NLAÑANE BÔT 33 - Kalate Zambe Nnomo a Mfefe Mfefé Nkôñelan

Mulu a bitaba'a ataté Ejipte a kui minje'ese ya Môab

¹ Mana me ne mewo'on me bone b'Israél, ataté Ejipte akui minje'ese ya Môab, aval'ane *minsamba mewosan miap mi mbe, Môze a Aron be too beliti *zen.

² Môze a nga tili mevôm mese be nga tebe amu njôane Nti, mevôm mete ma:

³ e ngon ôsu ya mbu é too melu awôm a metan, tyé kpwaa ya Pak ôsu, bone b'Israél be nga kôlô e Ramzés; be nga kôlô, bôte ya Ejipte be lôô, bebé ane nge be ntoo fili.

⁴ Eyoñe te bôte ya Ejipte be jeñek mintôle mi bone miap Nti a nga mane wôé: a *zen éte fe Nti a nga liti ntyi'ane mejô wé e be bezambe bap.

⁵ Akôlô ya Ramzés, bone b'Israél be nga vule minkan e Sukôt.

⁶ Akôlô ya Sukôt be nga vule minkan Etam, mfa'a ya susu'a aku'u ya *nkôte si.

⁷ Akôlô ya Etam be nga beta bulane mvus a kui Pi-Ahirôt, zôsôôô a Baal-Séfôn, a vule minkan ôsu Migdôl.

⁸ Akôlô ya Pi-Ahirôt, be nga lôt ézezañe mañ, a ke mfa'a ya nkôte si; be nga wulu melu mela e *nkôte si y'Etam a vule minkan e Mara.

⁹ Akôlô ya Mara, be nga kui Elim; menjeñe mendim awôm a mebaé a melen mewôme zamgbwa me mbe Elime valé: nde be nga vule minkan e vôm ate.

¹⁰ Akôlô ya Elim be nga vule minkan bebé évele mañ.

¹¹ Akôlô ya évele mañ, be nga vule minkan e *nkôte si ya Sin.

¹² Akôlô ya e *nkôte si ya Sin, be nga vule minkan e Dôfka.

¹³ Akôlô ya Dôfka, be nga vulu minkan Alus.

¹⁴ Akôlô ya Alus be nga vule minkan e Refidim, vôme bôt be nga jemban mendime ya nyu.

¹⁵ Akôlô ya Refidim, be nga vule minkan e *nkôte si ya sinayi.

¹⁶ Akôlô ya *nkôte si ya Sinayi, be nga vule minkan e Kibrôt-Atava.

¹⁷ Akôlô ya Kibrôt-Atava, be nga vule minkan Asérôt.

¹⁸ Akôlô ya Asérôt be nga vule minkan e Ritma.

¹⁹ Akôlô ya Ritma, be nga vule minkan e Rimôn-Pérés.

²⁰ Akôlô ya Rimôn-Pérés, be nga vule minkan e Libna.

²¹ Akôlô ya Libna, be nga vule minkan e Risa;

²² Akôlô ya Risa, be nga vule minkan e kéhélata.

²³ Akôlô ya Kéhélata, be nga vule minkan e Kafér.

²⁴ Akôlô ya Kafér, be nga vule minkan e Arada.

²⁵ Akôlô ya Arada, be nga vule minkan e Makhélôt.

²⁶ Akôlô ya Makhélôt, be nga vule minkan e Tahat.

²⁷ Akôlô ya Tahat, be nga vule minkan e Tara.

²⁸ Akôlô ya Tara, be nga vule minkan e Mitka.

²⁹ Akôlô ya Mitka, be nga vule minkan e Asmôna.

³⁰ Akôlô ya Asmôna, be nga vule minkan e Môsérôt.

³¹ Akôlô ya Môsérôt, be nga vule minkan e Béné-Yakan.

³² Akôlô ya Béné-Yakan, be nga vule minkan e Or-Gidgad;

³³ Akôlô ya Or-Gidgad, be nga vule minkan e Yôtbata.

³⁴ Akôlô ya Yôtbata, be nga vule minkan Abrôna.

³⁵ Akôlô ya Abrôna, be nga vule minkan Etsion-Géber.

³⁶ Akôlô ya Etsion-Géber, be ngu vule minkan e *nkôte si ya Tsin ñwô ô ne kadés.

³⁷ Akôlô ya Kadés, be nga vule minkan e nkôle Or, Aku'u sii Edom.

³⁸ Ane *ntuni Aron a nga bet e nkôle Or, avale Nti a nga jô; A nga wu valé, e ngone tane é too alu da ya mbu mewôme nyini ataté nkôlane bone b'Israél y'Ejipte.

³⁹ Aron a mbe mimbu ntet, mewôm mebaé a milaa éyoñ a nga wu e nkôle Or.

⁴⁰ Njôô bôte Bekananééñ y'Arôd a nga too Négéb, si ya Kanaan, a nga wô'ôtane na bone b'Israél be soya.

⁴¹ Akôlô ya e nkôle Or, be nga vule minkan e Salmôna.

⁴² Akôlô ya Salmôna, be nga vule minkan e Punôn.

⁴³ Akôlô ya Punôn be nga vule minkan Obôt.

⁴⁴ Akôlô ya Obôt, be nga vule minkan Iyé-Abarim, nnéa minje'ese ya Môab.

⁴⁵ Akôlô ya Iyé-Abarim, be nga vule minkan e Dibôn-Gad.

⁴⁶ Akôlô ya Dibôn-Gad, be nga vule minkan e Almôn-Diblatayim.

⁴⁷ Akôlô ya Diblatayim, be nga vule minkan minkôle ya Abarim ôsu Nébô.

⁴⁸ Akôlô ya minkôle ya Abarim, be nga vule minkan e minje'ese ya Môab, bebé a yordan, zôsôôô a Yérikô.

⁴⁹ Be nga vule minkan bebé a Yordan, ataté Bét-Oyésimôt a kui Abél-Sitim, e minje'ese ya Môab.

⁵⁰ Ane Nti a nga kobô Môze minje'ese ya Môab, bebé a yordan, zôsôôô a Yérikô.

⁵¹ Nde a nga jô na: Jô'ô bone b'Israél na, éyoñe mia ye dañe Yordan a nyiin e si ya Kanaan,

⁵² Mia ye mane titan bôte bese ya si ôsu vienan, a tyame bengunemelane bese ya be ne mboon a *mekok, mia ye mane tyame bive'ela bi biôme biap bi ne mboon a ékpwembé ba nyemé e nduan a tyame mevôme map me ne mbetane yôp.

⁵³ Mia ye nyoñe si a tabe été; amu me nga ve mia si na, é bo jôme jenan.

⁵⁴ Mia ye kaban éli'i ya si a mboon *asimba, aval'ane mebume menan me né. E bôte ba dañ abui ba ye nyoñe ngabe si ja dañ anen, ba ba dañe tyôtyoé, ba ye fe nyoñ e ngabe si ja dañe tyôtyoé. Môt ase a ye nyoñ e jôm *asimba da ye ve nye; mia ye nyoñe ngap aval'ane *meyoñ b'ésoo me né.

⁵⁵ Ve nge mia bo te titane bôt be too si ôsu vienan, e ba ya be be mia ye lik, ba ye bo ane biyo e mise menan été, a ane minsoñe bibaé e mevele mebume menan, ba ye bo besiñe benan e si vôm mia ye tabe.

⁵⁶ A da ye kui na, me bo mia avale me nga tyi'i na ma bo be.