NLITAN 1 - Kalate Zambe Nnomo a Mfefe Mfefé Nkôñelan

Yôanes, mbe'e Foé Krist

¹ Nlitane mame Yésus Krist: Zambe a nga ve nye wô na a liti bebo bisaé bé e mam ma ye ji'a boban. A nga nga bo na bôt be yeme me éyoñ a nga lôme éngele wé e be Yôanes, mbo ésaé wé,

² e nye a tu'a liti na, mam mese a nga yen, me ne nkobô Zambe a ngaa Yésus Krist.

³ Ebotan a môt a lañ, a ba ba wô'ô mejô me nkulane mejô wu, a ba'ale mam me ne ntilan été, amu éyoñ é nto bebé.

Yôanes a ne za

⁴ Me Yôanes, ma tili bekeké zamgbwa be ne Azi. Mvam a *mvo'é bi ne mveban e be mia, bi so'o e be Nyô a too, Nyô a nga too a Nyô a zu, a jôé minsisime zamgbwa mi ne ôsu éto njôan jé,

⁵ a jôé Yésus Krist, nya Ngaa, Ntôle bewômô miñwuan a e Ntômba bejôô *si nyô. Etôtok a ngu bi bo'ok e be nyô *a nye'e bia, a nga kôté bia e mam *abé mangan été a zene ya metyi mé,

⁶ a nga bo bia ayoñe betuni mfa'a Zambe Esaa wé nnôm éto, a nnôm éto. Amen.

⁷ Mi lôô, a zu ézezañe minkut, a dis ese da ye yene nye, e ba bebiene be nga jii nye akoñ: *meyoñ mese ya *si nyô ma ye tabe ôlun été amu nye. Yaa! Amen!

⁸ Me ne Alfa a Oméga, nalé Nti Zambe a jô, Nyô a too, Nyô a nga too a Nyô a zu, Nyô a ne ngul ése.

Nyenane Yôanes ékôte mañ Patmôs

⁹ Me Yôanes, monyoñe wônan, a ébe nyoñe ngap ya minjuk, njôan a njiban bi ne e be Yésus. Me nga too ékôte mañe Patmôs, amu ajô Zambe a ngaa Yésus.

¹⁰ Nsisim a nga bi ma môse Nti a, e mvuse jam, me nga wô'ô éwôlô *tyiñ aval ane nyô toñ,

¹¹ é jô'ô na: E mam wo yen, tili'i me e kalate été, a lôme me e be bekeké zamgbwa be ne na: Eféze, Smirne, Pergame, Tiatir, Sardés, Filadélfi, a Laôdisé.

¹² Me nga kôñelane na, me yene *tyiñ é mbe é kobô'ô ma éyoñe me kôñelaneya, me nga yene bibii bifufup bi or zamgbwa.

¹³ A, e zañe bibii bifufup bite, môt éziñ a mbe a funa'ane mona môt. A nga be'e ayab ézingi, kandé or é nga yeme nye tôé.

¹⁴ Nlô wé a ésile jé, bi mbe éfumulu ane ji bibañe mendim a e mise mé me mbe aval ane évele nkaba'a nduan.

¹⁵ Mebo mé me nga bo me funa'an édima mvot, ntuman ébé nduan, a tyiñe jé é mbe aval ane éduñe mintyôa mi mañ.

¹⁶ A nga bili ateté zamgbwa e mbo nnôme wé, a akabe nkpwaté mekôn meyo mebaé e nga kui anyu dé. Asu dé e nga ngemban aval ane jôp, éyoñ ese da faé.

¹⁷ Me nga ku ane mbim e mebo mé e si, éyoñe me nga yene nye a mis, ve a nga beté me wo wé ya mbo nnôm, a jô na: Te ko woñ. Me ne nyô ya ôsu a Nyô a su'ulan,

¹⁸ a Nyô a vee. Me nga wu, ve tame yen, me vee nnôm éto a nnôm éto. A me bili bidiba'a ya awu a bi ya vôme miñwuan mi né.

¹⁹ Tili'i ñhe mam ô maneya yen, e mam me né, a ma ma yiane boban.

²⁰ Ve mfa'a *nsolane jam wo fombô ateté zamgbwa ô nga yen e mbo nnôme wom a bibii bifufup bi or bia tinane na: Ateté zamgbwa, e ne beéngele bekeké zamgbwa, a bibii bifufube zamgbwa, bi ne bekeké zamgbwa.