NKÔLAN 6 - Kalate Zambe Nnomo a Mfefe Mfefé Nkôñelan

¹ Ane Nti a nga jô Môze na: Eyoñe ji wo ye yeme e jam ma ye bo Faraoñ, amu wo ô ne ngu wo ye tindi nye na a suu be a ñwô fe wo ye tindi nye na a titane be.

Nti a yené e be Môze

² Ane Zambe a nga kobô Môze a jô nye na: Me ne Nti,

³ me nga yené e be Abraham, Yizak a e be Yakob aval ane e Zambe a bili ngul'ése; ve be nji yeme ma a nya jôé wom nye a ne Nti.

⁴ Me nga bo fe élate jam a be na me ve be e si ba loone Kanaan; si e vôm mi nga lôt abe melu a su'ulan bo mintabe.

⁵ Ajô te me wô'ôya mintat bôte ya Israél a étibela'a bôte ya Ejipte ba tibili be: Eyoñe ji me simesaneya élate jam.

⁶ Ajô te kate bôte ya Israél na: Me ne Nti, ma ye kôté mia e ngule bisaé bôte ya Ejipte ba ve mia; ma ye kôté mia a ngule ya e wo wom a mintyi'an mejô mi ne anen.

⁷ Ma ye nyoñe mia na mi bo e bôte bam. Ma ye bo e Zambe wônan a mia ye yeme na me ne Nti e Zambe wônan, nyô a kôté mia e ngule bisaé bôte ya Ejipte ba ve mia.

⁸ Ma ye bo na mi nyiin e si me nga kalane wo wom na ma ye ve je Abraham, Yizak a Yakob; ma ye ve mia je, ma, Nti, é bo e jôme jenan.

⁹ Nalé ate nye Môze a nga kobô bôte ya Israél: ve be nga bo te vô'ôlô Môze amu ôjeja'a wob a amu mbia éto belo wop.

¹⁰ Ane Nti a nga kobô Môze a jô nye na:

¹¹ Kelek a kobô Faraoñ njô bôte ya Ejipte na, a suu bôte ya Israél be kôlô e si jé.

¹² Ane Môze a nga yalan asu be Nti na: Israél a bene wô'ô ma, ngumane ke Faraoñ a ye wô'ô ma aya me too adit anyu'

¹³ Ane Nti a nga kobô Môze ba Aron a ve be mebendé ma fombô Israél a Faraoñ, njô bôte ya Ejipte mfa'a ya vaa be Ejipte.

Ndan Môze ba Aron

¹⁴ Bivet ya menda me bôte mab e mbie bi: Bone be Ruben e ntôle mone Israél, Enok Paloñ, Etsroñ a Karmi. Menda me Ruben e me le.

¹⁵ Bone be Siméoñ: Yémuél, Yamin, Ôhad, Yakin, Sôhar a Saül e mone ngone ya Kanaan a nga biaé. Menda me bôt me Siméoñ e me le.

¹⁶ Biyôlé bi bone be Lévi a menda me bôte mab mbie bi: Gérschon, Kehat a Mérari. Lévi a nga tabe mimbu ntet a mewôm mela a zamgbwa.

¹⁷ Bone be Gérschon: Libni a Siméyi a menda me bôte map.

¹⁸ Bone be Kehat: Amram, Yitsehar, Ebroñ a Uziél. Kehat a nga tabe mimbu ntet a mewôm mela a mila.

¹⁹ Bone be Mérari: Mali a Musi: Menda me bôt me Lévi a memvoñ me bôte mab e mme le.

²⁰ Ane Amram a nga lu'u Yôkébéd ésanga wé, nde a nga biaé nye Aron ba Môze. Amram a nga tabe mimbu ntet a mewôm mela a zamgbwa.

²¹ Bone be Yisear: Koré, Néfeg a Zikri.

²² Bone be Uziél: Misaél, Elsafan a Sitri.

²³ Ane Aron a nga lu'u Eliséba, ngone Aminadab a kale Nason a nga biaé nye Nadab, Abihu, Eléazar a Itamar.

²⁴ Bone be Koré: Asir, Elkana a Abiasaf; menda me bôte me Koré mme le.

²⁵ Ane Eléazar e mone Aron a nga lu'u ngone jia ya bengon be Putiél, nje é nga biaé nye Pinehas. Minlô mi bôte ya mvoñe Lévit aval ane menda me bôte mab me né mmie le.

²⁶ Aron ba Môze mbe le Nti a nga jô na: Bo'one na bôte ya Israél be kôlô Ejipte aval ane minsamba miab mi né.

²⁷ Mbe bete be nga bo be kobô'ô Faraoñ njô bôte ya Ejipte ajô mvaane bôte ya Israél Ejipte.

Môze a beta ke e be Faraoñ

²⁸ Melu Nti a nga kobô Môze Ejipte,

²⁹ ane a nga jô nye na: Me ne Nti, kobô'ô Faraoñ njô bôte ya Ejipte e mam mese me kobôya wo.

³⁰ Ane Môze a nga yalane asu be Nti na: Me nyô, e môt a ne te yeme nkobô, nne Faraoñ a ye wô'ô ma aya'