NLAÑANE BÔT 36 - Kalate Zambe Nnomo a Mfefe Mfefé Nkôñelan

Bengon ba nyoñe bilik be nji yiane ke meluk atane ya meyoñe map

¹ Bivete menda me bôte ya mebum me bone be Galad, e mone Makir, e mone Manasé, ya mvô'ô Yôsep, bi nga zu a kobô asu Môze, benya bôtô a bivete ya menda me bôt me bone b'Israél na:

² Zambe a nga bendé *nti wome na, a kabe si mengap a mboon *asimba e be bone b'Israél. Nti wom a nga nyoñe fe abendé na, a ve e ngabe Selôfad monyañe wongan, e be bobebinga bé.

³ Nge ba ke meluk e be monafame wua ya meyoñe mefe y'Israél, ngabe jap ja ye vas éli'i b'ésaa bangan a ke lat a ayoñ e ntoo éndap; éyoñe te ngabe jangan é nga zu e be bia a mboon *asimba ja ye sé'éban.

⁴ A éyoñe mbu mevak wo ye so asu bone b'Israél, ngabe jap ja ye kô'ôlane nyô ya ayoñ e ntoo éndap a vas akabe ya ayoñe b'ésaa bangan.

⁵ Nde Môze a nga kalane bone b'Israél mebendé Nti a nga ve na:

⁶ Ayoñe bone be Yôsep da bele. Avale di nde Nti a bendé bengone be Selôfad: be ne fili ya lu'u môt ase ba kômbô luk ve da ba yiane ke meluk abume da ya ayoñ ésaa wop.

⁷ Ngab éli'i éziñ ya bone b'Israél ja ye bo te kôlô ayoñe di a ke ayoñ afe, ve bone b'Israél ba ye timbi, môt ase a ngab éli'i ayoñe b'ésaa.

⁸ Ngone minga ése é bili *ngab élik e meyoñe ya bone b'Israél, a ye lu'u môte ya abume bôt da ya ayoñ ésaa, éyoñe te bone b'Israél ba ye bi, môt ase, ngab éli'i ya b'ésaa.

⁹ Teke ngab éli'i éziñ ja ye kôlô ayoñe di a ke ayoñ afe, ve *meyoñ y'Israél ma ye timbi, ayoñ ese, a éli'i jé.

¹⁰ Ajô te bengone be Selôfad be nga bo avale Nti a nga bendé Môze,

¹¹ Mala, Tirsa, Ogla, Milka a Nôa, bengone be Selôfad, be nga lu'u bobefam e be bendômenyañe bap;

¹² be nga ke meluk e mebume me bone be Manasé, e mone Yôsep, a ngab éli'i jap é nga tabe ayoñe ya *nda abume bôt ésaa wop.

¹³ Mebendé a minjôan Nti a nga ve Israél a anyu Môze e minje'ese ya Môab, bebé a Yordan, zôsôôô a Yérikô mbie le.