NLAÑANE BÔT 26 - Kalate Zambe Nnomo a Mfefe Mfefé Nkôñelan

Mfefé élañe bôt e nkôlane ya nkôte si

¹ Eyoñ ébubua é maneya, Nti a nga jô Môze a Arone na:

² Lañane bôte bese y'Israél ataté mimbu mewôm mebaé a ke osu, avale menda me bôte map me né, ba bese y'Israél be ne nguleya nyoñe menga.

³ Ane Môze a Aron be nga kobô be e minje'ese ya Môab, e nsa'a Yordan, zôsôôô a Yérikô be jô'ô na:

⁴ Bia zu lañe bôt ataté mimbu mewôm mebaé a ke ôsu, avale Nti a nga bendé Môze a bone b'Israél be nga so Ejipte.

⁵ Ruben, ntôle y'Israél. Bone be Ruben ane mebume map me né: Beanokite ba so be Enok; Bepaluite ba so be Palu;

⁶ Beesronite ba so be Esroñ; Bekarmite ba so be Karmi.

⁷ Mebume me Ruben mme le, bôte bese y'été be mbe toyini mewôm menyin a éla, mintete zamgbwa a mewôm mela.

⁸ E mone Palu jôé na Eliab,

⁹ a mbe ésaa Nemuél, Datan a Abiram. Datan a Abiram be mbe benya bôtô ya ékôan é nga tebe Môze ba Aron e ngame yat, be too e ngame Koré, éyoñe be nga ben e njôane Nti.

¹⁰ Eyoñe te si é nga kui anyu a mine baa be Koré, e môse bôte bese be mbe e ngame jé be nga wu, a e môse nduan é nga di'i bevevee be bôte befe mintete mibaé a mewôm metan. Jame te e mbe beta éve'ela'a e be bôte bevok.

¹¹ Ve bone be Koré be nji ke wu éyoñe te.

¹² Ayoñe Siméoñ e mbe mebum avale di: Benemuélite ba so be Nemuél; Beyaminite ba so be Yamin, Beyakinite ba so be Yakin;

¹³ Bezérayite ba so be Zéra; Bekaulite ba so be Kaul.

¹⁴ Mebume me Siméoñ mme le: mese bôte toyini mewôm mebaé a ébaé a mintete mibaé.

¹⁵ Ayoñe Gad e mbe mebum avale di: Besefônite ba so be Sefôn; Beagite ba so be Agi; Bekunite ba so be Kuni;

¹⁶ Beôznite ba so be Ozni; Beerite ba so be Eri;

¹⁷ Bearôdite ba so be Arôd; Beafélite ba so be Aréli.

¹⁸ Mebume me Gad mme le mese bôte toyini mewôm menyin a mintete mitan.

¹⁹ Bone be Yuda: Er a Onan; ve Er a Onan be nga wu e Kanaan.

²⁰ Mebume me Yuda mme ma: Bekélanite ba so be Kéla; Bepérésite ba so be Perés; Bezérayite ba so be Zéra;

²¹ Abume Pérés e bili Beesronite be so'o be Esroñ; Beamulite be so'o be Amul.

²² Mebume me Yuda mme le mese bôte toyini mewôme zamgbwa a ésaman a mintete mitan.

²³ Ayoñe Isakau e mbe e bili mebum avale di: Betolayite be so'o be Tôla: Bepuvite be so'o be Puva;

²⁴ Beyakubite be so'o be Yakub; Bekimrônite be so'o be Kimrôn.

²⁵ Mebume me Isakar mme le: mese bôte toyini mewôme mesaman a ényin a mintete mila.

²⁶ Ayoñe Zabuloñ e mbe e bili mebum avale di: Besérédite be so'o be Séréde; Beelonite be so'o be Elôn; Beyalétite be so'o be Yalél.

²⁷ Mebume me Zabuloñ mme le, mese bôte toyini mewôme mesaman a mintete mitan.

²⁸ Meyoñe me Manasé a Efrayim me mbe me bili e mvoñe Yosef ése.

²⁹ Ayoñe Manasé e mbe mebum avale di: Bemakirit be so'o be Makir a Begaladite be so'o be Galad e mone Makir.

³⁰ Abume Galad e mbe e bili be Yézérite be so'o be Yézér; Beelékite be so'o be Elék;

³¹ Beasriélite be so'o be Asriél; Bekékémite be so'o be Kékém;

³² Bekémidayite be so'o be Kemida; Beeférite be so'o be Efer.

³³ Selôfad, e mone Efer a nji ke biaé monafam ve bobebinga be too môé na: Mala, Nôa, Ogla, Milka a Tirsa.

³⁴ Mebume me Manasé mme le, mese bôte toyini mewôm metan a ébaé a mintete zamgbwa.

³⁵ Ayoñ Efrayim e mbe mebum avale di: Besutalit be so'o be Sutéla; Bebakérite be so'o be Béker; Betahanite be so'o be Tahan.

³⁶ Bone be Sutéla: Beeranite be so'o be Eran.

³⁷ Mebume m'Efrayim mese bôte toyini mewôm mela a ébaé mintete mitan. Mebume ya meyoñe mete mebaé me nga bili mvoñe bôte Yôsep ése.

³⁸ Ayoñe Bényamin e nga bili mebum avale di: Bebélayite be so'o be Béla; Beakebélite be so'o be Akebél; Beahiramite be so'o be Ahiram;

³⁹ Bekufamite be so'o be Kufam; Beufamite be so'o be Ufam.

⁴⁰ Abume Bebélayite é nga bili Beardite be so'o be Arde a Benamanit be so'o be Naaman.

⁴¹ Mebume me Bényamin mme le, mese bôte toyini mewôm menyin a étan a mintete misaman.

⁴² Ayoñe Dañ e nga bili abume da Bekuhamite be so'o be Kuham.

⁴³ Abume te e nga bili bôte toyini mewôm mesaman a ényin a mintete minyin.

⁴⁴ Ayoñe Azér e nga bili mebume avale di: Beimnayite be so'o be Imana; Beikevite be so'o be Ikevi; Beberiayite be so'o be Beria;

⁴⁵ Abume Beberiayite é nga bili Beebérite be so'o be Eber a Bemalkiélit be so'o be Malkiél.

⁴⁶ Azér a nga bili monaminga jôé na Séra.

⁴⁷ Mebume m'Azér mme le mese bôte toyini mewôme metan a éla a mintete minyin.

⁴⁸ Ayoñe Néftali e nga bili mebum ana: Beyasiélite be so'o be Yasiél; Begunite be so'o be Guni;

⁴⁹ Beyésérite be so'o be Yéser; Bekilémite be so'o be Kilém.

⁵⁰ Mebume me Néftali mme le, mese bôte toyini mewôm menyin a étan a mintete minyin.

⁵¹ Bone b'Israél bese be nga lañeban be mbe toyini mintete misaman a jia mintete zamgbwa a mewôm mela.

⁵² Ane Nti a nga jô Môze na:

⁵³ Wo yiane kabe si mebim mebim avale *meyoñ me né:

⁵⁴ ayoñ ese da ye nyoñe ngap aval'ane tañe bôt e nga lañeban é né; ayoñ e bili bôt abui da ye nyoñe si é ne ndam a lôt ayoñ e bili bôte tyôtyoé.

⁵⁵ Ve jame da, akôsa bo ba ye fombô tañe bôt ayoñ ese e bili, nkabane si wo ye boban a mboon *asimba.

⁵⁶ Mboon Asimba wo ye tyik afôla si *meyoñ me n'anen a ma me ne tyôtyoé ma nyoñ.

Ayoñe Lévi da lañeban éyoñe baa

⁵⁷ Be nga lañe mebume ya ayoñe Lévi avale di: Begersonite be so'o be Gerson; Bekehatite be so'o be Kéhat; be Merarite be so'o be Merari.

⁵⁸ Mebume mete me nga bili menda avale di: Belebnite, Beébronite, Bemalit, be Mukite, a Bekoréite. Kéhat a mbe ésaa Amram,

⁵⁹ môt a nga lu'u Yokébéd e ngone Lévi é nga bialé Ejipte. Yokébéd a nga biaé Amram bone belaa: Aron, Môze a Kale jap Miriam.

⁶⁰ Aron émien a nga biaé bone benyin: Nadab, Abiyôn, Eléazar a Itamar.

⁶¹ Ve Nadab a Abiyôn be nga wu éyoñe be nga liti Nti mvean ôlobinda ô ne te yian.

⁶² Bôte bese be nga lañeban a bobefam, ataté ngone jia a lôte valé be mbe toyini mewôm mebaé a éla. Be nji ke lañeban baa be bone b'Israél bevok, amu be nji ke yiane nyoñe ngabe si ane be.

⁶³ E bôte Môze baa Eléazar *ntuni be nga lañ e minje'ese ya Môab, bebé e Yordan, zôsôôô a Yérikô, mbe le.

⁶⁴ Teke'e môte wua ya bôte Môze a Aron *ntuni be nga lañ e *nkôte si ya Sinayi a mbe été,

⁶⁵ Amu Nti a nga taté kate be na, ba ye mane wu e *nkôte si. Ajô te, teke môte wua a nga li'i, veñgeveñge ve Kaléb e mone Yefuné a Yasua e mone Nun.