NKÔLAN 40 - Kalate Zambe Nnomo a Mfefe Mfefé Nkôñelan

¹ Ane Nti a nga kobô Môze a jô nye na:

² Môs ôsu ya ngone ôsu, wo ye telé *tabernakel, *nda éndélé bisulan.

³ Wo ye futi éwolo élat été a buti je éyé.

⁴ Wo ye soo tebele a telé nye ane da yian. Wo ye zuu ébi bifufub a kôme belambe.

⁵ Wo ye telé ata'a mvot asu ôlobinda ôsu éwolo ya élat, a wo ye futi éyé anyiine *tabernakel.

⁶ Wo ye telé ata'a mimvean mi ne ngumba ôsu ya anyiin *tabernakel a *nda éndélé bisulan.

⁷ Wo ye telé fandé zañe *nda éndélé bisulan a atak, wo ye futi mendim été.

⁸ Wo ye bômane nseñ a vôme ase, a futi éyé *mbé ya nseñ.

⁹ Wo ye nyoñe mbon ba wo'o bôt éyoñ ba telé be bito a wo'o wô e *tabernakel a jôm ése é ne été, wo ye telé nye étyi émien a biôm mebelane bié bise a bia ye bo étyi.

¹⁰ Wo ye telé ata'a mimvean mi ne ngumba mbon a biôme mebelan y'été. Wo ye telé de étyi nalé da ye dañe dañ étyi.

¹¹ Wo ye wo'o fandé a tine ya été jé ése mbon a wo ye telé nye étyi.

¹² Wo ye bo na Aron a bone bé be subu bebé anyiin *nda éndélé bisulan a wo ye wo'o be mendim.

¹³ Wo ye jalé Aron mengômesan me ne étyi, ô wo'o nye mbon a telé nye étyi, a a ye bo ma ésaé ane *ntuni.

¹⁴ Wo ye bo na bone bé be subu bebé, ô jalé be melô'ô.

¹⁵ A wo ye wo'o be mbon avale ô maneya wo'o ésaa wop; a ba ye bo ma ésaé ane betuni. Nwo'one mbone te wo ve be ésaé betuni miaé mise.

¹⁶ Ane Môze a nga bo mam mese Nti a nga bendé nye.

¹⁷ Ngon ôsu ya mbu baa é too alu da nje *tabernakel a nga teléban.

¹⁸ E nde Môze a nga telé nye, a futi metin, y'été, a telé mebam, a futi betyengane a telé beyôm mekôn.

¹⁹ Ane a nga ndamé éndélé e *tabernakel yôp, a buti *nda éndélé avale Nti a nga bendé nye.

²⁰ Wôna a nga nyoñe meko'o metiñ a futi me éwolo été, ve futi mimbôñ éwolo a buti ébuta'a été yôp.

²¹ Akekui a nga soo éwolo e *tabernakel été; a futi éyé ja kandé a solé éwolo élat avale Nti a nga bendé nye.

²² Ane a nga telé tebele *nda éndélé bendôba'an e *tabernakel akôé, ôyab a éyé ja kandé;

²³ E nde a nga ta'a belet (awôm a ébaé) ôsu be Nti, avale Nti émien a nga bendé nye.

²⁴ Ane a nga telé ébi bifufub e *nda éndélé bendôba'ane ôsu tebele, e *tabernakel nké,

²⁵ a kôme belambe asu be Nti avale Nti émien a nga bendé nye.

²⁶ A nga telé ata'a mvot e *nda éndélé bendôba'an été, ôsu ya éyé ja kandé.

²⁷ Nde a nga bo na be di'i ôlobinda a nyum mvaé été yôp, avale ane Nti a nga bendé Môze.

²⁸ Ane a nga tyelé éyé anyiine *tabernakel.

²⁹ A telé ata'a mimvean mi ne ngumba anyiine *tabernakel ya *nda éndélé bendôba'ane, a ve mvean ba di'i ngumba a ôfe avale Nti a nga bendé nye.

³⁰ A nga telé fandé e zañe *nda éndélé bendôba'ane a ata'a metuna'a a futi mendim ya sôbe mo a mebo été;

³¹ Aron a bone bé be nga sôbe mo a mebo été.

³² Eyoñ ése ba nyiin *nda éndélé a subu bebé ata'a metuna'a, be nga sôbe mo a mebo avale Nti a nga bendé Môze.

³³ E nde a nga bo nseñ ô bôma'ane *tabernakel ba ata'a metuna'a a tyelé éyé *mbé ya nseñ. Nalé ate Môze a nga sondô ésaé ése.

Etôto'o Nti

³⁴ Ane *nkut ô nga buti *nda éndélé bendôba'ane, a étôto'o Nti é nga jaé *tabernakel.

³⁵ Môze a nji bo ngule ya nyiin *nda éndélé bendôba'ane, amu *nkut ô mbe njalan été, a étôto'o Nti é nga yiane *tabernakel.

³⁶ Eyoñ ése *nkut wo mane kôlô *tabernakel, bôt ya Israél be taté dulu a ke ôsu ya zene jap.

³⁷ A e môse, *nkut Nti ô nji bete yôp, be nji téé dulu v'akekui môse *nkut wo beta bet.

³⁸ Amu nkute Nti ô nga yametane *nda a amôs, a alu nduan é nga bômane je Israél ase a lôô, e mevôme mese be nga tebe.