NLAÑANE BÔT 2 - Kalate Zambe Nnomo a Mfefe Mfefé Nkôñelan

Mvulane minkan

¹ Nti a nga kobô Môze ba Aron na:

² Bone b'Israél ba ye vule minkan môt ase e mfôme nlinga bita wé ô né, e minlinga ya menda me bôte mabe si; ba ye vule minkan, mbôma'ane bebé a *nda éndelé bendôba'ane.

³ Ba ba ye vule minkan e mfa'a jôp da tôô, ba ye tabe e nlinga ayoñe Yuda si a nkane bita wé. Evete ya Yuda é ne Nason e mone Aminadab.

⁴ Nkane bita wé ô bili bôt be ne nlañan toyini mewôme zamgbwa a mintete misaman.

⁵ Evete jap é ne Netaniél e mone Suar.

⁶ Nkane bita wé ô bili bôt be ne nlañan toyini mewôm metan a ényin a bôte mintete minyin.

⁷ Bone be Zabuloñ mbe ba ye tôñe valé. Evete jap é ne Eliab e mone Elôn.

⁸ Nkane bita wé ô bili bôt be ne nlañan toyini mewôm metan a zamgbwa a mintete minyin.

⁹ Bôte bese ba ye tabe e nlinga Yuda si, be too nlañan ane *minsamba mewosan miap mi né, be ne toyini ntet a mewôme muam a ésaman a mintete minyin, mbe ba ye taté téé dulu.

¹⁰ Nlinga bita Ruben wo ye teléban e mfa'a ya nké. Evete bone be Ruben é ne Elisur e mone Sédéur.

¹¹ Nsamba mewosane wé ô bili bôt be ne nlañan toyini mewôm menyin a ésaman a mintete mitan.

¹² Bone be Siméoñ ba ye vule minkan e fefele jé. Evete jap é ne Selumiél e mone Surisadayi;

¹³ nkane bita wé ô bili bôt be ne nlañan toyini mewôm metan a ébu a mintete mila.

¹⁴ Bone be Gad ba ye tôñ valé. Evete jap é n'Elisaf e mone Réuél.

¹⁵ Nkane bita wé ô bili bôt be ne nlañan toyini mewôm menyin a étan, mintete misaman a mewôm metan.

¹⁶ Bôte bese be ne nlañan ba ye tabe e nlinga Rubene si be ne toyini mewôme metan a jia, mintete minyin a mewôm metan. Ba ye téé dulu e nsamba baa.

¹⁷ Nda éndelé bendôba'ane ja ye téé dulu nsamba bone be Lévi ô too ézezañe ya mi mi bôte bevok. Avale minsamba mi ne nta'an, avale te mia ye téé dulu, môt ase été jé, môt ase a tôñe fe nlinga wé.

¹⁸ Nlinga Efrayim wo ye tebe mfa'a jôp da dim a minsamba mewosane mié. Evete bone b'Efrayim é ne Elisama e mone Amihud.

¹⁹ Nkane bita wé ô bili bôt be ne nlañan toyini mewôm menyin a mintete mitan.

²⁰ Bone be Manasé ba Vule minkan e fefele jap. Evete jap é ne Gamliél e mone Pédasur.

²¹ Nkane bita wé ô bili bôt be ne nlañan toyini mewôm mela a ébaé a mintete mibaé.

²² Bone be Bényamin ba ye tôñe valé. Evete jap é ne Abidan e mone Gidéôni.

²³ Nkane bita wé ô bili bôte be ne nlañan toyini mewôm mela a étan a mintete minyin.

²⁴ Bôte bese be ne nlañan be too e nlinga bita Efrayime si be ne toyini ntet a muam a ntete wua. Ba ye téé dulu e nsamba lale.

²⁵ Nlinga Dan wo ye tebe mfa'a y'akôé a minsamba mewosane mié. Evete bone be Dan é ne Ahiézer e mone Amisadayi.

²⁶ Nkane bita wé ô bili bôt be ne nlañan toyini mewôm mesaman a ébaé a mintete zamgbwa.

²⁷ Bone b'Azér ba ye vule minkan e fefele jap. Evete jap é ne Pagiél e mone Okrañ.

²⁸ Nkane bita wé ô bili bôte toyini mewôm menyin a jia a mintete mitan.

²⁹ Bone be Néftali ba ye tôñe valé. Evete jap é ne Ahira e mone Enan.

³⁰ Nkane bita wé ô bili bôt be ne nlañan toyini mewôm metan a éla a mintete minyin.

³¹ Bôte bese ya minkane mi Dañ be ne nlañan be ne toyini ntet a mewôm metan a zamgbwa a mintete misaman. Mbe ba ye su'ulane téé dulu a minlinga miap.

³² Bôt be nga lañeban e be bone b'Israél, avale menda me bôt me né, mbe le. Ba bese be nga lañeban a vule minkan, ane *minsamba mewosan mi né, be mbe toyini mewôm mesaman a éla, mintete mitan a mewôm metan.

³³ Bone be Lévi be nji ke lañeban e bone b'Israél été, avale Nti a nga bendé Môze.

³⁴ Bone b'Israél be nga wulu e *zôsôô e mebendé Nti a nga bendé Môze été. Ajô te be nga vule minkan e minlinga miabe si; ajô te be nga téé dulu môt ase e mvus ayoñe dé a bôte ya *nda jé.