NLAÑANE BÔT 3 - Kalate Zambe Nnomo a Mfefe Mfefé Nkôñelan

Elañe bôt a bisaé bone be Lévi

¹ Mvoñe bôt Aron a Môze, melu Nti a nga kobô Môze e nkôle Sinayi yôp nje nyô.

² Biyôlé bi bone b'Aron: Nadab, ntô, Abiyu, Eléazar a Itamar.

³ Be nga teléban étyi ane betuni, be taté fe mboon ésaé.

⁴ Ve Nadab a Abiyu be nga wu e mise me Nti, e *nkôte si ya Sinayi; be nji ke biaé. Eléazar ba Itamar be nga bo ésaé y'étyi, Aror ésaa wop a too be évet.

⁵ Ane Nti a nga kobô Môze na:

⁶ Lo'one bone be Lévi, a futi be éjôé Arone si be bo ma ésaé.

⁷ Ba ye bo ésaé jap ôsu ya *nda éndelé bendôba'an, be volô'ô Aron a ngume nsamba bôt ôse y'Israél, ba ye bo bisaé bia fombô vôm a n'étyi.

⁸ Ba ye ba'ale biôm mebelan bise ya *nda éndelé bendôba'an a biôme bone b'Israél ba yiane ba'ale.

⁹ Wo ye ve bone b'Israél e b'Aron a bone bé; ba ye veban e be be señe ya bone b'Israél bese.

¹⁰ Wo ye bendé Aron ba be bone bé na, be ba'ale bisaé biabe y'étyi; môt ase a ne nneñ a ye subu bebé vôm a n'étyi, a ye wôéban.

¹¹ Ane Nti a nga kobô Môze na:

¹² Me nyoñeya bone be Lévi Israél été, e señe ya mintôle ya bone b'Israél, ajô te bone b'Israél ba ye bo émbam.

¹³ Amu ntôl ôse wo taté bialé ô ne éñwom; e môse me nga wôé mintôle mise y'Ejipte, ñwô me nga telé mintôle mise y'Israél étyi e mfa'a wom: ataté mi ya bôt a kui mi ya betit, mia ye bo émiam, ma me ne Nti.

Elañe bôt ôsu ya bone be Lévi

¹⁴ Nti a nga kobô Môze e *nkôte si ya Sinayi a jô na:

¹⁵ Lañe bone be Lévi avale menda me bôt a mebume map me né; wo ye lañe befam bese, ataté ngone jia a ke ôsu.

¹⁶ Nde Môze a nga lañe be avale Nti a nga bendé, avale Môze a nga nyoñ abendé.

¹⁷ Biyôlé bi bone be Lévi bi: Gerson, Kehat a Merari.

¹⁸ Bone be Gerson ane mebume map me né:

¹⁹ Amram, Yisehar, Ebroñ a Uziél;

²⁰ bone be mérari ane mebume map me né: Mali a Musi. Mebum me Lévi mme le, ane menda me bôte map me né.

²¹ Mebume Libni a Simeyi ma téé e be Gerson: ajô te be ne mebume ya be Gerson.

²² Ba be nga lañeban, befam bese ataté ngone jia a ke ôsu, be mbe toyini zamgbwa a mintete mitan.

²³ Mebume me Gerson me nga vule minkan e mvuse *tabernakel e mfa'a jôp da dim.

²⁴ Evete jap é mbe Eliasaf e mone Laél.

²⁵ E *nda éndelé bendôba'ane, be nga ve bone be Gerson be ba'ale biôm avale di: *nda été a atan, ébuta'a ja buti *nda ése, éndelé ja tyebe anyiine *nda,

²⁶ biyé asu mimfine ya nseñ; éndelé anyiine ya nseñ; mbôma'ane *tabernakel a nyô ya ata'a metuna'a a minkole mise ya *nda éndelé: mbe be nga yiane ba'ale biôm bite bise.

²⁷ Bone be Amram: Yisehari, Ebroñ a Uziél ba so e be Kehat.

²⁸ Befam bese ataté ngone jia a ke ôsu, be mbe toyini muam a mintete misaman. Be nga bo ésaé ya ba'ale biôm bi n'étyi.

²⁹ Mebume me bone be Kéhat me nga vule minkan e *tabernakel e mfa'a ya nké.

³⁰ Evete jap é mbe Elisafam e mone Uziél.

³¹ Be nga ba'ale éwolo élat, e tawôlô ba beté belet é n'étyi, ébi bifufup, meta'a metuna'a, biôm ba boo bie ésaé e vôm a n'étyi, éyé ya e zañe *tabernakel a biôme bise y'été.

³² Evete bivet e bone be Lévi été é mbe Eléazar e mone Aron Ntuni; a nga bo ésaé ya fombô e ba be mbe be ba'ale'e vôme y'étyi.

³³ Mebume Mali a Musi ma so e bone be Merari.

³⁴ Befam bese be nga lañeban ataté ngone jia a ke ôsu be mbe toyini ésaman a mintete mibaé.

³⁵ Evete jap é mbe Turiél e mone Abihayil. Be nga vule minkan e *tabernakel akôé.

³⁶ Bone be Merari be nga ba'ale mebame ya *tabernakel, mimbôñe mié, mekône mé a metine mé, biôme mebelane bié a biôm bife bise bi tii a *tabernakel.

³⁷ Be nga ba'ale fe mekône ya nseñ mbôma'ane tine jap, mefana'a map a minkole miap.

³⁸ Môze, Aron a bone bé be nga vule minkan ôsu *tabernakel mfa'a jôp da tôô; be nga ba'ale vôme y'étyi e señe bone b'Israél, môt ase a ye ve'ele subu bebé vôm y'étyi te na a ne môte ya *nda bôte betuni a nga ye fo'o wôéban.

³⁹ E bone be Lévi bese Môze a Aron be nga lañ, avale Nti a nga bendé, ane mebume map me né, befam bese ataté ngone jia a ke ôsu, be mbe toyini mewôm mebaé a ébaé.

Nkôtane mintôle mise

⁴⁰ Ane Nti a nga jô Môze na: Lañe mintôle mi ne befam e bone b'Israél été, ataté ngone jia a ke ôsu; éyoñe te wo tili mie e ngume vôm avale biyôlé biap bi né.

⁴¹ Bone be Lévi ba ye bo e mfa'a wome mamien, e señe mintôle mise ya bone b'israél, avale te fe mimbame biyeme miap éjiane mintôle biyem mise mi bone b'Israél.

⁴² Nde Môze a nga lañe mintôle mise ya bone b'Israél avale Nti a nga bendé nye.

⁴³ Mintôle befam be nga lañ, ane môé map me né, ataté ngone jia a ke ôsu, mise mi mbe toyini mewôm mebaé a ébaé, mintete mibaé, mewôme zamgbwa a mila.

⁴⁴ Nde Nti a nga kobô Môze na:

⁴⁵ Nyoñe bone be Lévi éjiane mintôle mise ya bone b'Israél, nalé fe mimbame biyem mi bone be Lévi éjiane ya mimbame miap; bone be Lévi be n'émbam: ma me ne Nti.

⁴⁶ Asu ya kôté mintôle mi bone mintete mibaé, mewôme zamgbwa a mila ya bone b'Israél ba dañe bone be Lévi,

⁴⁷ Wo ye nyoñe bifase bi sikel bitan e nlô ya môt ase. Wo ye nyoñe bie ane sikel ya vôme y'étyi a né, nye a ne begram awôm.

⁴⁸ Eyoñe te wo ye kalan Aron a bone bé moné ate asu ya kôté e tañe bôt bone b'Israél ba dañe bone be Lévi.

⁴⁹ Ane Môze a nga nyoñe moné asu ya kôté e bôte bone be Lévi be nji bo nguleya tyendé.

⁵⁰ A nga nyoñe moné asu mintôle mi bone y'Israél mite, tañe besikel toyini jia, mintete mila, mewôm mesaman a betan, avale sikel ya vôm y'étyi a né.

⁵¹ Eyoñe te a nga kalane nye e mo m'Aron a bone bé avale Nti a nga bendé nye.