NKÔLAN 33 - Kalate Zambe Nnomo a Mfefe Mfefé Nkôñelan

¹ Ane Nti a nga jô Môze na: Kelek, wo a bôt ô nga soo be Ejipte; betek a ke si me nga ka'a Abraham, Izak a Yakob a ngana na, ma ye ve je mvoñe bôte jôé.

² Ma ye lôm éngele ôsu viôé a titane Bekananééñ, Beamorééñ, Behétieñ Beférézieñ, Behévieñ a be Beyébuzieñ;

³ kele si menyañ a wôé bia len. Ve bia wo bia ye bo te nsamba, me za jian wo *zen, amu ô ne melo abui.

⁴ Eyoñ bôt be nga wô'ô avale ékowoñ nkobô di, ane be nga tabe meyeb été a môt éziñ a nji jaé mekom, bilondo, bimvônga nge minsanga.

⁵ Ane Nti a nga jô Môze na: Mi ne bôt be ne melo; nge ma bet ézezañ jenan ve mone nté, ma ye jiane mia. Ajô te va'a mekom, bilondo, bimvônga a minsanga ô bili, éyoñe te ma ye yene jam ma ye bo wo.

⁶ Ane bôt ya Israél bese be nga mane vaa biôm bite bise menyô nkôlan ya nkôl Hôréb.

⁷ Ane Môze a nga nyoñe *nda éndélé a telé je ôbe ôyap atan ya minkan, ane a nga yôlé je na *nda éndélé ya ndôba'ane. A môt ase a nga kômbô sili Nti mam, a nga ke *nda éndélé ya ndôba'ane nyô, atan ya minkan.

⁸ Eyoñ Môze a nga bo a kui atan a kele *nda éndélé ya ndôba'ane, môt ase a nga tebe *mbé yôb ya *nda éndélé jé, a fombô'ô nye, akekui a nyiine *nda éndélé ya ndôba'ane.

⁹ Eyoñ Môze a nyiineya *nda éndélé été, nsum *nkut ô nga sis a tebe anyiine *nda éndélé, a Nti a nga bo a kobô'ô Môze.

¹⁰ Eyoñe bôte bese ba yen ane nsum *nkut wo tebe anyiine *nda éndélé, éyoñe te bese ba tebe a kute meboñe si môt ase anyiine *nda éndélé jé.

¹¹ Nti a nga kobô ba Môze be lôane mesu, aval ane môt a laane mvôé jé. Eyoñ te Môze a bulan minkan; ve ésoé é nga volô nye ésaé jôé na Yasua, mona Nun, a mbe a tabe'e *nda éndélé été teke kôlô.

Zambe a beta yené be Môze

¹² Ane Môze a nga jô Nti na: O lôô wo jô ma na, bo'o na bôte ba be bet! Ve ô nji tame liti ma me yem za bia nye bia ye ke. Ve da, ô jôya na, ma yeme wo a jôé dôé, a na ô nyoñeya mvame jam.

¹³ Nde ñhe nge me yeneya *mvam be wo, bo'o na me yem mezene môé; éyoñe te ma ye yeme wo a nalé a ye bo *mvam mfa'a wom. O lôô ayoñe di e ne bôte bôé.

¹⁴ Nde Nti a nga yalane na: Mamien ma ye wulu a wo a ma ye ve wo awo'on.

¹⁵ Ane Môze a nga jô nye na: Nge womien ô nji wulu a bia, te bo na bi kôlô va.

¹⁶ Zene fé ba ye yeme na me yeneya *mvam be wo, mamien a bôte bôé? Ye sa a zene ya na wo ye wulu a bia a na bia ye kandan, ma a bôte bôé, a *meyoñ mese me ne *si nyô'

¹⁷ Ane Nti a nga jô Môze na: Ma ye bo avale ô maneya kobô, amu ô yeneya *mvam be ma, a me yemeya wo a jôé dôé.

¹⁸ Ane Môze a nga jô na: Bo'o na me yene étôto'o jôé!

¹⁹ Nde Nti a nga yalane na: Ma ye bo na étôto'o jam ése é lôt asu dôé a ma ye yôtan jôé Nti ôsu viôé; ma mvamane nyô ma kômbô mvamane nye, a ma ko nyô ma kômbô ko éñgôngo éngôngo.

²⁰ Ane a nga beta jô na: Ô se ngule ya yene asu dam, amu môt a se ngule ya yene asu dam a beta nyiñ.

²¹ Ane Nti a nga jô na: Tame yene vôm a ne ma bebé nyô; wo ye tebe akôme yôp.

²² Eyoñ étôto'o jam ja ye lôt, ma ye futi wo ébé ya akôm été a buti wo a éjijin ya wo wom akekui me lôte ya.

²³ Eyoñe te ma ye kandé wo wom a wo ye yene ma mvus; ve mfa'a asu dam, môt a se nguleya yene de.