NKÔLAN 27 - Kalate Zambe Nnomo a Mfefe Mfefé Nkôñelan

Ata'a ba di'i mimvean

¹ Wo ye bo ata'a metuna'a a asé. Nté ya été ô too menyi'i me mo metan a ndame jé menyi'i me mo metan. Ata'a metuna'a te da ye bo nté a ndam abime da, a nkôñ y'été menyi'i me mo mela.

² Wo ye bo minlak e meku'u menyin ya été; ve minlak mite mia ye bo nlatan a atak bibaane bi bo jôme jia; wo ye yañe ata'a ese a mvot.

³ Wo ye bo bikutan asub ata'a metuna'a te, bisobelé bié, bisua bié, bilume bié a biyaña'a bié, wo ye bo biôm bite bise a mvot.

⁴ Wo ye bo njiñelete avote mvot a futi bilondo bi mvot e meku'u menyin ya été.

⁵ Wo ye yemete avote te mbôma'an éfase jia ya ata'a si; avot da yiane su'u tañe anyi'i wo da a étun nté nkôñ ya yôb ata'a e bili.

⁶ Wo ye bo mimbôñ ya atak a asé a yañe mie a mvot.

⁷ Ba ye nyiñeli mimbôñ e bilondo été a mimbôñ mia ye bo e meku'u ya atak éyoñ ba be'e de.

⁸ Wo ye lôñe ata'a te a mebam mfa'a ya été ô too mfule mfu; avale e nga litibane be wo avale te wo ye lôñe de.

Nseñ ya tabernakel

⁹ Mfa'a ya nké, wo ye bo nseñ tabernakel; wo ye bo wô a besandé be ndombo é ne ntiñan a mvosane nsinga; besandé bete be kele mfa'a ya nké tañe menyi'i me mo ntet.

¹⁰ Beta mekône mab ma ye bo mewôm mebaé, bisuka'a bi mvote biap ke mewôm mebaé; akop ya mekôn a mimbôñ mi be'e de da ye boban a silba.

¹¹ Mfa'a ya akôé, besandé ba ye fe bo avale te nté menyi'i me mo ntet, a mekôn mewôm mebaé map, a bisuka'a bi mvote biab mewôm mebaé; akob ya mekôn a mimbôñ mi be'e de da ye boban a silba.

¹² Ndam ya nseñ, mfa'a jôbe da dim, ja ye bo besandé bindelé menyi'i me mo mewôm metan, a mekône mab awôm, a bisuka'a biab awôm.

¹³ Mfa'a jôbe da tôô, ndam ja ye bo menyi'i me mo mewôm metan;

¹⁴ afabe da menyi'i me mo metan, a mekône mab a bisuka'a biap.

¹⁵ Afabe baa menyi'i me mo awôm a metan a mekône menene mab mela a bisuka'a biab bilaa.

¹⁶ Mbé ya nseñ wo ye bi éyé ja dibe wô ô too menyi'i me mo awôm a metan, nduban blum, mfô a évele, mboon a nya ndomboo a too mvosane minsinga, ésaé ya mintyetyeñ betiñe biôm, a mekône menyin a bisuka'a biap.

¹⁷ Beta mekône mese ma bômane nseñ ma ye bi mimbôñ mi silba miap, akobe silba dap, a bisuka'a bi mvote biap.

¹⁸ Nté ya nseñ wo ye bo menyi'i me mo ntet; ndame jé li a li ase menyi'i me mo mewôm metan, a nté nkôñ ya yôbe wé menyi'i me mo mewôm metan, bindelé ya été bi too nya ndomboo, ntiñan a mvosane minsinga, bisuka'a ya été bi too mboon a mvot.

¹⁹ Biôm mebelane bise ya *tabernakel, mekône mé a ma mese ya nseñ ma ye boban a mvot.

Mfufube mbon

²⁰ Wo ye jô bôte ya Israél na be zu mbon ôwôndô a ne ntya'an; mbon ôte ô too nléane mvaé asu ébi bifufup: nalé belambe ba ye yôñ éyoñ ése.

²¹ Nda éndelé bisulan, atan ya éyé ya zañe *nda é ne ôsu ya éwolo élat, Aron ba be bone bé ba ye telé belambe be yôñ ataté mamengô'é a kui mametyé asu Nti. Jame di e ne mvinda ya nnôm éto mfa'a miaé mise ya bôte ya Israél.