NLAÑANE BÔT 16 - Kalate Zambe Nnomo a Mfefe Mfefé Nkôñelan

Ayaa e be bone be Koré

¹ Koré e mone Yisehar, ndaé Kehat, ndile Lévi, ba Datan a Abiram e mone Eliab, Oron e mone Pélét, belale be too e bone be Ruben,

² be nga bôndé fe'e ya wosane Môze ba be bôte mintete mitan a mewôm metane ya bone b'Israél, bivete ya bôt, ba be mbe be za'ak e bikôan be too bôte ya duma.

³ Nde be nga sulane vôme wua na be tebe Môze a Aron e ngame yat a jô be na: Abime mboone te e yianeya! Kee bôte bese be n'étyi a Nti a too fe ézezañe jap, amu jé mi mia bete miabebiene yôp a dañe ngum ayoñ Israél ôse'

⁴ Eyoñe Môze a nga wô'ô nkobô te, a nga ku asu e buti si.

⁵ Nde a nga kobô Koré a nsamba bôte wé ôse na: A akiti mametyé, Nti a ye liti e môt a n'éñwé a e môt a n'étyi, a a ye zuu môt ate bebé b'Emien. A ye bo na e môt ase Emien a ye top, môt ate a ye subu nye bebé.

⁶ Bo'on avale di: nyoñane da'a, Koré a nsamba bôte wé ôse,

⁷ a akiti futa'ane nduan a ôlobinda e da'a été, Nti Emien a lôô: e môte Nti Emien a ye top nye a ye bo étyi. Amu mboone wu ô lôteya nné, a bone be Lévi!

⁸ Nde Môze a nga jô Koré na: Vô'ôla'an a mia bone be Lévi!

⁹ Ye e ne mone jame na Zambe y'Israél a nga telé mia e fefel ékôane bôt ése y'Israél, a bo na mi subu nye bebé asu ya belane mia ésaé ya *tabernakel Nti, a telé mia ôsu ya bôte na mi ba'ale be'

¹⁰ A nga bo na mi subu nye bebé, wo a bobenyoñe bese, bone be Lévi a wo, v'éyoñe ji mi nga sili fe ésaé betuni!

¹¹ A amu ajô te nde wo, a nsamba ôse mia bo ngame ya wosane Nti! Za a ne Oron ane mia kobô nye *abé menyiñ'

¹² Ane Môze a nga lôme bôt be ke loone Datan, Oran, Abiram, bone b'Eliab. Be nga yalane na: Bi se nguleya zu!

¹³ Ye e ne mone jame na wo vaa bia si e vôme menyañ a wôé bia len asu ya zu mane jaa bia e *nkôte si va? Ye wo ye ke ôsu a jôô bia'

¹⁴ Ô nji ke nyiñeli bia e si menyañ a wôé bia len, sa ke mefube bidi a mefube mindi'i mi woon mme ô nga ve bia ane ngab. Ye wo buni na e bôte ba be ne mindindim? Ajô te bia ye bo teke zu'

¹⁵ Ajô te Môze a nga dañe wô'ôlun a jô Nti na: Te fombô mveane wop. Me nji nyoñe be to'o v'éjakase jia a, me nji ke bo môt éziñ y'été *abé.

¹⁶ Ane Môze a nga jô Koré na: Womien a nsamba bôte wôé ôse, za'an asu be Nti a akiti mia b'Aron.

¹⁷ Môt ase ya be mia a ye nyoñ ésua ôtu wé a futi ôlobinda été, éyoñe te môt ase ya be mia a ye zuu ésua ôtu wé asu be Nti. Bisua bi ôtu bise bia ye bo mintete mibaé a mewôm metan; mia Arone fe mia ye nyoñ, môt ase, ésua ôtu jé.

¹⁸ Nde be nga nyoñ, môt ase, ésua ôtu jé, be nga futi nduan été, be tele fe mende'e m'ôlobinda e bisua été, ane baa be Môze a Aron be nga tebe anyiine *nda éndelé bendôba'an. Nde étôto'o Nti é nga faé e b'ékôane bôt ése.

¹⁹ Ane Koré a nga sulane bôte bese be tebe be ngame yat anyiine *nda éndelé bendôba'ane. Nde étôto'o Nti é nga faé e b'ékôane bôt ése.

²⁰ Ane Nti a nga kobô Môze a Arone na:

²¹ Kôla'an ézezañe ya bôte bana été, a ma ye jiane be éyoñe jijia.

²² Nde be nga ku mesu me butu si a jô na: A Zambe, wo ô nga ve ényiñ e be minsisime ya avale nsôn ése! Ye wo yaa ékôane bôt ése amu *abé ya môte wua'

²³ Nde Nti a nga kobô Môze na:

²⁴ Kobô'ô ékôane bôte na: Kôla'an a mialane mevôm mese, ôyap a étaba'a Koré, Datan a Abiram.

²⁵ Ane Môze a nga kôlô si a ke e be Datan a Abiram; bemvendé y'Israél fe be nga tôñe nye mvus.

²⁶ Nde a nga kobô ékôane bôte na: Kelan ôyap a menda bindelé minkpwala bi bôte mi a te nnambane jôm éziñ é n'énjap, mi za wu ébamane ya *abé dap.

²⁷ Ane be nga mialan e mevôm mese, ôyap a *nda Koré, Datan a Abiram. Datan a Abiram be nga kui atan a tebe anyiine menda bindelé map, ba be e binga bap, bone bap a bendaé bap.

²⁸ Ane Môze a nga jô na: Jame di nde mia ye yeme na Nti nye a nga lôme ma na me bo e mam mese ma, a na, me nji bo jam éziñ é so'o be mamien.

²⁹ Nge bôte ba be wui ane bôte bese ba wu, nge ba tôban e mam bôte bese ba tôbane me, wôna saake Nti nye a nga lôme ma;

³⁰ Ve nge Nti a bo mfefé jam, nge si ja kui anyu dé a mine be a biôme biabe bise, a sise vôme ya miñwuan bevevee, éyoñe te nje mia ye yeme na Nti nye e bôte ba be maneya soñe na a yaa.

³¹ Mejô mete me ngenan te mane nye anyu, nde si vôm be nga tele é nga salé.

³² Nde é nga yoé anyu dé a mine be, bebien, menda map, a bôte be Koré bese a akume dab ese.

³³ Be nga ke vôme ya miñwuan bevevee, bebien a jôm ése é mbe énjap; ane si é nga buti be a be nga jañ ézezañ ékôane bôt.

³⁴ Israél ase a nga bômane be éyoñe a nga wô'ô ñyône wop, a nga tup, a jô'ô na: Si é za fe mine bia!

³⁵ Ane nduan é nga so be Nti a mane di'i e bôte mintete mibaé, mewôm metan be nga liti ôlobinda e bisua bi ôtu été.