NKÔLAN 22 - Kalate Zambe Nnomo a Mfefe Mfefé Nkôñelan

¹ Nge ba bi ñwuwub ô tube mfin a wôé wô, awu dé te da ye bo te bijô e be môt éziñ,

² ve nge be nga wôé wô a koone na jôb e tôôya, bôt be nga wôé wô ba ye be'e mekua ya awu dé. Ñwuwup wo ye ya'ane tañ, ve nge ô nji bi jôm, ba ye kuane wô amu wube wé;

³ Nge jôm ô nga wup, nnôm nyak, éjakas nge mone ntômba é ngenan é vee, e mo mé, ma'ane mé ma ye bo biyoñ bibaé.

⁴ Nge môt a zametane mam afube éziñ été, nge ke afube mindi'i mi woon, nge lôme mbame biyeme wé ô ke di bidi éza afup, môt ate a ye ya'an a mbamba bibuma, bi ya nya afubu a bi ya afube mindi'i mi woon.

⁵ Nge nduan ja yôñ e sas biteñ, a mimbom mi nlisi nge nyô a ngenan nge afub ebien a bia mane dik, môt a nga bo'é nduan éte a ye ya'an éjian ya biôm bite.

⁶ Nge môt éziñ a ve nyô mbo'o moné nge biôm bife na a ba'ale nye bie, biôm bite ve wuban e *nda môt a ba'ale bie, nge ñwuwube te wo yené, wo ye ya'ane ma'an biyoñ bibaé.

⁷ Nge be nji yene ñwuwube te, môt a ne *nda biôm bia te wuban a ye subu asu Zambe a jô tyiñe yôb na: A nji same wo wé a nyoñ éza akum.

⁸ Nge jam éziñ ya mvô e fombô'ô nyak, éjakas, mone ntômba, ngômesan nge jôm éziñ é ne njañan, da ye yené na e ne bebela, ajô ya mengam mebaé mete da ye kui asu be Zambe; nyô Zambe a ye ve mekua a ye ya'an nyô mbok ma'an biyoñ bibaé.

⁹ Nge môt éziñ a ve nyô mbo'o été éjakas, nnôme nyak, mone ntômba nge éyem éfe, a éyeme te ja wu nge bu'i abo, nge nyoñebane bilanda môt teke yen,

¹⁰ bôte bete bebaé ba ye kalane jôé Nti: nyô a nga ba'ale éyem a ye jô tyiñe yôbe na: A nji same wo wé a nyoñ éza akum; mmiene éyem a ye kañese ngana éte a môt a te kane je a ye bo teke ya'ane tañ.

¹¹ Ve nge éyem é nga wuban e *nda jé été, a ye ya'ane mie éyeme tañ.

¹² Nge ñyôyo'o tit éziñ ya afan ñwô ô nga nyabe éyeme te mefus, môt a nga bili je été a ye soo mefuse ya été ane ngaa ya te bijô wôé, a a ye bo teke ya'ane tañ.

¹³ Nge môt a kôlé môt éyem, je ve bu'i abo nge wu mie éyeme e mo, môt a nga kôlé a ye ya'ane tañ.

¹⁴ Nge jame te da boban mie éyeme a too, môt a nga kôlé a ye bo te ya'ane tañeya éjian. Nge be nga yôé éyem a tañ, tañ éte ja yian.

Esemé mfa'a Zambe a môta binam

¹⁵ Nge fam éziñ ja won éndune ngon é ngenan teke *atiñ aluk a jô'ôbô je, a ye ya'ane nsuba éndune ngone te é nga yiane ya'ane na a ke aluk a lu'u fe je é bo e minga wé.

¹⁶ Nge ésaa ngon a bene ve nye ngo jé, a ye ya'ane moné tañe nsuba é ne ntyi'an asu bindun bengon.

¹⁷ Wo ye bo te nyii ngbwengbwele minga.

¹⁸ Ba ye wôé e môt ase a jô'ôbô a éyem.

¹⁹ Nyô a tyi'i bezambe befe biyem, vengevenge ve Nti étam, a ye fo'o wôéban.

²⁰ Wo ye bo te diane *ntabe nge tibili wô; amu mia fe mi mbe mintabe si ya Ejipte.

²¹ Mia ye bo te tibili nkus nge monenyui.

²² Amu nge wo tibili be a be ke be yône be ma, ma yem ane ma ye wô'ô miñyône miap.

²³ Ayo'o dam da ye yôñ, a ma ye wôé mia a nkpwaté mekôn; binga benan ba ye li'i minkus a bone benan ke bobenyui.

²⁴ Nge wo kôlé môte ya bôte bam moné, nge éngôngole môt mia je mi too, te bo nsé memvôla wé, a wo ye bo te sili nye tañ a nseñge.

²⁵ Nge wo nyoñ e môte mbok alô'ô éban, wo ye bulane nye de jôb é ngenan te dim;

²⁶ amu nje étam ja volô nye avep, nje étam ja buti ékôbe jé; nge nalé momo a ye bômbô vé? A nge a yône be ma, ma ye wô'ô nye amu ma me ne nyô a wô'ô nye mintaé.

²⁷ Wo ye bo te yo'é Zambe nge tote bifia meta bia wosane njô bôte ya ayoñe dôé.

²⁸ Wo ye bo te tyendé éyoñe wo yiane ve ma ngabe jôé ya woon, a mbon wo yiane ve ma. Wo ye ve ma ntôle ya bobefame bôé.

²⁹ Avale te fe wo ye bo mfa'a ya mimbame biyeme miôé, ataté mi mi ne anen a kui mi mi ne tyôtyoé. Ntôl ôse wo ye tabe e fefele nyia tañe melu zamgbwa; e môse muam, wo ye ve me wô.

³⁰ Mia ye bo bôt be ne étyi mfa'a wom. Mia ye bo te di mbilize tit ya mefup: mia ye wua wô bemvu.