NLITAN 12 - Kalate Zambe Nnomo a Mfefe Mfefé Nkôñelan

Minga mon a dragoñ

¹ Beta ndem a nga yené e yôp été avale di: minga a be'e jôp, ngon e mebo mé e si, a e nlô, ékat a ateté awôm a abaé.

² A nga too abum, a tatek a ésaé, a mintaé mi nkô'ôlane mie.

³ Wôna ndeme fe é nga yené e yôb été, é mbe beta dragoñ, évele ane nduan. A nga bili minlô zamgbwa a minlak awôm a e minlô mié yôp, mimvulekane biyé zamgbwa.

⁴ E njeme jé é nga vaa ngab lale ya ateté ya yôp a wua de e si, dragoñ a nga tebe ôsu minga a mbe na a yiane biaé na a mine mon nné ane a bialé.

⁵ Ane a nga biaé monafam, nye a yiane liti meyoñe mese *zen e vôme ma ke di a *ntum étyé. Ane mone wé a nga nyoñebane be Zambe a éto njôane jé.

⁶ Ane minga a nga mate a ke *nkôte si, e vôme Zambe a nga kôme nye vôme ya tabe na be ve nye bidi tañe melu toyini a mintete mibaé a mewôm mesaman.

⁷ Ane mewosan me nga boban e yôb été. Miké a beéngele bé be nga wosane dragoñ. A dragoñ fe a nga wosan a be éngele bé.

⁸ Ve a nji dañ. Eto teke beta yené e yôp été asu dap.

⁹ Ane beta dragoñ a nga wuaban e si, nnôme nyo, e nyô ba loone na Diable a Satan, ndu'u si ése, a nga wuaban e si baa beéngele bé nsamba wua.

¹⁰ A me nga wô'ô éwôlô *tyiñ é so'o yôp, é jô'ô na: Eyoñe nyian nje ji, éyoñe ngu a éjôé Zambe wongan, a ngule njôane Krist wé. Amu a wuabaneya e si, mbo'olô bobejañe bangan, nyô a nga bo a bo'olô'ô be asu Zambe wongan *môs ba alu.

¹¹ Ve be nga dañe nye a metyi me Mone Ntômba, a e foé be nga boban bengaa. Be nga bo te nye'e ényiñe jap a kui vôme ya ko awu woñ.

¹² Ajô te taba'ane mevak été, mia yôp a mia mi bili bitaba'a bienan été. Engôngol a mia, si a mañ, amu Diable a siseya e be mia, njalan a ayok, a yeme na, a li'iya nye ve ôyôm éyoñ.

¹³ Eyoñe dragoñ a nga yene na a wuabaneya e si, ane a nga taté ntitane minga a nga biaé monafam.

¹⁴ Ve mefap mebaé me beta ndôé me nga veban e be minga na, a yele a ke e *nkôte si, e vôm a ne nye mba'alane na, be ve nye bidi, ôyab a nyo, tañe mimbu mila a étun.

¹⁵ Ane nyo é nga yô jôm ane ôsôé, e mvuse minga na, mendim me kee nye.

¹⁶ Ve si é nga zu volô minga. Ane si é nga yombô a mine ôsôé dragoñ a nga yô.

¹⁷ Asu ya yaa minga, nde dragoñ a nga kee mewosan e be *mebuka'a me mvoñe bôte jé, e ba ba ba'ale metiñe me Zambe, a ba'ale Foé Yésus.

¹⁸ Wôna, a nga tebe e nsele'e mañ.