NLAÑANE BÔT 28 - Kalate Zambe Nnomo a Mfefe Mfefé Nkôñelan

Biyoñ bi ne ntelan asu metuna'a

¹ Ane Nti a nga kobô Môze na:

² Jô'ô bone b'Israél na: Mia ye bômbô évevé ya ve Nti mimvean mi ne émiam éyoñ ja yian; mimvean mite mi too bidi bia di'ibane nduan, bi too mbamba menyum e be Nti.

³ Wo ye jô be na: Mvean wo di'ibane nduan mia ye liti Nti ñwô wu: *môs ôse, bitoñe mintômba bibaé, bi ntoo mbu wua bi too teke ayeñ asu mimveane ya nnôm éto mi ne ngumba.

⁴ Wo ye ve étoñe ntômba jia mametyé, a ji évok e zañe ngô'é ébaé,

⁵ nalé fe kili avut éla mfu'an a lita mbone jia a étun.

⁶ Mveane ya *môs ôse te wo ye bo avale da ane wu ô nga veban e be Nti e nkôle sinayi, mvean wo di'ibane nduan ô too mbamba menyum.

⁷ Etoñe ntômba ya mametyé ja ye veban a mveane lita woone jia a étun ba ye liti Nti e vôm a n'étyi.

⁸ Etoñe ntômba baa, ja ye veban e be Nti mamengô'é baa be mimvean mi ne fe aval'ane mi ya mametyé; mveane te ô too wu wo di'ibane nduan a mbamba menyum e be Nti.

⁹ E môse Sabat, mia ye ve bitoñe mintômba bibaé bi ne mbu wua teke ayeñ a kili avut ésaman, mfu'an a mbon, nalé fe mveane woon.

¹⁰ Sabat ase mvean ô ne ngumba te wo ye lat a wu ya *môs ôse mfula'an a mveane woone wé.

¹¹ E *môs ôsu ya ngon ése, mia ye ve Nti mimvean mi ne ngumba, mi too avale di: beyôm benya'a bebaé, nnôme ntômba a bitoñ mintômba zamgbwa, bi ne mbu wua a *mvo'é ne selem.

¹² Mvean avut mfu'an a mbon wo ye lat a wu tit ése: ba ye ve nnôme nya'a ase a kili avut ébu, nnôme ntômba a kili avut ésaman.

¹³ A kili avut éla asu étoñe ntômba ése. Nti Emien a ye yene mvaé ya ôtita ya mimveane mite.

¹⁴ Mveane woon wo ye bo lita éla asu nnôme nyak ase, lita ébaé asu nnôm ntômba, a lita jia a étun asu étoñe ntômba ése. Mimvean mia yiane veban e metata'a me ngon ése ya mbu.

¹⁵ Mia ye fe ve Nti nnôm ékela asu metuna'a ya nyoñe *njaman, te lañe mvean ô ne ngumba ya *môs ôse a mveane woone wé.

E mam ma fombô abô'ô Pak

¹⁶ Ngon ôsu ya mbu é too melu awôm a menyin, mia ye jem abô'ô Pak asu Nti.

¹⁷ Abô'ô ya melu zamgbwa da ye taté ngon éte é too melu awôm a metan. Eyoñe te mia ye di belet é too teke mvusan.

¹⁸ Mia ye sulan e *môs ôsu asu ya kañe Nti, te k'ésaé éziñ mia ye bo *môs ôte.

¹⁹ Mia ye ve Nti mimvean mia di'ibane ngumba: beyôm benya'a bebaé, nnôme ntômba wua, a bitoñe mintômba bi ne mbu wua zamgbwa, bese *mvo'é ne selem.

²⁰ Tit ése ja ye veban a mvean avut, mfu'an a mbon, mvean avut kili ébu asu nnôme nya'a ase, kili ésaman asu nnôm ntômba a

²¹ Kili éla asu étoñe ntômba ése.

²² Mia ye ve nnôm ékela asu *njaman abé, nalé ate mia ye bulu e nseme wônan.

²³ Mia ye ve metuna'a mete, te lañe mvean ô ne ngumba ya mametyé, ñwô ô ne mveane ya nnôm éto.

²⁴ Mia ye ve me *môs ôse tañe melu zamgbwa ane bidi ya mimvean mia di'ibane nduan, mi too mbamba ényum e be Nti. Mia ye ve bie, te lañe mimvean mi ne ngumba ya melu mese a mveane woon.

²⁵ E môse zamgbwale, mia ye beta sulan asu ya kañe Nti a mia ye bo teke bo ésaé éziñ é ne ngu.

Abô'ô Pantekôt abô'ô bembômô

²⁶ E môse pantekôt, éyoñe mia ye zu ve Nti fôn a nlisi mi ndôme mane kôan, mia ye sulan asu ya kañe Nti a mia ye bo te bo ésaé éziñe ya bisaé mi wô'ô bo éyoñ ése.

²⁷ Mia ye ve Nti mimvean mi ne ngumba, mi too mbamba menyum e be nye: beyôm benya'a bebaé, nnôme ntômba wua a bitoñ mintômba bi ne mbu wua zamgbwa.

²⁸ Tit ése ba ye ve je a mvean avut, mfu'an a mbon: avut kili ébu asu nnôm nya'a ase, kili ésaman asu nnôme ntômba,

²⁹ a kili éla asu étoñ ése ya bitoñ mintômba zamgbwa.

³⁰ Mia ye fe ve nnôm ékela asu ya bulu nsem.

³¹ Mimvean mite mise mia ye bebe e mvean ô ne ngumba ya *môs ôse yôp, a mveane ya mefup. Betit mia ye ve, ba ye bo *mvo'é ne selem a mimvean mi woon y'été.