NLITAN 11 - Kalate Zambe Nnomo a Mfefe Mfefé Nkôñelan

Tison é ne étyi a bengaa bebaé

¹ Ane be nga ve me nden é funaane méta mve'e mesi a jô me na: Kôlô'ô si a ve'e *nda Zambe, ata'a metuna'a a e ba ba kañ été.

² Ve ô li'i nseñ ô ne atane ya *nda Zambe te ve'e wô. Amu ô nga veban mfa'a *meyoñ ma ye tibi nlam ô ne étyi tañe bengone mewôm menyin a bebaé.

³ A ma ye ve bengaa bam bebaé ngule ya kulu mejô, be be'e minkuta tañe melu toyini a mintet mibaé a mewôm mesaman.

⁴ Be ne beôlivié bebaé a bibi bifufup bibaé bi tele asu Nti ya si.

⁵ Nge môt éziñ a kômbô ndeñele be, nduan é kui anyu dap a di'i besiñe bap. Yaa, nge môt éziñ a nga ye ndeñele be, avale te nde a nga yiane wôéban.

⁶ Be bili ngule ya dibe yôp a teke mveñ éziñ é ne noñe melu me nkulane mejô wop. Be bili ngule ya kôñelane mendime metyi, a bibi si a abui bibubua ese be ne kômbô.

⁷ Ve éyoñe ba ye mane ve nkañete wop, a tite ja so édo'ébé ja ye wosane be, ja ye dañe be a wôé be.

⁸ Mimbime miap mia ye bômbô ézezañe beta nlam ba loon avale nkulane mejô ô né na Sodom a Ejipte, e vôm émien Nti wop a nga tyelébane *krôa.

⁹ Bizu'u bi bôt a menda me bôt, *minkobô a meyoñe me bôt ba ye zu yene mimbime miap tañe melu mela a étun, a teke jame be soñ.

¹⁰ E bôt be too si ba ye vak amu ajô dap, ba ye vak, ba ye veane biôm amu bekulu mejô bete bebaé be nga soo be abui éndeñela'a.

¹¹ Ve mvuse melu mela a étune mete, évuñulu ényiñ, é so'o be Zambe, é nga nyiine be be, a be nga tebe. Ane beta woñ a nga bi e bôt be nga yene be.

¹² Be nga wô'ô beta *tyiñ a so'o yôp a jô'ô na: Betan e nné. A be nga bete yôp e minkut été, e mise besiñe bap.

¹³ Awolo te ebien, ngule mfô'ôsane si é nga bo. E ngap awômô ya nlam é nga ku si a bôte toyini zamgbwa be nga wu ébubua te. E ba be nga nyiñ be nga ko woñ abui a ve Zambe ya yôbe duma.

¹⁴ Mbia jame baa a lôteya. Tame yen e nyô lale a zu ana'ana.

E toñe zamgbwale

¹⁵ Engele zamgbwale a nga loñe toñe jé. Beta metyiñ me nga so yôp me jô'ô na: Ejôé ya *si nyô é nto ji e Nti wongan a Krist wé éyoñe ji. A ye jô'ô nnôm éto a nnôm éto!

¹⁶ Bemvendé mewôm mebaé a benyiin mbe be too e bito minjôane miap asu Zambe, be nga ku si bubutu a kañe Zambe

¹⁷ a jô na: Bia ve wo akéva, a Nti, Zambe a ne ngul ése, nyô a too, nyô a nga too, amu ô litiya beta ngule wôé, a ô teléya éjôé jôé.

¹⁸ Meyoñe me bôt me nga yaa, ve ayaa dôé nde e nga zu. Awolo ntyi'ane mejô asu miñwuan, awolo ma'ane bebo bisaé bôé, bekulu mejô, mimfufup a ba ba ko e jôé dôé woñ, e ba be ne tyôtyôé a e ba be ne anen, éyoñe ya jiane ba ba ndamane si.

¹⁹ Ane *nda Zambe é nga yombô e yôb été. A éwolo élat é nga yené e *nda Zambe jé été. A ne befeleves be nga bo, metyiñ, bezo'oyañ, mfô'ôsane si a ngule meta'a.