NLITAN 14 - Kalate Zambe Nnomo a Mfefe Mfefé Nkôñelan

Mone Ntômba a émbéé a nga kôté

¹ Ane me nga yen: ô lôô mone ntômba a tele tetele nkôle Siôn, ba be bôt toyini ntet a mewôm menyin a benyiin be be'e jôé dé a e di Esaa, ntilane mesu map.

² A me nga wô'ô *tyiñ é so'o yôp ane éduñe mañ, aval ane *mvam ngul éduñe zo'oyañ, a *tyiñ me nga wôk é nga too ane jia bebôme mvet ba nnambe bibômebômé biap.

³ Be mbe be yi'a mfefé jia asu éto njôan, ôsu betite benyiin a bemvendé. A teke môt a mbe ngule ya yé'é jia te, vengevenge ve bôt toyini ntet a mewôm menyin a benyiin, e ba be nga kôtébane si.

⁴ Be nji vebane mvin a binga, amu be ne bindun. Ba tôñe Mone Ntômba e vôm ase a ke. Be nga kôtéban ézezañe bôt aval ane *bembômô mfa'a Zambe a mfa'a Mone Ntômba.

⁵ A minsos mi nji yené e menyu mab été, be ne teke bijô.

Foé ntyi'ane mejô

⁶ A me nga yen éngele mfe a yele'e ézezañe yôp. A nga bili *mbamba Foé ya nnôm éto a yiane kate bôt be too e si: njôan ôse, ayoñ ese, nkobô a bôte bese.

⁷ A nga bo a kobô'ô a ngule *tyiñ na: Koone Zambe woñ a ve nye duma, amu awolo ntyi'ane mejô wé e kpwaneya. Kañane nté yôp a si, mañ a menjeñe mendim.

⁸ Wôna, éngele mfe nyô baa a nga tôñe nye a jô na: A kuya, a kuya, beta Babilôn, nyô a nga nyuu *meyoñ mese woone ya ayaa ébamba déé.

⁹ A e mfe, éngele lale, a nga tôñe be a jô a tyiñe ngule na: Nge môt éziñ a kañe tit a éve'ela jé, nge nyoñe ndem asu dé nge wo wé,

¹⁰ nye fe a ye nyu woone ya ayaa Zambe, nsôan teke mbundan, *élaé ya ayaa dé, a a ye tôban minjuk e nduan a e sufre été, asu mimfufube beéngele, a di Mone Ntômba.

¹¹ Otita ya minju'u miap wo bet nnôm éto a nnôm éto. A be nji bi awo'on to'o *môs to'o alu, e ba ba kañe tit a éve'ela jé, a nyô ase a nyoñe ndeme ya jôé dé.

¹² E ne awolo mbane mimfufup mia ba'ale mebendé me Zambe a mbunan e be Yésus.

¹³ A me nga wô'ô *tyiñ é so'o yôp é jô'ô na: Tili'i na: Ataté éyoñe ji, ébotan a miñwuan mia wu e be Nti. Yaa nalé Nsisim a jô, ndemben ba ye wo'one bisaé biap, a amu mimboone miap mia tôñe be.

Nkôane memvoñ

¹⁴ A me nga yen, éfumulu *nkut a, été yôp, môt a too ane Mone Môt. E nlô wé yôp, a nga be'e ékate duma or a, e wo wé, a nga bili akabe fansoñ.

¹⁵ Wôna, éngele mfe a nga kui *nda Zambe a yôta'an e môt a nga to e *nkut tyiñe ngu a jô na: Wu'a e fansoñe jôé a kôan. Awolo ya kôan e kpwaaneya, amu bibuma ya si bi ntoo bitôtôlô.

¹⁶ Ane nyô a nga too e *nkut yôp a nga wua fansoñe jé si, ane nkôane mvoñe ya si ô nga boban.

¹⁷ Wôna éngele mfe a nga kui e *nda Zambe ya yôp. Nye fe a nga bili akabe fansoñ.

¹⁸ Wôna éngele mfe a nga kui ata'a metuna'a. A nga bili ngule ya jôô nduan, a yôtane nyô a nga bili akap fansoñe na, wu'a akabe fansoñe dôé, a faté bisañ bi woon ya si, amu bisañ bi woone bié bi nto bitôtôlô.

¹⁹ Ane éngele a nga wua fansoñe jé e si, ane a nga kôane woone bibuma bi ya si a futi nye e beta fandé ayaa Zambe été.

²⁰ Be nga tibi fandé a mebo e tison atan, a metyi me nga vam fandé me nga bet a kui e minkole mi tii bikabela menyu kiliméta mintete minyin a mewôme muam.