NLAÑANE BÔT 10 - Kalate Zambe Nnomo a Mfefe Mfefé Nkôñelan

Metoñ me argent mebaé

¹ Nti a nga kobô Môze a jô na:

² Tame bo metoñ me argent mebaé; wo ye bo me a argent a dañ afip. Wo ye belane me asu ya loon ékôane bôte y'Israél, a éyoñ wo kate nkôlane minkan.

³ Eyoñ ba loñe me, éyoñe te bôte bese ba sulan e vôm ô né, anyiine *nda éndelé bendôba'ane.

⁴ Nge toñ ja kobô ve jia, bivete *meyoñ étam mbie bia ye sulan e vôm e né.

⁵ Nge toñ ja dañ kobô ngu éyoñ ôsu, minkane ya e mfa'a jôp da tôô mia ye kôlô si a ke;

⁶ nge ja kobô avale te éyoñe baa, minkane ya nké mia ye kôlô si a ke.

⁷ Eyoñ ékôane bôt ja sulan, mia ye bo te loñe toñe ngu.

⁸ Bone b'Aron, betuni, mbe ba ye loñe metoñ. Jame di da ye bo mvinda ya biyoñ bise e miaé mienane mise.

⁹ Nge si jenan ja ke bita a wosane besiñ, nge besiñ bete ba dañe mia, mia ye loñe metoñe ngu, a nalé ate a ye volô mia mi simesane Nti e Zambe wônan, a éyoñe te mia ye nyiiban e mo besiñe benan.

¹⁰ Eyoñe ya *mebôk, e *môs ôsu ya ngon ése, nge na biyoñ bife ya beta mevak, mia ye loñe toñ éyoñe ya mveane mimvean mi ne ngumba a mi ya nlatane ngbwa, a amu nalé, ma ye fe simesane mia: ma me ne Nti, e Zambe wônan.

Nkôlane Sinayi

¹¹ E ngone baa ya mbu baa é too melu mewôm mebaé, nsume *nkut ô nga kôlô *tabernakel ya *nda éndelé bendôba'ane.

¹² Nde bone b'Israél be nga kôlô e *nkôte si ya sinayi avale Nti a nga tiñeti nkôlane wop. Nkut ô nga ke yametane *nkôte si ya Parañ.

¹³ Nkôlan ya ôsu te ô nga boban avale Nti a nga bendé Môze.

¹⁴ Nlinga ya minkane mi bone be Yuda ñwô ô nga taté dulu a minsamba mewosane mié: Nason e mone Aminadab a too évete jap.

¹⁵ Nkane bita bone be Isakar ô nga tôñ valé, Natanaél e mone Suar a too évet.

¹⁶ Nkane bita bone be Zabuloñ ô nga tôñe valé, Eliab e mone Elôn a too évet.

¹⁷ Be nga mane té *tabernakel, bone be Gerson a Merari mbe be nga be'e nye.

¹⁸ Wôna nlinga ya minkane mi Ruben ô nga téé dulu a minsamba mewosane mié. Elisur, e mone Sédéur a too évet;

¹⁹ nkane bita bone be Siméoñ ô nga tôñe valé, Sélumiél, e mone Surisadayi a too évet;

²⁰ nkane bita bone be Gad ô nga tôñe valé, Elisaf e mone Déuél a too évet.

²¹ Bone be Kehat be nga be'e biôm bia dañ étyi be fe be nga téé dulu. Bone be Lévi bevok be nga yiane lame *nda éndelé, be yange'e na bone be Kehat be so.

²² Nlinga ya minkane mi bone b'Efrayim ô nga téé dulu a minsamba mewosane mié, Elisama e mone Amihud a too évet;

²³ Nkane bita bone be Manasé ô nga tôñe valé, Gamliél e mone Pédasur a too évet,

²⁴ Nkane bita bone be Bényamin ô nga tôñe valé, Abidan, e mone Gidéôni a too évet.

²⁵ Nlinga ya minkane mi bone be Dan ô nga téé dulu a minsamba mewosane mié mise. Nlinga te ñwô ô nga tele e mvuse minkane mise, Ahiézer e mone Amisadayi a too évet;

²⁶ Nkane bita bone b'Azér ô nga tôñe valé, Pagiél e mone Okran a too évet.

²⁷ Nkane bita bone be Néftali ô nga tôñe valé, Ahira, e mone Enan a too évet.

²⁸ Avale di nde minsamba mi bone b'Israél mi nga téé dulu

Môze a jeñe nlitizen asu dulu

²⁹ Ane Môze a nga jô Obab e mone Reuél, môte ya Madian, ntyia Môze na: Bi nga ke e vôme Nti a nga jô nye na: Ma ye ve mia. Ajô te za'a bia be mia bi ke a bia ye bo wo mvaé, amu Nti a nga bo ngaka'a na a ye bo Israél mvaé.

³⁰ Obab a nga yalane Môze na: Maa ye ke ke; ve ma ye bulane e si jam, e vôme bôte bam be né.

³¹ Môze a nga yalane na: Te li'i bia, amu wo yem mevôm bia vule minkan e *nkôte si: ajô te wo ye bo nlitizene wongan.

³² A nge bia be mia bia ye ke, bia be mia fe bia ye bu'ubane mvaé Nti a ye bo bia.

³³ Ane be nga kôlô nkôle Zambe a wulu môse mila. Ewolo élate Zambe é nga wulu be ôsu môse mila a jeñe be vôme ya wo'on.

³⁴ Nsume nkute Zambe ô mbe be minlô yôp a *môs éyoñ be nga kôlô minkan.

³⁵ Eyoñ éwolo é nga téé dulu, Môze a nga jô na: Kôlô'ô si, a Zambe! A Zambe! A besiñe bôé be ntoo ve tyamelan! Ba ba siñe wo be ntoo ve tub asu dôé!

³⁶ Eyoñe be nga bôôé éwolo si, Môze a nga jô na: Bula'an a Zambe, a beta nyoñ éto jôé ézezañe bizu'u menda me bôte y'Israél.