NLAÑANE BÔT 4 - Kalate Zambe Nnomo a Mfefe Mfefé Nkôñelan

Bisaé bone be Lévi

¹ Nti a nga kobô Môze a Aron a jô na:

² Lañe bone be Kehat tañ ézezañe ya bone be Lévi avale mebum a menda me bôte map me né,

³ ataté mimbu mewôm mela a ke ôsu a kui mimbu mewôm metan, ba bese ba yiane bo ésaé éziñ e *nda éndelé bendôba'ane.

⁴ Esaé bone be Kehat be nga yiane bo e *nda éndelé bendôba'ane nje ji, ésaé ja fombô jôm ése ja dañ étyi.

⁵ Eyoñe bone b'Israél ba ye taté dulu, Aron a bone bé ba ye taté vaa éyé é tyele e zañe *tabernakel a buti je éwolo élate yôp;

⁶ ba ye buti ékôb abañ éyé te yôp, a yalé éndelé éfe yôp é too nyôle blum e vôm ase; ba ye su'ulane some mimbôñe mi éwolo élat.

⁷ Ba ye beté éndelé é ne nyôle blum e tawôlô belet y'étyi ja bebe, a telé bone bisua bilaé, bido'o bisua a bone mekob asu mmiamane beôlobinda été yôp;

⁸ Ba ye yalé évele éndelé e biôm bite yôp a su'ulane buti mfinga bikôb bi abañ été yôp; ba ye su'ulane some mimbôñe ya tawôlô.

⁹ Ba ye nyoñ éndelé é ne blum a buti je ébi bifufub asu éfufup, belambe bé, mebase mé ya dim éfufup, bikutan asube bié a mevie'e me mbon me ne asu ésaé jé;

¹⁰ Ba ye vuluku ébi bifufube te a biôme mebelane bié bise e mfinga bikôb bi'abañ été a beté je ôlañe yôp.

¹¹ Ba ye buti éndelé é ne blum ata'a metuna'a e ne mboon a or yôp a vuluku de ékôb abañ été; éyoñe te ba su'ulane futi mimbôñe mié.

¹² Ba ye nyoñe biôme mebelane bise ya *nda y'étyi, a futi bie éndelé é ne nyôle blum été, éyoñe te ba su'ulane futi bie ôlañ été.

¹³ Ba ye vaa asube ya ata'a metuna'a a beté éndelé é ne nyôle mfô été yôp;

¹⁴ Ba ye beté biôm mebelan bise y'été yôp; metye'e me nduan, bilum, bisobelé a bilaé, biôm mebelan bise y'ata'a metuna'a, ba ye buti ékôb abañ été yôp, mvus éte, ba ye su'ulane futi mimbôñe y'ata'a metuna'a.

¹⁵ Eyoñ Aron a bone bé be maneya buti jôm ése é n'étyi, a biôm mebelan bise ya vôm a n'étyi, bone be Kehat ba ye be'e bie éyoñ awolo ya kôlô e kpwaneya. Ve ba ye bo te nnambe jôm é n'étyi, be za viane wu. Esaé bone be Kehat, e *nda éndelé bendôba'ane, nje le.

¹⁶ Eléazar e mone Aron *ntuni, nye a ye ba'ale mbon ba futi e belambe y'ébi bifufup, ôlobinda a nyume mvaé, mveane ya mefup bôt ba ve éyoñ ése a mbon ba wo'o bôt éyoñ ba telébane bito; a ye ba'ale *tabernakel ase a jôm ése é n'été, vôm y'été a biôme mebelane bié bise.

¹⁷ Ane Nti a nga kobô Môze a Aron na:

¹⁸ Wo ye ba'ale e jame di na, mebum me bôt me bone be Kehat me tabe kom ése ézezañe bone be Lévi bevo'o été,

¹⁹ nde ba ye bo te wu, nge ba nnambe biôm bi n'étyi. Ajô te mia ye bo avale di: Wo Aron a bone bôé, mia ye kee môt ase ya be be e vôme wé a liti nye e jam a yiane bo nge jôm a yiane be'e.

²⁰ Ajô te ba ye bo te fombô to'o ve mon'étun éyoñ, biôm bi ne ntelan étyi, nalé a za dutu be awu.

Bone be Gerson

²¹ Nti a nga kobô Môze na:

²² Lañe fe tañe bone be Gerson avale mebum a menda me bôte map me né;

²³ wo ye lañe be ataté mimbu mewôm mela a ke ôsu a kui mimbu mewôm metan, e *nda bendôba'ane.

²⁴ Esaé bone be Gerson, ésaé jap a mbe'e wop mbie bi:

²⁵ ba ye be'e bindelé ya *tabernakel a *nda éndelé bendôba'ane, ébuta'a bikôbe beyôm mintômba jé a ji ékôp ja yalé ngume *tabernakel ôse, éndelé ja tyebe anyiine *nda éndelé,

²⁶ a bindelé bi tyele mfa'a ya nseñ a éndelé ya anyiine mimbé ya nseñ mbôma'an a *tabernakel a ata'a metuna'a, minkole miap a biôme mebelane biap bise. Ba ye fe bo bisaé bise y'été.

²⁷ Aron a bone be Gerson: mbe'ane biôm a bisaé bivo'o bise ba yiane bo. Aron a bone bé mbe ba ye kate be jam ba yiane bo a jôm ba yiane be'e.

²⁸ Esaé menda me bôte ya bone be Gerson ba yiane bo e *nda éndelé bendôba'ane nje le, nalé fe biôm ba yiane ba'ale. Itamar e mone Aron *ntuni nye a ye bo évete jap.

²⁹ Wo ye lañe bone be Merari ane mebume map me né a ane menda me bôte map me né;

³⁰ wo ye lañ ataté bôt be ne mimbu mewôm mela akui mewôm metan, ba bese be ntoo nguleya saé e *nda éndelé bendôba'ane.

³¹ Biôm ba yiane ba'ale mfa'a ésaé ya *nda éndelé bendôba'ane mbie bi: bityimbi ya *tabernakel, mimbôñ, mekôn a metine ya été;

³² mekôn ma bômane nseñ, metine map a mefana'a map, minkole miap, biôm mebelan bise y'été a jôm ése é ne ntelan mfa'a ya ésaé jap. Mia ye ve môt ase biôm a yiane ba'ale.

³³ Esaé mvô'ô Merari nje le: ésaé jap ése ya *nda éndelé bendôba'ane, Itamar e mon Aron *ntuni a too nteb'ôsu wop.

³⁴ Môze, Aron a bivete bi bôt be nga lañe bone be Kehat, ane mebum a menda me bôte map me né.

³⁵ Ba bese be mbe nguleya saé e *nda éndelé bendôba'ane be too mimbu mewôm mela a lôte valé, a kui mimbu mewôm metan.

³⁶ Ba be nga lañeban avale mebume map me né be mbe toyini ébaé, mintete zamgbwa a mewôm metan.

³⁷ Bôte bese be nga lañeban e mvô'ô Kehat mbe le, bese be nga saé e *nda éndelé bendôba'an. Môze a Aron be nga lañe be avale Nti a nga bendé Môze.

³⁸ Bone be Gerson be nga lañeban avale mebume map a menda me bôte map me né,

³⁹ ataté mimbu mewôm mela alôte valé, a kui mimbu mewôm metan, ba bese be mbe nguleya saé e *nda éndelé bendôba'ane.

⁴⁰ Ba be nga lañeban avale mebume map a menda me bôte map me né, be mbe toyini ébaé, mintete misaman a mewôm mela.

⁴¹ Bôte ya mvô'ô Gerson be nga lañeban mbe le. Bese be nga saé *nda éndelé bendôba'ane. Môze ba'Aron be nga lañe be avale Nti a nga bendé Môze.

⁴² Bôte ya mebum me bone be Merari be nga lañeban, avale mebum a menda me bôte map me né,

⁴³ ataté mimbu mewôm mela alôte valé, a kui mimbu mewôm metan, ba bese be mbe nguleya saé e *nda éndelé bendôba'ane,

⁴⁴ ba be nga lañeban avale mebume map me né be mbe toyini éla a mintete mibaé.

⁴⁵ Bôte be nga lañeban e mvô'ô Merari mbe le. Môze a Aron be nga lañe be avale Nti a nga bendé Môze.

⁴⁶ E bôte bese ya mvô'ô Lévi mbe Môze, Aron a bivete y'Israél be nga lañ, avale mebum a menda me bôte map me né,

⁴⁷ ataté mimbu mewôm mela a lôte valé, a kui mimbu mewôm metan, be too nguleya bo ésaé bevolô a bebe'e biôme ya *nda éndelé bendôba'ane,

⁴⁸ be mbe toyini muam, mintete mitan a mewôme muam.

⁴⁹ Be nga lañe be avale Nti a nga bendé Môze, môt ase a bili ésaé jé a mbe'e wé.