NLAÑANE BÔT 34 - Kalate Zambe Nnomo a Mfefe Mfefé Nkôñelan

Minné mi si ya Kanaan

¹ Ane Nti a nga kobô Môze na:

² Va'a bone b'Israél abendé di a jô be na: Éyoñe mia ye nyiine si ya Kanaan, abime si da ye bo énjenan nde di: Si ya Kanaan a minné na:

³ Efase ya nké, ja ye taté e *nkôte si ya sin bebé a Edom. Ajô te, nné wônan ya nké a ye taté aku'u ya mañ me bili nku, e mfa'a jôp da tôô.

⁴ Nné wônan a ye lôt, a beté Akrabim mfa'a ya nké, éyoñe te a ye lôt e sin, a ke kui e Kadés-Barnéa, mfa'a ya nké; nné ate a ye ke ôsu mfa'a Asar-Adar, a lôte e Asmôn;

⁵ Ataté Asmôn, a ye lôt a kui ôtôñ y'Ejipte, éyoñe te a su'ulane vame mañ.

⁶ Mfa'a jôp da dim, nné wônan:

⁷ mfa'a y'akôé, nné wônan a ye bo avale di: ataté e beta mañ, mia ye kañe na a kui nkôle Or;

⁸ ataté nkôle Or, mia ye kañe nné anyiine Amat, nalé a ye ke kui e Sedad;

⁹ zifrôn nye a ye kee nné ôsu a kui Asar-Enan: nné wônan y'akôé nye le.

¹⁰ E mfa'a jôp da tôô, mia ye tyi'i e nné wônan ataté Asar-Enan a kui Sefam.

¹¹ Nné a ye sis, a taté Sefam a kele e mfa'a ya Ribla, Ayin mfa'a jôp da tôô; nné a ye beta sis a nnambe nsa'a mañ ya Kinérét, e mfa'a jôp da tôô;

¹² A ye beta sis e mfa'a ya Yordan a ke vam e mañ me bili nku. Si jenan, a minné mié mbôma'an, nje le.

¹³ Ane Môze a nga kalan abendé di e be bone b'Israél a jô na: E si mia ye kaban a mboon *asimba, nje le a nje Nti a nga bendé na, a ye ve *meyoñ ébul a étun.

¹⁴ Amu ayoñe bone be Ruben, ane mebume map me né a ayoñe bone be Gad, ane mebume map me né, me nga nyoñ e ngabe jap; éfas ayoñe Manasé é nga nyoñe fe e ngabe jap.

¹⁵ Meyoñ mete mebaé a étun, me nga nyoñ e ngabe jap e Yordane yat, zôsôôô a Yérikô, mfa'a jôp da tôô.

Nkabane si

¹⁶ Ane Nti a nga kobô Môze na:

¹⁷ Biyôlé ya bôt ba ye kabe mia si mbie bi: *ntuni Eléazar a Yasua e mone Nun.

¹⁸ Mia ye beta nyoñ évete ya ayoñ ése asu ya kabe si.

¹⁹ Biyôlé bi bôte bete mbie bi: ayoñe Yuda: Kaléb e mone Yefuné.

²⁰ Ayoñe bone be Siméoñ: Samuel e mone Amihud;

²¹ Ayoñe bone be Bényamin: Delidad, e mone Kislôn;

²² Ayoñe bone be Dan: Buki évet, e mone Yôgli;

²³ E mvoñe Yôsep: ayoñe Manasé: Aniél évet a too e mone Efôd

²⁴ Asu ayoñ Efrayim: Kemuél évet, a too e mone Siftan.

²⁵ Asu ayoñe bone be Zabuloñ: Elisafan évet, a too e mone Parnak;

²⁶ Asu ayoñe bone b'Isakar: Paltiél évet, a too e mone Azar.

²⁷ Asu ayoñe bone b'azer: Ahihud évet, a too e mone Selômi.

²⁸ Asu ayoñe bone be Néftali: Pédahel évet, a too e mone Amihud.

²⁹ E bôte ba mbe Nti a nga ve abendé ya kabe si ya Kanaan e be bone b'Israél.