NLAÑANE BÔT 22 - Kalate Zambe Nnomo a Mfefe Mfefé Nkôñelan

Balam

¹ Bone b'Israél be nga kôlô a vule minkane minje'ese mi Môab, e yordane yat, zôsôôô a Yérikô.

² Balak e mone Tipor, a nga yene mam mese Israél a nga bo Beamorééñ.

³ A Môab a nga dañe ko woñ amu ézu'u bôte y'Israél; nde Môab a nga dañe nyeñeban asu bone b'Israél.

⁴ Nde Môab a nga jô bemvendé ya Madiane na: Ézu'u bôte ji ja ye mane nyoñe jôm ése ja bômane bia, aval'ane benyak ba di bilo'o ya afôla éziñ. Balak e mone Tipor a mbe njô bôte ya Môab melu mete.

⁵ Nd'a nga lôme minlôman e be Balam, e mone Béor, a too e si jé Pétor, bebé a Yordan be loone nye a jô nye na: Ô lôô bôte be nga so Ejipte ba, be yianeya si ése. Be zuya tabe bebé vôme wom.

⁶ Ajô te za'a volô ma, ma ye'elane wo, ô yo'é ma be, amu be ne ngu a dañe bia, ndô'ôtô ma ye bo nguleya bôé be a titane be si jam, amu ma yeme na môt ase wo botane nye, a bili fo'o ébotan, a na, môt ase wo yo'é, a ye fo'o yo'éban.

⁷ Nde bemvendé ya Môab a bemvendé ya Madian be nga ke be bili mimvean asu Balam. Eyoñe be kuiya e be Balam, be nga kate nye mejô me Balak.

⁸ Nde Balam a nga yalane be na: Bômba'ane va a kui tyé, éyoñe te ma ye yalane mia aval'ése Nti a ye jô ma. Nde bivete ya Môab bi nga tabe e be Balam.

⁹ Nde Zambe a nga zu e be Balam a jô nye na: Beza be ne e be wo ba'

¹⁰ Balam a nga yalane Zambe na: Balak, e mone Tipor, njôô bôte ya Môab a lômeya be be jô ma na:

¹¹ tame yene bôt ba so Ejipte ba a mbe be yianeya si: za'a yo'é me be: ma buni na éyoñe te ma ye bôé be a titane be.

¹² Nde Zambe a nga jô Balame na: Woo ye ke ke e nsamba wop; nalé fe woo ye ke yo'é bôte bete, amu be ne njalan a ébotan.

¹³ Mametyé Balam a nga kôlô si a jô bivete bi Bala'a na: Kelan ôsu amu Nti a nji kañese na bia be mia bi ke nsamba.

¹⁴ Ane bivete ya Môab bi nga kôlô a bulan e be Balak a jô nye na: Balam a bene zu e nsamba wongan.

¹⁵ Ane Balak a nga beta lôme bivet bi too abui, a beta minkôñ a lôte bi ya ôsu.

¹⁶ Nde bi nga kui e be Balam a jô nye na: Avale di Balak e mone Tipor a jô na: Môt a bo'o te beta kamane wo na ô zu be ma;

¹⁷ amu ma ye ve wo duma ese da yian, ma ye fe bo e jam ése wo ye jô ma: za'ak, ma ye'elane wo, a yo'é ma e bôte ba.

¹⁸ Nde Balam a nga yalan a jô bebo bisaé be Bala'a na: To'o na Balak a ve ma *nda jé é too njalan a argent a or, me se nguleya bo mone jam nge beta jam e too di da wosane Nti e Zambe wom.

¹⁹ Eyoñe ji, ma ye'elane mia na, mi tabe fe vana alu di, éyoñe te ma ye yem e jame Nti a ye beta jô ma.

²⁰ Ane Zambe a nga zu e be Balam a alu a jô nye na: Amu bôte ba ba te zu loone wo, kôlô'ô si mia be be mi ke; ve wo ye bo e jam ma ye jô wo;

²¹ mametyé, Balam a nga kôlô si, a dañ éjakas a ke e nsamba bivete ya Môab.

²² Ane Zambe a nga yaa amu a nga ke, nde éngele Nti a nga tebe nye ôsu zene yôp. Balam a nga too éjakase jé yôp a bebo bisaé bé bebaé.

²³ Eyoñ éjakas é nga yen éngele Nti a tele zene yôp a bili nsoé nkpwaté mekôn e wo, nde éjakas é nga kôlô zene yôp, a yale mefube bidi. Ane Balam a nga bibi éjakase na é suane *zen.

²⁴ Engele Nti a nga tebe ôsu *zen, e zañe mefube mindi'i mi woon: nka'alé ô too li a li;

²⁵ Eyoñ éjakas é nga yen éngele Nti, nd'é nga vutane mfin a tibi abo Balam e mfin, nde Balam a nga beta bibi je.

²⁶ Engele Nti a nga ke ôbe ôyap a tebe vôm a mbe ôfanefan teke afôla ya beta kôñelan e mbo nnôm nge e mbo ngal.

²⁷ Eyoñ éjakas é nga yen éngele Nti é nga ku Balame yôp. Eyoñe te Balam a nga dañe yaa, nd'a nga bôm éjakas a e ntume wé.

²⁸ Ane Nti a nga kui éjakas anyu, nd'é nga jô Balame na: Ma te bo wo jé ane wo bôme ma ndiñga éla'

²⁹ Balam a nga yalan éjakase na: Amu wo kolé ma ôbak; nge ma bili nkpwaté mekôn ve me wôéya wo éyoñ ébiene ji.

³⁰ Nd'éjakas é nga jô Balame na: Ye me nji bo éjakase jôé, ô dañeya yôp biyoñ bise azukui môse wu? Ye me wô'ô tame bo wo nalé? Balame na: Momo!

³¹ Ane Nti a nga kui Balame mis: nd'a nga yen éngele Nti a tele zene yôp, nsoé nkpwaté mekôn ô too nye wo; ane Balam a nga vitibi, a kumbu asu e butu si.

³² Nde éngele Nti a nga jô nye na: Amu je ô bômeya éjakase jôé biyoñe bilaa? O lôô me ne nsoone ya tebe wo e ngame yat, amu e *zen é ne wo ôsu ja kee wo e njañ.

³³ Ejakas ja te yene ma a sa'ale ma biyoñe bilaa. Nge é nji ke ye sa'ale ma, ve me wôéya wo a jô'é je vevee.

³⁴ Ane Balam a nga jô éngele Nti na: Me boya *abé, amu me nji ke yeme na ô tele ma ôsu; éyoñe ji nge ma bo *abé e mise môé, ma ye bulane mvus.

³⁵ Nde éngele Nti a nga jô Balame na: Mia be bôte bete kelan; ve da na, wo ye bo ve ba'alane mejô ma ye jô wo. Ane Balam ba be bivete bi Balak be nga ke.

Balam baa Balak ba tôban

³⁶ Eyoñe Balak a wô'ôya na Balam a soya, ane a nga ke tôbane nye, a kui tisone Môab é ne aku'u nné ôsôé Arnon.

³⁷ Nde Balak a nga jô Balame na: Ye me nji lôme bôte be wo na be loone wo? Amu jé ô nji zu be ma? Ye me nji bo nguleya belane wo a abui duma'

³⁸ Balam a nga yalane Bala'a na: Éyoñe ji me ne be wo, za jam afe me beta jô? Ma ye kobô mejô Zambe a ye futi anyu dam.

³⁹ Nde Balam ba Balak be nga ke, ane be nga kui Kiryat-Ukôt.

⁴⁰ Ane Balak a nga tyi'i beta biyem, a bone biyem nde fe a nga lôme Balam a bivete ba be be be nga too ngap.

⁴¹ Mametyé, Balak a nga nyoñe Balam a bete nye e Bamôt-Bal, vôm a mbe nguleya yen éfase bôte y'Israél.