kumbu si asu dôé, amu mintyi'ane mejô miôé mi maneya yené.

⁵ A me nga yene *nda Zambe é bili vôm a n'étyi asu nkobane mejô me Zambe, é yombô'ô e yôb été.

⁶ A beéngele zamgbwa, be bili bibubua zamgbwa be kui e *nda Zambe, be nga be'e mfubane ndombo wo faé, angeteñ ñyemetan a bekandé be or.

⁷ Jia ya betite benyiin é nga ve beéngele zamgbwa bisua bi or zamgbwa, njalan a ayaa Zambe a vee nnôm éto.

⁸ A *nda Zambe é nga jaé ne lut, a ôtita amu étôto'o Zambe a éwôlô jé. A teke môt a mbe ngule ya nyiine *nda Zambe été, akekui bibubua zamgbwale beéngele zamgbwa bi bobaneya.