NKÔLAN 3 - Kalate Zambe Nnomo a Mfefe Mfefé Nkôñelan

Ntut wo yôñ ve te dik

¹ Melu mete Môze a ba'ale'e mbam biyem ntyi wé Yétrô, *ntuni ya Madian, ane a nga ke a wulu afan a kui Hôréb, nkôle Zambe.

² Ane *éngele Nti a nga yené e be nye e nkaba'a nduan été, ézezañ ntut. A nga yen a kame na ntut ô yôñôk ve te dik.

³ Nde Môze a nga jô na: Me tame ke e fefele *zen a subu bebé a yene e beta jame nyô na ntut wo bo te dik ve ô yôñôk.

⁴ Eyoñ Nti a nga yen ane a subu, ane a nga loone nye ézezañ ntut a jô na: A Môze! A Môze! Môze na: Me nyô!

⁵ Nti na: Te subu bebé va, va'a fe bikôndé e mebo môé, amu e vôm ô tele le a ne si ya étyi.

⁶ Ane a nga jô na: Me ne e Zambe ésaa wôé, a nyô Abraham, Yizak a Yakob. Ane Môze a nga solé asu dé amu a nga ko woñ ya fombô Zambe.

⁷ Ane Nti a nga jô na: Me yeneya fo'o e beta njuk ayoñ dam da tôbane de Ejipte me wô'ôya fe ñyône wob amu ba ba tibili be a amu ma yem nju'u wop.

⁸ A me siseya na me kôté be e mo me bôte ya Ejipte a vaa be si éte, a kee be si é ne mvaé a anen, e si menyañ a wôé bia len, e si Beamorééñ, Beférézieñ, Behévieñ a Beyébuzieñ.

⁹ Ô lôô ñyôn bôte ya Israél ô kuiya e be ma, a naa me yeneya étibela'a bôte ya Ejipte ba tibili be.

¹⁰ Ajô te éyoñ ji za'ak me lôme wo e be Faraoñ ô bo ayoñ Israél dam na e kôlô Ejipte.

¹¹ Ane Môze a nga jô Zambe na: Me ne za ane me ne ke e be Faraoñ a vaa Israél Ejipte'

¹² Ane Zambe a nga jô nye na: Bia wo bia ye bo nsamba a e ndeme jam e mfa'a wôé nje nyôna na éyoñ ô boya ayoñ dam e kôlô Ejipte, mia ye kañe ma e nkôle wu yôp.

¹³ Ane Môze a nga jô Zambe na: Ô lôô ma ye ke e be bôte ya Israél a jô be na e Zamba b'ésaa benan a lômeya ma e be mia. Ba ye sili me na: E jôé dé é ne za? Ma ye yalane be aya'

¹⁴ Ane Zambe a nga yalane nye na: Me ne e nyô me né. A nga jô fe na: Avale di nde wo ye jô Israél na: E Nyô me né a lômeya ma e be mia.

¹⁵ Zambe a nga beta fe jô Môze na: Avale di wo ye jô Israél na: Nti, e Zambe b'ésaa benan, e Zamb'Abraham, Yizak a Yakob a lômeya ma e be mia: E jôé dam nde le a kui e nnôm éto, a jôé dame éte nde ba ye loone ma a kui miaé mi bôt mise.

¹⁶ Kelek a sulane bemvendé ya Israél a jô be na: Nti, e Zamba b'ésaa benan, e Zamb'Abraham, Yizak a Yakob a nga yené e be ma a jô na: Me zuya fo'o jome mia a yene e jam bôte ya Ejipte ba bo mia.

¹⁷ A me jôya na: Ma ye bo mia mi kôlô Ejipte e vôm mi too e minju'u été, a kee mia e si Bekananééñ, Behétieñ, Beamorééñ, Beférézieñ a Beyébuzieñ, e si menyañ a wôé bia len.

¹⁸ Ba ye vô'ôlô e tyiñe jôé a wo ye ke a bemvendé ya Israél e be njô bôte ya Ejipte, a mia ye jô nye na: Nti, Zamba Beébre a nga yené e be bia: ajô te éyoñe ji bia ye'elane wo na ô suu bia bi ke e dulu afan été nté dulu melu mela, wôna bia ye tyi'i Nti e Zambe wongan mimvean ba di'i e nduan.

¹⁹ Ma yeme na njô bôte ya Ejipte a ye bo te suu mia to'o na wo ô ne ngul ô ne.

²⁰ Ma ye same e wo wom a bôm Ejipte a bitua bi mam ma ye bo ézezañ jé. Eyoñe te a ye su'ulane suu mia mi ke.

²¹ Ma ye bo na ayoñ dam e yene *mvam e be bôte ya Ejipte; éyoñ mia ke mia ye bo te kee mo zesé.

²² Minga ase a ye sili nyô a ne nye bebé a nyô a too e *nda jé biôm bi ne mboon a silba a bi bi ne mboon a mvot, nalé fe mengômesan mme mia ye jalé bobefam a bobebinga benan, a mia ye nyoñe biôm bite e be bôte ya Ejipte.