NLITAN 13 - Kalate Zambe Nnomo a Mfefe Mfefé Nkôñelan

Tit ja so e mañ été

¹ A me nga yene tit é kuik e mañ, é bili minla'awôm, a minlô zamgbwa. E minla'a mié yôp, mimvulekane biyé awôm a, e minlô mié yôp, jôé ébiasé e too ntilan.

² E tit me nga yen é funa'ane ze. Mimbiaé mié mi nga funane mi mi Urs a anyu dé ane di ngbwengbwem. A dragoñ a nga ve nye ngule jé, éto njôô jé a ngule njôan.

³ Nlô wua ya minlô mié ô mbe mbalan bebé ya wu. Ve aveñe ya awu dé e nga yet. Si é nga kam a ése é nga toñe tit.

⁴ A be nga kañe dragoñ amu a nga ve tite ngule njôan, a be nga kañe tit a jô na: Za be ne ve'ane nye tit a za a ne wosane je'

⁵ Anyu e nga vebane be je asu ya kobô *nkpwala ébiasé, a ngule ya jôô é nga veban e be je tañe ngon mewôm menyin a ébaé.

⁶ Ane é nga kui anyu a kobô Zambe ébiasé, asu ya kobô jôé dé ébiasé, e vôme wé a ne étyi, a ba bese éto jap é nee yôb été.

⁷ Ngule ya wosane mimfufup a dañe mie é nga vebane be nye, a a nga bi ngule njôan e be ayoñ ese; môt ase, *minkobô mise, a bi jôé bise.

⁸ Ba ye kañe nye, ba bese be too e si, e ba bese môé map me nji bo ntilan e kalate ényiñ Mone Ntômba a nga wôéban aso mbôka'a ya *si nyô.

⁹ Nyô a bili alo a wô'ô na:

¹⁰ nyô a ne ntiñetan ya ke minkôm a ye ke e minkôm. Nyô a ne ntiñetan ya wu a nkpwaté mekôn a ye wu a wô. Awolo mban a mbunane mimfufup e nde di

E tit ja so e si

¹¹ A me nga yene tite fe é kui e si. E nga bili minla'a mibaé ane Mone Ntômba, ve é kobô'ô ane dragoñ.

¹² Ngule njôan ése tit ôsu ja belane je e mise mé. Ja bo na si a e bôt be too été be kañe tit ôsu nje fôl awu é nga mane yet.

¹³ Ja bo bitua bi mam a kui vôme ya soo nduan e yôp, e mise me bôte bese, a zuu je e si.

¹⁴ Ja du'u bôt be too e si a e bitua bi mam bia vebane be je na é bo e mise me tit éte. Ja tindi na be telé éve'ela asu duma tit é be'e aveñe nkpwaté mekôn, nje é nga beta nyiñ.

¹⁵ Ngul é nga veban e be je na, é fô'ô éve'ela tit, é kui vôme ya kobô, a wôé e môt ase a ye bo te kañ éve'ela tit.

¹⁶ Ja tindi bôt bese, e ba be ne anen a ba be ne tyôtyoé, minkukum a minzôzoé, beti a belo na be kpwelebane ndem e wo ya mbo nnôm nge mvom asu.

¹⁷ A teke môt a ne ngule ya kus, nge kuan, nge a nji be'e ndem, jôé tit, nge ékanga tañe ya jôé dé.

¹⁸ Eyoñe ya fas é kpwaaneya: e nyô a ne atyeñ a kôñela'an ékanga tañe tit éte, amu é ne ékanga tañe môt. A ékanga tañe jé é ne mintete misaman a mewôm mesaman a saman.