NLAÑANE BÔT 11 - Kalate Zambe Nnomo a Mfefe Mfefé Nkôñelan

Nduane Nti

¹ Bôt be nga kobô e menyiñ a Nti a nga wô'ô mboone te *abé. Eyoñ a wô'ôya jame te, ayaa dé e nga yôñ ane nduan. Nduan a nga lôm é nga mane di'i éfase minkan.

² Nde bôt be nga ye'elane Môze a beta miñyôn. Môze a nga ye'elane Nti, a nduan é nga dim.

³ Ane be nga yôlé vôm ate na Tabéra, nalé a tinane na: Nduan ja di'i, amu vôm ate Zambe a nga di'i minkan.

Bôt ba kômbô di tit

⁴ Môs éziñ, beyeñ be mbe Israél été be so'o mevôm mevôm, be nga jaé ne lut a nkômbane ya di tit; ja'ana bone b'Israél bebiene fe be nga beta taté nkobane menyiñ a jô na: Ngo'é nge bi bili tite ya di!

⁵ Bia simesan e kos bi nga di zesé Ejipte, ngon, mebok, bitetam, anyon a laé.

⁶ Eyoñe ji ngule jangan é maneya. Jôme ya di é ntoo momo, vengevenge ve mana bia di *môs ôse nyô.

⁷ Mana a mbe ane bone mefes, éfumulu é tôñe nyôle mfô.

⁸ Bôt be nga mialan asu ya kôane nye; be nga ko'o nye e meko'o bityé, nge tya'a nye bone mintuba. A mbe *zam anyu ane biwôlé bi ne ñyaman a mbon.

⁹ Eyoñ mfô a ku a alu e minkan, éyoñe te fe mana a ku.

¹⁰ Môze a nga wôk ane bôt ba yôn, môt ase e vôme wé, anyiine *nda éndelé. Eyoñe te ayaa Zambe e nga dañe yôñ a Môze a nga wô'ô jame te *abé.

¹¹ Nde a nga jô Nti na: Amu jé wo bo ma avale te? Amu jé wo bene liti ma mvame jôé? Amu jé wo beté ma mbe'e ya wulu e bôte bana bese e bituu'

¹² Sa ñhe ma me nga be'e abume ya bôte bana nge biaé be, ve ô maneya bendé na me be'e be e mo mam ane minga a nyaa nkeñelé mon, na me wulu be a kui be e si ô nga ka'a bimvame biap.

¹³ Ma ye kooé tite ya di asu bôte bese ba yône ba a yemete na me ve be je vé'

¹⁴ Me se nguleya be'e mbe'e ya bôte bana bese étam. Mbe'e te ô dañeya ma adit!

¹⁵ Nge nne wo kômbô bo ma nalé, jibi'i wôé ma! Eyoñe te wo ye liti ma mvame jôé, a ma ye bo te bo ngaa ya bidime biame mamien.

¹⁶ Ane Nti a nga jô Môze na: Sula'ane bôt mewômezamgbwa be so'o e be bemvendé y'Israél ba wo yeme ma be ne fo'o bemvendé a be kobô mejô a zuu be e *nda éndelé bendôba'ane, vôm ate mia be be mia ye tebe tetele.

¹⁷ Ma ye sise valé a kobô wo; ma ye nyoñe ngab éziñe ya *nsisim me nga ve wo a sôé wô e be be; éyoñe te ba ye bo nguleya volô be'e wo mbe'e ya bôte ba, a wo ye bo te beta bo ésaé te étam.

¹⁸ Wo ye jô bôte na: Tunane miabebien asu y'akiti a mia ye di tit, amu mia mi nga yôn e melo me Nti me wô'ô na: Za a ye ve bia tite ya di? Amu bi mbe bi nyiñe mvaé Ejipte. Nti a ye ve mia tit a mia ye di je.

¹⁹ Mia ye bo te di je môse wua, mibaé, mitan, awôm nge mewôm mebaé,

²⁰ ve ngume ngon, akekui ja ye vame mia e mimbile mi môé a bo mia abume mintaé, amu mi nga biasé Nti a ne mia e zañ, a amu mi nga yône be nye a jô na: Amu jé bi nga kôlô Ejipte'

²¹ Môze a nga semé a jô na: Bôte ba bômane ma ba be ne toyini mintete misaman, éyoñe te wo kôme jô na wo zu ve be tite ya di tañe ngume ngon!

²² To'o bia wôé mintômba miañgan mise, bikela biangan bise a benya'a bangan bese, abime te da ye bo fe ve tyôtyoé!

²³ Ane Nti a nga yalane Môze na: Ye wo Nti wo ye bo étun? Wo ye yen éyoñe ji nge jam ma te jô wo da ye boban nge momo.

²⁴ Eyoñe te Môze a nga ke kate bôt mejô me Nti. Ane a nga sulane bôt mewôme zamgbwale ya bemvendé y'Israél a telé be mbôma'an a *nda éndelé bendôba'ane.

²⁵ Nde Nti a nga sis e nsume *nkut été a kobô Môze. Ane a nga nyoñe ngab éziñ ya *nsisim ô mbe be nye a sôé wô e be bemvendé mewôme zamgbwa. Eyoñe *nsisim ô nga sis e be be, be nga taté na ba kulu mejô, ve teke kee wô ôsu.

²⁶ Bôte bebaé môé na Eldad a Médad be nga li'i e minkan, a *nsisim ô nga sis e be be; be fe be mbe ntilan ve be nji ke e *nda éndelé; be nga taté na ba kulu mejô e minkan.

²⁷ Ane ndôman éziñ é nga mate a ke kate Môze foé a jô na: Eldad a Médad ba kulu mejô e minkan.

²⁸ Nde Yasua e mone Nun, ba'a Môze aso mongô, a nga jô na: A Môze Tate wom, bamé'é be!

²⁹ Ve Môze a nga yalane na: Ye wo bo ma éviele? Ke ma dañe yene mvaé nge ayoñe bôte Nti ese e bili fo'o ve bekulu mejô, a ngo'é nge Nti a ne sôé *nsisim e be be!

³⁰ Ane Môze a nga ke e minkan baa be bemvendé y'Israél.

³¹ Nti a nga bo na évuñulu é vuñ; é nga soo abem mfa'a ya mañ a zuu de minkan tañe nté dulu ngume *môs mfa'a ya li, nalé fe mfa'a ya li, mbôma'an a minkan, afip tañe menyi'i me mo mebaé a kui si.

³² Ngume *môs a ngum alu, a ngume *môs ôvok ô nga tôñe valé, bôt be nga kôlô si a ke ba kôan abem. Môt a nga dañe kôane tyôtyoé a nga kôane tañe betoyini bekili. Be nga yané de mbôma'ane minkan;

³³ Tit é ngenane be mesôñ te nyalé je, nde ayaa Nti é nga yôñ e nyôle ayoñ ese, a Nti a nga wôé bôt a beta ébubua.

³⁴ Be nga yôlé vôm ate na: Kibrôt-Atava, nalé a ne na: Mesoñe ya nkômban, amu vôm ate be nga jame bôte ya ayoñ be nga dañe bili a nkômbane ya di tit.

³⁵ Akôlô ya Kibrôt-Atava, bone b'Israél be nga ke Azérôt, e vôm be nga vule minkane miap.