NKÔLAN 5 - Kalate Zambe Nnomo a Mfefe Mfefé Nkôñelan

Môze ba Aron be tele asu be njô bôt v'Ejipte

¹ Eyoñ é lôteya, ane Môze ba Aron be nga zu a jô Faraoñ na: Nti, e Zamba Israél a jô na: Su'u e bôte bam be ke kañe ma a abôk e fé été.

² Ane Faraoñ a nga jô na: Za a ne Nti e nyô ma yiane vô'ôlô e tyiñe jé a suu Israél? Me nji yeme Nti, nalé fe na ma ye bo te suu Israél.

³ Ane be nga yalane na: Zambe Beébre a nga yené e be bia. Bia ye'elane wo na: Su'u bia bi ke e fé été e nté dulu melu mela, bi tyi'i Nti, e Zambe wongan biôm, a za bibi bia a ébubua ôkon éziñ nge ke nkpwaté mekôn.

⁴ Ane njô bôte y'Ejipte a nga jô be na: A Môze a Aron amu jé mia vaa bôt e bisaé biap? Kelan bisaé bienan!

⁵ Ane Faraoñ a nga jô na: Tame yen, éyoñ bôt be ntoo abui e *si nyô ana, éyoñe te mia kômbô na be tabe si te beta bo bisaé biap.

⁶ Amôs ôte ôbien Faraoñ a nga bendé bivet bisaé, bi bi bôte y'Ejipte a bi bôte ya Israél a bendé be na:

⁷ Mia ye bo te beta kôane bôt bikumba bilo'o ya bibi brik avale mi nga bo biyoñ ya mvus; bebien be kelek a kôane bie.

⁸ Ve mia ye yemete be be ke ôsu a bo abime brik be nga taté bo be bo'ok; mia ye bo te sé'é tañ éte amu be ne minleles a amu ajô te ba yôn a jô na: Bi tame ke tyi'i Zambe wongane biôm!

⁹ Be beté'é bôte bete adite bisaé, éyoñe te ba ye bi jame ya bo a bo te beta nyoñe ngab e nkobô minsose wu.

¹⁰ Nalé ate bivete bise, bi ne anen a bi bi ne tyôtyoé bi nga ke a jô bôte na: Avale di Faraoñ a jô na: Ma ye bo te beta ve mia bikumba bilok.

¹¹ Miabebien kela jeñan bilo'o bite e vôm mi ne nguleya yene bie, amu ba ye bo te sé'é abime ésaé mia yiane bo to'o na ve mon abim.

¹² Ane bôte ya Israél be nga mialan e si ése ya Ejipte a nyoñ bikum minkende'e bilok éjiane mimbom bikumba bilok asu ya bibi brik.

¹³ Ane bivet bi nga tindi be be mane ésaé ya *môs ôse avale fe ane éyoñ be nga belan bikumba bilok.

¹⁴ Be nga bôm to'o na bivet bi mbe bôte ya Israél mbie bi mbe bôte ya Ejipte be nga telé na bi jôô bôte ya Israél be jô'ô na: Amu jé angô'é mi nji bo abime brik be nga tiñeti mia na mi bo avale mi nga taté bo'o mi bo'ok'

¹⁵ Ane bivet bi mbe bôte ya Israél be nga ke soman de e be Faraoñ a jô na: Amu jé wo tibili bebo bisaé bôé avale di'

¹⁶ Be nji beta ve bebo bisaé bôé bikumba bilok, ve ba jô bia na: Biba'an brik! Ajô te ba bôm bebo bisaé bôé, a bôte ya ayoñ dôé mbe be ne mekua.

¹⁷ Ane Faraoñ a nga yalane na: Mi ne minleles! Amu ajô te mia jô na za'an bi ke ve Nti mimvean!

¹⁸ Eyoñe ji bula'an ésaé jenan; ba ye bo te ve mia bikumba bilok, ve mia ye bibi abime brik e ne mia ntiñetane na mi bibi.

¹⁹ Bivet bi mbe bôte ya Israél bi nga yene njôane wuna na mia ye bo te sé'é e tañe brik mia ve *môs ôse zene ya veñesane be be bo bingôngol.

²⁰ Eyoñ be kôlôya be Faraoñ, ane be nga beta ke koone Môze ba Aron e vôm be mbe be yange'e be.

²¹ Ane be nga jô be na: Nti émien a fombô'ô mia a tyi'i mia ajô, amu mi boya bia bi yené e mbia be biôm e mise me Faraoñ a bebo bisaé bé.

²² Ane Môze a nga bulan e be Nti a jô nye na: A Nti! Amu jé ô boya ayoñe di *abé! Amu jé ô nga lôme ma'

²³ Amu nté ane me nga zu e be Faraoñ a kobô nye, a jôé dôé, a ke ke ôsu a bo e bôte ba *abé: ve wo ô nji kôté e bôte bôé.