NLAÑANE BÔT 15 - Kalate Zambe Nnomo a Mfefe Mfefé Nkôñelan

Minye'elan asu mimvean avut a mimbon

¹ Ane Nti a nga kobô Môze a jô na:

² Kobô'ô bone b'Israél, a jô be na: Éyoñe mia ye kui e si ma ve mia na mi lôñe bitaba'a bienan,

³ a mia ye ve Nti mimvean mia di'ibane nduan, mi too mimvean mia di'ibane ngumba, nge mimvean ba ve asu ya tôé *atiñ, nge mvean ane *nlem wo kômbô, nge na e mebô'ô menan été, asu ya kulu jôm é ne mbamba menyum e be Nti, é so'o e beta mimbam nge bone mimbame biyeme bienan été,

⁴ môt a bo Nti mimveane mié, a ye fe zuu kili avut éla, mfu'an a lita mbone jia a étun,

⁵ a lita woone jia a étun asu mone ntômba ase a veban e mimvean mi ne ngumba, nge mimvean asu nlatane ngbwa.

⁶ Nge étyi'a é ne nnôme ntômba, ba ye zuu fe kili avut ésaman, mfu'an a lita mbon ébaé,

⁷ a lita woon ébaé; ma ye nye'e mbamba ényume ya ôtita y'été.

⁸ Nge nnôme nyak nye ba ve asu mimvean mi ne ngumba, nge mimvean asu nlatane ngbwa, asu ya tôé *atiñ, nge asu ya te ngume jam,

⁹ ba ye zuu fe kili avut ébu, mfu'an a lita mbon éla,

¹⁰ a lita woon éla: ma ye nye'e mbamba ényume ya ôtita y'été.

¹¹ Avale te da yiane boban éyoñ étyi'a é ne nnôme nyak, nnôme ntômba, étoñe ntômba nge étoñ ékela.

¹² E tañe betit ése mia ye ve, mia ye baman tit ése y'été a mimvean avut mi ne njôan.

¹³ Bone b'Israél bese ba ye tôñe minjôane mite éyoñ ba ye ve ma mimvean mi ôtita ô ne mbamba menyum.

¹⁴ Beyeñ be too be mia nté éziñ e si jenan, nge ba menda me bôte map me tabeya miaé miaé, mia be be bese mia ye tôñ avale minjôane da nge ba kômbô ve ma mimvean mi ôtita ô ne mbamba menyum.

¹⁵ Miñye'elan mia ye bo avale da asu bôte bese, asu mia bone b'Israél a asu beyeñ, a miaé mise mia ye bo miñye'elane mite ésaé. Ma Nti, ma belane bone b'Israél avale da fe ane beyeñ:

¹⁶ metiñ a miñye'elan bi ne avale da asu denan a asu dap.

¹⁷ Ane Nti a nga jô Môze na:

¹⁸ A kalane bone b'Israél minjôane mi: éyoñ mia ye nyiin e si ma kee mia

¹⁹ a di bidi ya vôm ate, mia ye vaa ngab éziñ a ve me je.

²⁰ Mia ye yame mon éwôlé ya mimvean a ébañ avut be ndôme mane fuk, mia ye zuu ma je ane ba zuu mveane mefes, éyoñ be ndôme mane tya'a nlisi.

²¹ Ajô te mia ye ve ma éwôlé ôsu mia ye taté yam. Nye'elane wu ô ne fe asu miaé mise mia zu.

²² Nge mia kop e mfu'an a bo te ba'ale mebendé mete mese mme Nti a nga ve Môze,

²³ mam mese Nti a nga bendé mia a Môze, ataté môse Nti a nga ve Môze mebendé, a kui miaé mienan mi nga tôñe mvus;

²⁴ nge mbia mboon a nga yené e mfu'an, bôte bese te yeme mboone te; ékôane bôt ése ja ye ve étoñe nnôme nyak asu mve'an ô ne ngumba, ô too mbamba menyum e be Nti, mbunda'an a mvean avut a mbon avale nye'elan y'été ô né; a ye fe ve nnôm ékela asu metuna'a me *njaman abé.

²⁵ Ntuni a ye bulu nsem asu ékôane bôt ése ya bone b'Israél, wôna ba ye nyoñe *njaman: amu ékobe te é ne fu'an, a be soya mvean wo di'ibane nduan asu be Nti; be soya fe étyi'a asu be Nti mfa'a *njaman abé amu fu'an ékobe wop.

²⁶ Ekôane bôt ése y'Israél ja ye nyoñe *njaman nalé fe *ntabe a too e zañe jap, asu bôte bese, amu ékobe te é ne fu'an.

²⁷ Nge môte wua nye a te bo *abé e fu'an, a ye ve ngal ékela a ntoo mbu wua ane metuna'a asu *njaman abé.

²⁸ Ntuni a ye bulu nsem asu be Nti ajô môt a nji vañe bo abé; éyoñ a maneya bulu nsem asu dé, a ye nyoñe *njaman.

²⁹ Eyoñe môt a nji vañe bo jam, atiñe da da ye bo ésaé mfa'a bialébialé a mfa'a *ntabe a too e zañe jap.

³⁰ V'éyoñe bialébialé nge *ntabe a vañe bo jam, a taya Nti; ba ye vaa môt ate e zañe bôte bé.

³¹ A biaséya mejô me Nti a a tyameya atiñe dé: ba ye vaa môt ate a a ye be'e adite ya ékobe jé.

Melebe ma tôñ e môt a tyame sabat

³² Valé bone b'Israél be ngenan e *nkôte si, nde be nga koone môt a tyaa nja'a e môse *sabat.

³³ Bôt be nga koone nye a tyaa nja'a be nga zuu nye be Môze, Aron a ékôane bôt ése.

³⁴ Nde be nga kôme ba'ale nye amu jam be nga yiane bo nye e nji ke kateban.

³⁵ Ane Nti a nga jô Môze na: Môt ate a yiane wôéban; bôte bese ba ye lume nye *mekok e minkan atan.

³⁶ Ane bôte bese be nga kee nye e minkan atan a lume nye *mekok, nde a nga wu avale Nti a nga bendé Môze.

³⁷ Ane Nti a nga jô Môze na:

³⁸ Kobô'ô bone b'Israél na: E miaé ôse été, ba ye bo meze'ele e ñwôndé ya mengômesane map.

³⁹ Meze'ele mete me ne asu ya simesane mebendé me Nti a bo me; mia ye bo te tôñe minkômbane ya minleme mienan nge mi me mise menan, mi za dutu mia na mi bo bijabô.

⁴⁰ Avale di mia ye simesane mebendé mam, a mia ye bo me, éyoñe te mia ye bo étyi asu e Zambe wônan.

⁴¹ Ma me ne Nti, e Zambe wônan, nyô a nga soo mia Ejipte na a bo e Zambe wônan. Me ne Nti, e Zambe wônan.