NLAÑANE BÔT 24 - Kalate Zambe Nnomo a Mfefe Mfefé Nkôñelan

¹ Balam a yene na Nti a nga yene mvaé ya botane Israél nde a nji fe ke jeñe jame ya jô e be Nti aval'ane biyoñe bivok; v'a nga lum asu dé mfa'a ya *nkôte si.

² Ane a nga bete mis a yen Israél a maneya vule minkan avale meyoñe mé me né. Nde Nsisime Zambe ô nga too be nye.

³ Ane a nga tote mejô ya nkulan a jô na: Nkulane mejô Balam, e mone Béor, nkulane mejô môt a yene mam ane me né,

⁴ nkulane mejô môt a wô'ô mejô me Zambe, môt a yen ñyenane ya Nyô a ne ngul'ése, nyô a kute meboñe si a mise mé ma kuiban,

⁵ A Yakob, menda bindelé môé me n'abeñ! Menda môé, a Israél!

⁶ Ma mialan ane atôñe mendim, Ane mefube bidi me ne e fefele beta ôsôé Ane meyañe Nti a nga bé, Ane bilé bi sédre nsa'a ôsôé.

⁷ Mendim ma fuluku e mekobe mé été, a mvoñe jé ja faa *mvo'é amu abui mendim. Njôô bôte wé a dañ Agag, a éjôé jé ja bo bo ngu.

⁸ Zambe a nga vaa nye Ejipte; a bili ngule nyat e mfa'a wé. A mine *meyoñ mese me ne besiñe bé; a bu'u bivese biap, a balé be meveñ a mekoñ m'élaé mé,

⁹ A sômbô si, a a bômbô si ane ngbwengbwem, a aval'ane ayo'o tit, za a ye bo nye na a kôlô si' Môt a botane wo a bo'o ébotan, a biyo'é bi bo'o be nyô ase a yo'é wo.

¹⁰ Ane Balak a nga yaa Balam; nd'a nga kute kôp a jô Balame na: Me nga loone wo na ô yo'é besiñe bam, ve tame yene na ô jaléya be a bibotan tañe biyoñe bilaa.

¹¹ A ntoo éyoñe ji ve tup a ke e jale dôé! Me nga tiñeti na ma ye jalé wo a duma, ve Nti a kamane wo na ô bo te nyoñe bie.

¹² Nde Balam a nga yalane Bala'a na: Ye sa avale bifia di e nde me nga kobô minlôman ô nga lôme ma:

¹³ to'o na Balak a ve ma *nda jé éto njalan a argent a or, me se nguleya té fe'e éziñ é too mvaé nge *abé é too Nti e ngame yat; ve ma ye ba'alan e jame Nti a ye jô'

¹⁴ Eyoñe ji me nga ke e be bôte bam, za'ak ma ye kate wo e jame ayoñe te da ye bo ayoñe bôte dôé melu ma zu.

¹⁵ Ane Balam a nga kobô mejô mé ya nkulan a jô na: Nkulane mejô Balam, e mone Béor, Nkulane mejô ya môt a yene mam ane me né,

¹⁶ Nkulane mejô ya môt a wô'ô nkobô Zambe, nyô *a yem asimesane ya Nyô a dañe yôp, nyô a yene ñyenane ya Nyô a ne ngul'ése, nyô a kute meboñe si a mise mé ma kuiban,

¹⁷ Me lôô nye ve saa éyoñe ji. Ma nye'e me lôô nye ve sa ñhe bebé, Oteté wo so be Yakob, Ntum éjôé wo tebe Israél. A balé mevel me Môab meveñ, a a mane wôé bone be Sét.

¹⁸ A nyoñe si Edom a nyoñe nkôle Séyir, a bone b'Israél ba dañ.

¹⁹ Nyô a so be Yakob a jô'ô ane mben, a wôé *mebuka'a ya tison.

²⁰ Balam a nga yen Amalék, nde a nga jô na: Amalék a ne ayoñ ôsu ya *meyoñ! V'asu'ulan, a ye ke e njañ.

²¹ A nga yene fe Bekénieñ a jô na: Étaba'a jôé é ne ngu a dumba'a dôé e ne akôme yôp.

²² Ve kan a ye bili e minkaba'a mi nduan été. A Asur a ye su'ulane kee wo e minkôm.

²³ A nga tote mejô mefe a jô na: Ngo'é! Za a ye nyiñ mvuse mboone Zambe'

²⁴ Ve besitima ba ye so Kitim. Ba ye tibili Asur, ba ye fe tibili Eber; Nye fe a ye ke e njañ.

²⁵ Ane Balam a nga tebe tetele a bulan e jale dé, Bala'a fe a nga ke e zene jé.