NLAÑANE BÔT 18 - Kalate Zambe Nnomo a Mfefe Mfefé Nkôñelan

Bisaé a mengap ma yiane betuni a bone be Lévi

¹ Nti a nga jô Arone na: Womien, bone bôé a *nda bôte jôé, mia ye be'e adite ya ékob ése é ne boban e *nda é n'étyi été: womien a bone bôé mia ye be'e adite ya ékob ése é ne boban ésaé betuni jenan.

² Mia be bobenyoñ za'an, mvô'ô Lévi, ayoñ ésoo, nalé ba ye bo nlatan a wo a volô wo ésaé ôsu ya *nda éndelé é bili éwolo élat.

³ Ba ye ba'ale mebendé môé a ba'ale *nda éndelé ése; ve ba ye bo te subu bebé a biôme mebelan bi n'étyi, nge subu bebé ata'a metuna'a, mia be be mi zaa wu.

⁴ Ba ye ba'abe a wo, a ba ye ba'ale *nda éndelé bendôba'an asu ésaé ése y'été. Te ke nneñ éziñ a ye zu mia bebé.

⁵ Mia ye ba'ale vôme y'étyi a ata'a metuna'a, éyoñe te ayaa Nti da ye bo te beta kui e be bone b'Israél.

⁶ O lôô, me nyoñeya bobenyoñ, bone be Lévi, ézezañe ya bone b'Israél, Amu be ne mvean e be Nti, nde be vebaneya be mia asu ya bo ésaé ya *nda éndelé bendôba'ane.

⁷ Womien a bone bôé, mia ye ba'ale bisaé ya éto betuni jenan asu jam ese da fombô ata'a metuna'a, a jôm ése é ne e *nda été, éndelé ya zañe yat, mia ye bo ésaé y'été. Esaé betuni jenan é ne e ji me veya mia. Nneñ ase a ye subu bebé a ye wôéban.

⁸ Ane Nti a nga jô Arone na: Ô lôô, me veya wo ô ba'ale mimvean mia veban asu dam, ma ve mie e be wo a bone bôé, nalé fe jôm ése bone b'Israél ba telé étyi, bi ne mia mveban amu mi ne *ñwo'one mbon, a jame te e ntoo njôan ya nnôm éto.

⁹ E ngabe jôé nyô, ézezañe ya biôme bia dañ étyi bi ne te di'ibane nduan; mimveane miabe mise, mimveane ya avut mise, metuna'a mabe ya *njaman abé mese, a metuna'a ya mmeman *abé ba ye ve ma; biôm bia dañ étyi bite bia ye bo émbiôé a bi bone bôé.

¹⁰ Wo ye di bie aval'ane biôme bia dañ étyi; fam ése ja ye di bie; bi ne biôm bi n'étyi mfa'a wôé.

¹¹ E ngabe jôé fe nyô: jôm ba kandé e mimvean ya bone b'Israél ô laté a jôm ése ba ye ve a mboone jame ya telé jôme te étyi mfa'a Nti, ma ve wo bie a bone bôé be ne befam a bobebinga bôé, jame te e too atiñe ya nnôm éto. Môt ase a ne *mfuban e *nda jôé, a ye di bie.

¹² Ma ve wo *bembômô ba ye ve Nti; jôm ése ja dañe mvaé e mimbon, ji ése ja dañe mvaé e mfefé woon a fôn.

¹³ Bembômô bibuma ya si ba ye zu ve Nti ba ye bo émbôé. Môt ase a ye bo *mfuban e *nda jôé a ye di be.

¹⁴ Jôm ése é ne ntiñetan e be Nti Israél été, ja ye bo énjôé.

¹⁵ Ntôle ya nsôn ôse ba ye ve Nti, bôt a betit, wo ye bo éñwôé, ve wo ye nyoñe ngôtô ya ntôl ôse ya môt, nalé fe ngôtô ya ntôle ya tit é nji bo *mfuban.

¹⁶ E tañe ja kôté mie, wo ye nyoñe je ataté éyoñe ntôl ô ntoo ngone jia. Avale womien wo ye yen, tañ éte ja ye bo besikel be argent betan, avale sikel vôme y'étyi a né, nalé a ne na begram awôm.

¹⁷ Ve wo ye bo te nyoñe ngôtô asu mon ôsu nyak ja taté biaé, nge nyô ngale ntômba a taté biaé, nge nyô ngal ékela a taté biaé: amu *bityi'a bi n'étyi mbie le. Wo ye miame metyi mabe ata'a metuna'a yôp a di'i avoñe dap ane mimvean mia di'ibane nduan mi too mbamba ényum e be Nti.

¹⁸ Minsône miap mia ye bo émiôé avale fe ane ôngôn ba telé étyi, a aval'ane énam *abé ya mbo nnôm.

¹⁹ Ma ve ataté womien, bobefame bôé a kui bobebinga bôé, ane njôane ya nnôm éto, e jôm ése bone b'Israél ba ye kandé e mimveane miap mi n'étyi ba ve Nti. Elate te é ne ji é ne tek'atyamé nnôm éto mfa'a Nti, asu dôé a mvoñe bôte jôé.

²⁰ Ane Nti a nga jô Arone na: Wo ye bo teke ngap e si jap, a wo ye bo te bi ngap e zañe jap; ma me ne ngabe jôé a éli'i jôé e zañe bone b'Israél.

²¹ Eli'i ma ve bone be Lévi Israél été, é ne *ngab awômô ése, ma'ane ya ésaé ba bo, ésaé ya *nda éndelé bendôba'ane.

²² Bone b'Israél ba ye bo te beta subu bebé a *nda éndelé bendôba'ane, be za be'e mbe'e ya *abé éziñ a wu.

²³ Bone be Lévi ba ye bo ésaé ya *nda éndelé bendôba'ane, a ba ye be'e adite ya ékobe jap. Njôane wu ô ne wu ya nnôm éto e miaé mienan mise; ba ye bo te nyoñ élik ézezañe bone b'Israél.

²⁴ Eli'i ma ve bone be Lévi é ne mengab awômô bone b'Israél ba ye vaa asu Nti; ajô te me nga jô ajô dabe na: Ba ye bo te k'élik e zañe bone b'Israél.

²⁵ Ane Nti a nga kobô Môze a jô na:

²⁶ Wo ye kobô bone be Lévi a jô be na: Éyoñe mia ye nyoñe *ngab awômô e be bone b'Israél, nje ma ve mia ane élik é so'o be be, mia ye kandé mvean asu Nti, *ngab awômô ya ngab awômô;

²⁷ a jôme mia kandé te, ja ye lañebane mia ane fôn ba vaa afup a aval'ane njalane fandé woon ba vaa e vôm ba miate bibuma.

²⁸ Avale te nde mia fe mia ye kandé mvean asu Nti ô so'o e mengab awômô mia nyoñ e be bone b'Israél, a mia ye kee Aron *ntuni mvean mia te kandé asu Nti.

²⁹ E mimvean mise ba ye ve mia, mia ye kandé ngab éziñ asu Nti; e mfa'a ya jôm ése é n'abeñ, mia ye kandé ngab é ne ntelan étyi.

³⁰ Wo ye jô be na: Éyoñe mi kandéya ngabe ja dañe mvaé, *ngab awômô ja ye lañeban e mfa'a bone be Lévi aval'ane nkôane bidi ya mefup, a aval'ane nkôane mendim bibuma.

³¹ Mia ye di *ngab awômô éte e vôm éziñ mia be bôte ya *nda bôte jôé; amu e ma'ane menane le, mvolane ya ésaé mia bo e *nda éndelé bendôba'ane.

³² Teke *abé éziñ da ye nnambe mia éyoñe mi maneya kandé e ngap ja dañe mvaé, mi nji ke ndaman étyi ya mimveane mi bone b'Israél mi n'étyi, a mia ye bo teke wu.