NLAÑANE BÔT 1 - Kalate Zambe Nnomo a Mfefe Mfefé Nkôñelan

Nlañane bôt e * nkôte si ya Sinayi

¹ Nti a nga kobô Môze e *nkôte si ya Sinayi, e *nda éndelé bendôba'an été, e ngone baa alu da ya nkôlane wobe y'Ejipte, a jô nye na:

² Bo'ok élañe bôte bese y'Israél avale *meyoñ a menda me bôte map me né; bôte bese ba ye lañeban wua wua.

³ Mia Aron mia ye lañe bôte bese y'Israél be ne nyoñe biôme mewosan, ataté ba be ne mimbu mewôm mebaé a kui ba ba lôte valé, aval'ane minkane bita miap mi né.

⁴ Mia be môte wua ya ayoñ ese mia ye bo ésaé, môt ate a too évete ya *nda bôte jé.

⁵ Biyôlé ya bôte mia be be mia ye bo ésaé mbie bi: mfa'a Ruben: Elisur e mone Sédéur;

⁶ Mfa'a Siméon: Selumiél, e mone Surisadayi;

⁷ Mfa'a Yuda: Nason e mone Aminadab;

⁸ Mfa'a Isakar: Netaniél, e mone Suar;

⁹ Mfa'a Zabuloñ: Eliab e mone Elôn;

¹⁰ Mfa'a bone be Yôsep: e be Efrayim: Elisama, e mone Amihud; e be Manasé: Gamliél e mone Rédasur;

¹¹ Mfa'a Bényamin: Abidan, e mone Gidéôni;

¹² Mfa'a Dan: Ahiézer, e mone Amisadayi.

¹³ Mfa'a Azér: Pagiél, e mone Okran.

¹⁴ Mfa'a Gad: Eliasaf, e mone Déuél;

¹⁵ Mfa'a Néftali: Ahira, e mone Enan.

¹⁶ Bivete ya menda me bôt bi nga toban, bi too fe bivete bezimbi y'Israél.

¹⁷ Ane Môze a Aron be nga nyoñ e bôt be nga tobane ba e nsamba wop.

¹⁸ E *môs ôsu ya ngone baa, be nga sulane bôte bese, bone b'Israél bese, ataté mimbu mewôm mebaé, a ke ôsu, be nga tiliban, môt ase e jôé dé, avale *meyoñ a menda me bôte map me né.

¹⁹ Môze a nga lañe be e *nkôte si ya Sinayi, avale Nti a nga bendé nye.

²⁰ Mfa'a mvô'ô Ruben, e ntôle mone Israél, bindane biap avale *meyoñ a menda me bôte map me né, be lañe bôte bese môé wua wua, ataté ba be ne mimbu mewôm mebaé, a ke ôsu, ba bese be mbe ngule ya nyoñe biôm mewosan,

²¹ ba be nga lañeban e mvô'ô Ruben be mbe bôte toyini mewôm menyin a étan, mintete misaman a mewôm metan.

²² Mfa'a bone be Siméon, bindane biap avale *meyoñ a menda me bôte map me né; nge wo lañe biyôlé bi bôte bise jia jia, ataté mimbu mewôm mebaé a ke ôsu, ba bese be mbe nguleya nyoñe biôm mewosan.

²³ Ba bese be nga lañeban e mvô'ô Siméon be mbe toyini mewôm metan a ébu a mintete mila.

²⁴ Mfa'a bone be Gad, avale menda me bôte map me né, bindane biap ane meyoñe map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan,

²⁵ ba be nga lañeban e mvô'ô Gad be mbe toyini mewôm menyin a étan, mintete misaman a mewôm metan.

²⁶ Mfa'a bone be Yuda, avale menda me bôte map me né, bindane biap ane meyoñe map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan,

²⁷ ba be nga lañeban e mvô'ô Yuda be mbe toyini mewôme zamgbwal a ényin a mintete misaman.

²⁸ E be bone b'Isakar, avale menda me bôte map me né, bindane biap ane meyoñe map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan,

²⁹ ba bese be nga lañeban e mvô'ô Isakar be mbe toyini mewôm metan a ényin a mintete minyin.

³⁰ E be bone be Zabuloñ, avale menda me bôte map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan,

³¹ ba be nga lañeban e mvô'ô Zabuloñ be mbe toyini mewôm metan a zamgbwal a mintete minyin.

³² E be bone be Yôsep: ba b'Efrayim ôsusua: bindane biap ane *meyoñ a menda me bôte map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan,

³³ ba bese be nga lañeban e mvô'ô Efrayim be mbe toyini mewôm menyin a mintete mitan.

³⁴ Bone be Manasé, avale menda me bôte map me né, nge biyôlé bi ne nlañan ataté mimbu mewôm mebaé a ke ôsu, ba bese be mbe nguleya nyoñe biôme mewosan,

³⁵ ba be nga lañeban e mvô'ô Manasé be mbe toyini mewôm mela a ébaé a mintete mibaé.

³⁶ Bone be Bényamin, avale menda me bôte map me né, bindane biap ane meyoñe map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôm mewosan,

³⁷ ba be nga lañeban e mvô'ô Bényamin be mbe toyini mewôm mela a étan a mintete minyin.

³⁸ Bone be Dan, avale menda me bôte map me né, bindane biap ane meyoñe map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan,

³⁹ ba bese be nga lañeban e mvô'ô Dan be mbe toyini mewôm mesaman a ébaé a mintete zamgbwal.

⁴⁰ Bone b'Azér, avale menda me bôte map me né, bindane biap ane meyoñe map me né, nge biyôlé bia lañeban ataté mimbu mewôm mebaé a ke ôsu, ba bese be mbe nguleya nyoñe biôme mewosan,

⁴¹ ba bese be nga lañeban e mvô'ô Azér, bôte toyini mewôm menyin a jia a mintete mitan.

⁴² Bone be Néftali, bindane biap avale *meyoñ a menda me bôte map me né, nge biyôlé bia lañeban ataté mimbu mewôm mebaé a ke ôsu ba bese be mbe nguleya nyoñe biôme mewosan,

⁴³ bese be nga lañeban, e mvô'ô Néftali, bôte toyini mewôm metan a éla a mintete minyin.

⁴⁴ E bôte Môze, Aron a bivete y'Israél awôm a bibaé be nga lañ mbe le. Nda bôt ése ya menda me bôte map môte wua.

⁴⁵ Ba bese ya bone b'Israél be nga lañeban, avale menda me bôte map me né, ataté mimbu mewôm mebaé a ke ôsu, ba bese y'Israél be mbe nguleya nyoñe biôme mewosan,

⁴⁶ bese be nga lañeban bôte toyini mintete misaman a éla, mintete mitan a mewôm metan.

Esaé bone be Lévi

⁴⁷ Bone be Lévi, ane ayoñe b'ésaa bap e né, be nji ke lañeban ba be bôte bevok.

⁴⁸ Nti a nga kobô Môze na:

⁴⁹ Wo ye bo te lañe bone be Lévi, nge nyoñe tañe bôte jap e bone b'Israél bevok été.

⁵⁰ Va'a b'ésaé ya ba'ale *nda é n'étyi, e vôme meko'o y'élat me bôô, a biôme mebelan bivo'o bise bi n'été. Ba ye be'e *tabernakel a biôme mebelane bié bise; ba ye bo ésaé y'été, a tabe nye e mbôma'ane.

⁵¹ Eyoñe mia ye kôlô minkan, mbe ba ye mane koé *tabernakel ate. Eyoñe ya mvulane minkan, mbe fe ba ye mane tooé nye. Nge môte mfe a subu nye bebé, a yiane wôéban.

⁵² Bone b'Israél ba ye vule minkan, môt ase e vôme nlinga bita wé wo kebelan, avale minsamba mewosane miap mi né.

⁵³ Ve bone be Lévi ba ye vule minkan mbôma'an a *tabernakel a bo ésaé jap, nalé ayaa dam da ye bo te zu e be bone b'Israél.

⁵⁴ Bone b'Israél be nga bo fo'o v'avale Nti a nga jô Môze.