NKÔLAN 23 - Kalate Zambe Nnomo a Mfefe Mfefé Nkôñelan

¹ Wo ye bo te miase foé é ne minsos. Wo ye bo te volô mbia be bôt nge bo ngaa wob a ne minsos.

² Wo ye bo te tôñ ôndula bôt mfa'a ya bo *abé, nalé fe teke ngam é ne ékotekot amu na bôt abui be ne ngame éte a tyame nyi'ane mejô ô ne zôsôôô.

³ Te vañe volô *nzôzoé môt éyoñ ya ntyi'ane mejô.

⁴ Eyoñ wo ye tôbane nnôme nyak nsiñe wôé, nge éjakase jé é jañeya fé, wo ye soo nye bie.

⁵ Nge wo yene éjakase môt a vini wo é nga ye wu a adite mbe'e, a *nlem wo bo wo minsitik ya volô je, te lôt, ve volô nsiñe wôé na éjakase éte é beta tebe *mvo'é a mebo mé.

⁶ Te tibi zôsôôô a yiane *nzôzoé éyoñ ya ntyi'ane ajô dé.

⁷ Wo ye tabe ntyel ya kobô bikotekote mejô. Wo ye bo te bo na nyô a ne te bijô a zôsôôa môt be wu; amu mbia môt a ye bo te yené zôsôôô e mise mam.

⁸ Wo ye bo te nyoñe éboteze; amu biboteze bia bo bôt ba yeme fas ndim a viti bifia bezôsôôô be bôt.

⁹ Wo ye bo te tibili ntabe; miabebien mia yem avale *ntabe a yen éyoñ ba tibili nye: amu mia fe mi mbe mintabe e Ejipte.

Metiñ ya mimbu mi ne ntelan étyi a mebôk

¹⁰ Wo ye saé éfuse si ése mimbu misaman a kôane bibuma ya été.

¹¹ Ve mbu zamgbwale wo ye ve je awo'on é tabe a ébien; minzôzoé ya bôte bôé mia ye di a betite ya fé fe ba ye di *mebuka'a. Nalé fe wo ye bo afube mindi'i mi woon dôé a di beôlivié.

¹² Wo ye bo ésaé jôé tañe môse misaman, e wu zamgbwale, wo ye semé *sabat, nalé ate nnôme nya'a wôé a éjakase jôé bia ye bi awo'on, nalé ate fe mona fame mbo ésaé minga wôé a *ntabe ba ye bo ne vebe.

¹³ Mia ye tabe ntyel mfa'a ya mam mese me maneya jô mia ma, a mia ye bo te kee minleme mienan na, mi simesane jôé azezambe afe; jame te e bo'o te kui anyu dôé.

¹⁴ Mbu ôse, biyoñ bilaa, wo ye jeme abôk amu ma.

¹⁵ Wo ye ba'ale abô'ô mimmaman mi belet mi ne te mvusan. Wo ye di mimmaman mi belet mi ne te mvusan éyoñ me nga tiñeti wo, e ngon ba loone Abib, tañe melu zamgbwa, avale me nga bendé wo, amu ngon éte nje ô nga kôlô je Ejipte; a môt a ye bo te tebe asu dam mo zesé.

¹⁶ Wo ye fe ba'ale abô'ô nkôane bidi, a di ya *bembômô ya ésaé jôé, *bembômô ya biôm ô nga bé e mefup; nalé fe abô'ô ya mvaane bidi amané mbu, éyoñ wo ye nyoñe ébuma ya ésaé jôé e mefup.

¹⁷ Biyoñ bilaa mbu, bôte bôé bese ba ye zu asu be Nti, e Zambe wônan.

¹⁸ Wo ye bo te ve mveane wom ba tyik fufulu a belet é ne mvusan nsamba wua, a avoñ ya éyem ba te tyik asu abô'ô dam ba ye bo te ba'ale de akui mametyé.

¹⁹ Wo ye zuu *bembômô ya bibuma bi ôsu bia taté wume si jôé e *nda Nyô a too nnôm éto. Wo ye bo te yame mon ékela e menyañ me nyia été

Ngaka'a ya nyiin e Kanaan

²⁰ Ma ma lôme Engele wom ôsu viôé na, a ba'ale wo e *zen a kui wo e vôm me nga kôm.

²¹ Tabe'e ntyel asu dé, wô'ô nye; te bo nye na a wô'ô ôlun, amu a ye bo te jamé *abé denan: Amu jôé dam e ne be nye.

²² Ve nge wo bo nye mewôk, a nge wo bo jam ese ma ye jô wo, ma ye bo nsiñ ya besiñe bôé, a ntebe yate ya ba be tele wo ngame yat.

²³ Engele wom a ye wulu ôsu viôé a kee wo e be Beamorééñ, Behétieñ, Beférézieñ, Bekananééñ, Behévieñ a Beyébuzieñ, a ma ye mane jiane be.

²⁴ Wo ye bo te vitibi si ôsu ya azezambe dap, a wo ye bo te saane be; wo ye bo te bo ane ba bo, ve wo ye sô'ôlô be si a bu'u mekône mab bitun.

²⁵ Mia ye bo Nti e Zambe wônan bisaé: a ye botane fembé jenan a mendime menan, a ma ye vaa ôkon ézezañe jôé.

²⁶ E si jôé, teke minga éziñ abum da ye vas, a teke minga a ye bo nkôkôm: ma ye fe bo na ô nyiñ ayap.

²⁷ Nkoon ya ko ma woñ wo ye kee wo ôsu; ma ye jañele fe'e ya *meyoñ mese me ne vôm wo ye ke, a ma ye bo na besiñe bôé bese be mate asu dôé.

²⁸ Ma ye lôme beta memvam ôsu viôé a mme ma ye titane wo Bekananééñ, Behévieñ a Behétieñ be ke wo ôyap.

²⁹ Ve ma ye bo te titane be be ke wo ôyab mbu wua, si é za li'i bilik a mbia betit ya afan be za fôé a wosane wo.

³⁰ Ve ma ye titane be ôte'etek be ke wo ôyab akekui wo ye bo ngule ya mane nyoñe si.

³¹ Ma ye telé nné wôé ataté évele mañ a kui mañ Befilisteñ, a ataté *nkôte si a kui ôsôé: amu ma ye ve bôte be too si éte e mo menan a wo ye titane be ôsu viôé.

³² Wo ye bo te bo élat a be nge a azezambe dap.

³³ Ba ye bo te tabe si jôé, be za bo wo na ô bo *abé a wosane ma: amu nge wo ye bo azezambe dabe bisaé, jame te da ye bo ôlam mfa'a wôé.