NLAÑANE BÔT 5 - Kalate Zambe Nnomo a Mfefe Mfefé Nkôñelan

Ntitane bôt be ne mvin

¹ Nti a nga kobô Môze na:

² Bendé'é bone b'Israél na, be titane nzezam ôse ô kôlô minkan, nalé fe nyô ase a kon ôkon éziñ e biôm bi fam nge minga, nge na a ntoo mvin amu nnambane mbim.

³ To'o fam nge minga mia ye titane be minkan, amu be za ve minkan mi bo mvin.

⁴ Nde bone b'Israél be nga bo nalé. Be nga titane mevale me bôte mete minkan: be nga bo avale Nti a nga jô môze.

⁵ Nti a nga beta kobô Môze na:

⁶ Kobô'ô bone b'Israél na: Nge fam nge minga a bo e môte mbo'o *abé da ya mebé môt a ne bo émien, a a nji fe bo zôsôôô e mise me Zambe, a a ve fe émiene mekua,

⁷ môt ate a ye mem *abé a te bo, a bulane fe jôm a te nyoñ e be môt émien a nee je a abet e too e ngabe tañe ya tañe jôme te ja kui.

⁸ Nge môt a ne jôme te a wuya te li'i môt éziñ e *nda bôte jé a too nyô a yiane nyoñe ntañe te, jôme te ja ye veban e be Nti, nalé a ne na e be *ntuni. E môt a nga seb'étom a ye fe ve nnôme ntômba asu metuna'a ya *njaman ya *abé dé: éyoñe te *ntuni a ye bo bisaé ya *njaman abé mfa'a wé.

⁹ E ngab'ése ba vaa e mvean ô n'étyi ñwô bone b'Israél ba ve, ngab éte é ne asu *ntuni.

¹⁰ Jôm ése môt a telé étyi, ba kalane je *ntuni a jôm ése môt a ve *ntuni, *ntuni a ne nyoñe je é bo énjé.

Atiñ da fombô minga ba nyiñe ajô mejian

¹¹ Nti a nga kobô Môze na:

¹² Kobô'ô bone b'Israél a jô be na: Nge fam é bili minga, a minga ate a bo nnôm bijabô,

¹³ vôme fame fe ja jô'ôbô nye asoé, nnôm te yem, nnôm a nji bi ndem amu ngaa éziñ a nji bo, a môt éziñ a nji dilane nye,

¹⁴ ve nnôm a so'osane nye mfa'a ya ntabane wé. E ne fe kui na fam ja simesane na ngal a boya *mejian, ve nalé a too momo.

¹⁵ Fam éte ja ye zuu ngal e be *ntuni a bili mvean asu ngal ate: kili avute fôn éla. A ye bo te sôé mbon avute te yôp nge sôé menyum, amu mvean ôte ô ne asu minso'osan ya *abé éziñ da yiane kuliban atan.

¹⁶ Ntuni a ye bo na a subu bebé a tebe tetele e mise me Nti.

¹⁷ Ntuni a ye nyoñe mendim me n'étyi e vie'e tyia été, a ye nyoñe mbuluk e si ya *tabernakel a futi wô e mendim été.

¹⁸ Ntuni a ye bo na minga ate a tebe tetele e mise me Nti, a ye vaa jôm é butu nye nlô, éyoñe te a kee nye mveane ya ésoman, nalé a ne na, mvean ya zes ñwô ô nga veban amu minso'osan mi nnôm. Ntuni émien a ye bi mendim me n'ayô ma soo biyo'é.

¹⁹ A ye yemete minga ate na ba nye be tote bifia bina na: Nge e nji ke bo bebela na mia fam mia te jô'ôbô, a na ô maneya samele womien amu medu'an wo te du'u nyo nnôm, biyo'é mendim me n'ayôle ma soo me me bo'o te nnambe wo.

²⁰ Ve nge ô maneya samele womien a du'u nyo nnôm, nge fame fe é maneya jô'ôbô wo,

²¹ Nti a va'a wo *melep: a bo'o wo nkôkôm, a bo na abume dôé e vus, nalé bôte ya si jôé ba ye nyoñe wo an'éve'ela'a éyoñ ba tot ajô biyo'é;

²² Mendim ma soo biyo'é ma me nyi'ine wo e *miñya a vuse wo abum a bo wo nkôkôm. Wôna minga ate a ye yalane na Amen! Ya, é bo'o nalé!

²³ Ntuni a ye ba'ale bifia ya biyo'é bite ntilan, a ye dube jôm é ntoo ntilane te mendim me n'ayôle mete asu ya tyame bifia bite.

²⁴ Eyoñ a ngenan te kalane minga mendim mete na me nyi'ine nye e *miñya,

²⁵ *ntuni a ye taté beta nyoñe mveane ya ésoman e mo mé a liti wô Nti a mboone jame ya nlitan, éyoñe te a zuu wô ata'a metuna'a.

²⁶ A ye kandé mveane te tañe ngum akule wo ane jam ya simesan, a di'i wô ata'a metuna'a yôp. Mvus éte, a ye bendé minga na a nyu mendim.

²⁷ Eyoñ a ye nyu me, avale di nde da ye boban: nge minga a nga samele fo'o émien a bo nnôm bijabô, mendim me n'ayô ma soo biyo'é ma ye nyiine nye e *miñya a vusu nye abum, a bo nye nkôkôm. Ataté éyoñe te bôte ya si jé ba ye tote nye ane éfunan éyoñe ba tote bifia biyo'é.

²⁸ Ve nge minga a nji ke samele émien, nge a nji bo mekua, biyo'é bia ye bo te kui be nye a a ne nguleya biaé *bon.

²⁹ Atiñ da fombô bisoman nde le. Atiñe te e ne asu minga a wulu *abé, nyô a samele émien éyoñ a bo nnôm bijabô,

³⁰ nge na nyô nnôm a so'osane mbia dulu, nnôm a telé ngal e mbôñ ajô e mise me Nti, a *ntuni nye a bo mam mese y'été.

³¹ Nnôm a *abé dé nge a bili fo'o mekua.