NLAÑANE BÔT 19 - Kalate Zambe Nnomo a Mfefe Mfefé Nkôñelan

Evele nyak; mendim ma fubu

¹ Ane Nti a nga kobô Môze baa Arone na:

² Njôan ya atiñe Nti a nga ve ñwô wuna na: Kobô'ô bone b'Israél na, be zuu évele ngale nyak, é too *mvo'é ne selem, teke ayeñ, é ngenan te be'e mbe'e.

³ Mia ye kalane je Eléazar *ntuni, nye ki a ye ku'i je e minkan atan, a ba ye tyi'i je ôsu vié.

⁴ Eléazar Ntuni a ye nyoñe metyi ya ngale nya'ate a ônyu éyoñe te a miame me biyoñe zamgbwa ôsu *nda éndelé bendôba'ane.

⁵ Ba ye mane di'i nyak mise mé me lôô. Ba ye di'i ékôbe jé, minsône mié a metyi mé a mebi mé.

⁶ Ntuni a ye nyoñe nja'a élé sédre, élé izôp a évele nsinga a wua bie ézezañe nkaba'a nduan wo di'i nyak.

⁷ Ntuni a ye sôbe mengômesane mé a wo'o nyôle jé mendim; éyoñe te a ye bulane minkan, ve a ye tabe te *mfuban a kui mamengô'é.

⁸ Môt a ye di'i nyak a ye sôbe mengômesane mé a mendim a wobane fe mendim, a a ye tabe te *mfuban akekui mamengô'é.

⁹ E môt a ne *mfuban a ye kôane asube ya nyak a kee de e minkan atan, e vôm a ne mfuban; ba ye ba'ale asube te asu ékôane mendim ma wosane mvin. Metuna'a ya *njaman abé le.

¹⁰ Môt a te kôane asube ya nyak a ye sôbe mengômesane mé a a ye tabe te *mfuban a kui mamengô'é. Njôane ya nnôm éto ñwô le asu bone b'Israél, asu *ntabe a too be zañ.

¹¹ Môt a nnambe mbim, avale mbim ese, a ye tabe te *mfuban tañe melu zamgbwa.

¹² A ye tun émien a mendim mete e môse lale a e môse zamgbwale, éyoñe te a ye bo *mfuban. Ve nge a bo te tuneban ataté môse lale a e zamgbwale, aa ye ke bo *mfuban.

¹³ Môt ase a ye nnambe mbim ve teke tun émien, a ve *tabernakel Nti mvin, ba ye vaa môt ate Israél été; amu be nji ke miame nye mendim ma wosane mvin, a mvine jé é ngenan e be nye.

¹⁴ Atiñ nde di: Nge môt a wu e *nda éndelé été môt éziñ a too été, môt ate a ye be'e mvin tañe melu zamgbwa;

¹⁵ élaba'a ése é yoo teke ébuta'a été ja ye bo te *mfuban.

¹⁶ Môt ase a ye nnambe môt a te wu nkpwaté mekôn e nlame mvus, nge nnambe mbim, bivese bi môt nge soñ, môt ate a ye tabe tee *mfuban tañe melu zamgbwa.

¹⁷ Asu môt a ne tee *mfuban, ba ye nyoñ asub asu étyi'a ya *njaman abé é nga di'iban, a fulane de a benya mendim élaba'a éziñ été.

¹⁸ Môt a ne *mfuban a ye nyoñ abusa izôp a dube de mendim; éyoñe te a ye miame me e *nda éndelé, e bilaba'a bise, e be bôte bese be ne valé, e be môt a nnambe bivese bi môt, e môte be nga wôé, mbim nge avus.

¹⁹ Môt a ne *mfuban nye a ye miame mendime mete e be môt a ne tee mfuban; a ye bo jame te e môse lale a e môse zamgbwale, a a ye fubu nye e môse zamgbwale. A ye sôbe mengômesane mé a wobane mendim; wôna mamengô'é, a ye bo *mfuban.

²⁰ Môt a nji bo *mfuban a a nji tuneban, ba ye vaa nye ékôane bôt été, amu a maneya ndaman étyi ya vôme Nti a n'étyi; amu be nji ke sôé nye mendim ma wosane mvin, nde a ne mvin.

²¹ Njôane ya nnôm éto e mfa'a wop ñwô le. Môt a miame mendim ma wosane mvin a ye bo tee *mfuban a kui mamengô'é.

²² Jôm ése môt a ne te *mfuban a nnambe é ntoo te *mfuban a môt a nnambe nye a ye bo te *mfuban a kui mamengô'é.