NLAÑANE BÔT 6 - Kalate Zambe Nnomo a Mfefe Mfefé Nkôñelan

Atiñ asu Benazirieñ

¹ Ane Nti a nga kobô Môze na:

² Kobô'ô bone b'Israél a jô be na: Éyoñe fam nge minga ja kandan e bôte bevok a tyili émiene mam ma futi nye e nsamba Benazirieñ, asu ya ve émien e mboon ésaé Zambe,

³ a ye bo te nyu woon, nge bilam bi ne ngu; a ye bo te nyu woon a ne sañ nge bilam bi ne ngu bi too sañ; teke jôm ba nyu ja so bibuma bi ndi'i woon a ye nyu, a a ye bo te di bibuma bi ndi'i woon, to'o bi ne nyumi nge nkôt.

⁴ Nté ôse a ye bo *nazirieñ, a ye bo te di jôm éziñ ja so ndi'i woon, ataté mefes a kui ékôp.

⁵ Nté ôse a ne *nazirieñ, jôm ése ba tyembane je ja ye bo te lôt e nlô wé yôp, akekui éyoñ melu émien a nga tiñeti asu Nti me kpwaneya: a ye bo étyi, a ye jô'é ésile ya nlô wé é yaé te tyi'i je.

⁶ Nté ôse ya melu a nga tiñeti asu Nti, a ye bo te subu mbime bebé;

⁷ a ye bo te ve émiene mvin awu ésaa, nyia, monyañ nge kale jé amu a be'e ntelan étyi Zambe wé e nlô wé.

⁸ Nté a ye bo *nazirieñ, a ye bo étyi asu Nti.

⁹ Nge môt a wu nye e fefe atemetem, a nalé a bo na nlô wé ô bo te fe *mfuban, e môse ya ntunane wé a ye tyembane nlô; a ye tyembane wô e môse zamgbwale.

¹⁰ E môse muam, a ye zu ve *ntuni adu abaé, nge zum ébaé, anyiine *nda éndelé bendôba'ane.

¹¹ Ntuni a ye ve ônone wua ane étyi'a ya *njaman abé, a ônon ôvok ane mvean ô ne ngumba, a a ye bo mame ya bulu nsem asu môt ate amu awu te. A môt a ne *nazirieñ a ye fubu nlô wé *môs ôte.

¹² A ye beta telé éyoñ éfe ya éto *nazirieñ asu Nti, a a ye ve ntômba ô ntoo mbu wua ane metuna'a ya nkôman étom; melu a nga taté tabe *nazirieñ ma ye bo te lañeban amu éto *nazirieñ jé ya melu mvus é nga bili mvin.

¹³ Atiñe da fombô Benazirieñ nde di: éyoñe melu mé ya ntéléban étyi me kpwaneya, ba ye zuu nye anyiine *nda éndelé bendôba'ane.

¹⁴ A ye liti Nti mveane wé: ntômba ô ntoo mbu wua, ô too teke ayeñ, asu metuna'a ya nlatane ngbwa;

¹⁵ mone nkoé belet é ne teke mvusan, akekebe biwôlé bi ne teke mvusan, bi too mmiamane mbon a mimvean mi'avut a woon mia tôñe mimveane metuna'a.

¹⁶ Ntuni a ye liti mimveane mite ôsu Nti, a a ye ve étyi, a asu *njaman abé, nalé fe mvean ô ne ngumba;

¹⁷ a ye ve Nti nnôme ntômba asu metuna'a ya nlatane ngbwa, ô laté a nkoé belet é ne te mvusan; *ntuni a ye su'ulane ve mimvean mi'avut a woon.

¹⁸ Eyoñe *nazirieñ a ye tyeñe nlô wé anyiine *nda éndelé bendôba'ane; a ye nyoñ ésile ya nlô wé ô nga teléban étyi a futi je e nduan ja yôñ e metuna'a ya nlatane ngbwa si.

¹⁹ Ntuni a ye nyoñe mbelan éname nnôme ntômba ya wo, nalé fe éwôlé é ne te mvusan e mone nkoé été, a ékekeb éwôlé é ne te mvusan. A ye bôé biôm bite e mo me *nazirieñ a maneya tyembane nlô wé ô ne ntelan étyi.

²⁰ Ntuni a ye bo bie ndeñkolô ôsu Nti a jôme te é ntoo étyi, é ntoo jôme Ntuni avale fe an'ôngône ba ve a éname ya *abé ba vaa. Ataté éyoñe te nje *nazirieñ a ntoo nyu woon.

²¹ Atiñe *nazirieñ a ve ntiñetan nde le; mvean a ve Nti amu éto *nazirieñ jé ñwô fe le; a ne ve biôme bife nge a bili ngu; ve a yiane ve jôm a nga tiñeti avale atiñe ya *nazirieñ é né.

Bifia ya botane bôt

²² Ane Nti a nga kobô Môze na:

²³ Kobô'ô Aron a bone bé na: Mia ye botane bone b'Israél a jô be na:

²⁴ Nti a bota'ane wo a a ba'ale'e wo!

²⁵ Nti a faé éfufup ya asu dé be wo, a mvama'ane wo!

²⁶ A bete'e asu dé e be wo a ve wo *mvo'é!

²⁷ Avale di nde ba ye tote jôé dam asu ya botane bone b'Israél, a Mamien ma ye ve be ébotane jam.