NKÔLAN 21 - Kalate Zambe Nnomo a Mfefe Mfefé Nkôñelan

Metiñ ma fombô ajô alo

¹ Mintyi'an wo ye liti be e mie mi:

² Eyoñ wo ye kuse *ôlo ô too mone Hébre, a ye saé tañe mimbu misaman, ve mbu zamgbwale, a ye kôlô fili teke ya'ane jôm.

³ Nge a nga so étam, a ye fe kôlô étam. Nge a nga so a bili minga, ba nga ba ye kôlô bebaane.

⁴ Nge masa wé nye a nga lu'u nye minga a biaé nye bobefam a bobebinga, minga a bone bé ba ye bo biôm bi masa, a *ôlo ôbien wo ye kôlô étam.

⁵ Nge *ôlo wo yemete na: Ma nye'e masa wom, nalé fe e minga wom a bone bam, me nji kômbô kôlô,

⁶ éyoñe te masa wé a ye zuu nye bebé e be Zambe, a kele fe nye bebé évin nge akône *mbé, éyoñe te masa a ye tube nye alo a jôm é ne nsoñ, éyoñe te a ye saane masa wé ngum nté ényiñ.

⁷ Eyoñe fam ja ye kuane monaminga wé ane *ôlo, a ye bo te kôlô avale alo da kôlô.

⁸ Nge masa wé a nga kuse nye, a nji yene nye mvaé, masa ate a ye bo na a kôtéban avô; ve a nji bi ngul ya kuane nye e be bikuu, amu a nji wulu nye ane e ne zôsôôô.

⁹ Nge a lu'u nye e monafame wé, a ye belane nye ane metiñ ya nkeane bengon meluk ô né.

¹⁰ Nge a nyoñe minga mfe, a ye bo te sé'é nge bidi, nge ngômesan, nge mam mese ya ma yiane alu'u minga ôsu.

¹¹ Nge a nji bo nye e mam melale ma, minga ate a ne ngul ya kôlô teke ya'ane jôm, teke ve moné.

Metiñ ma fombô bibôm a meveñ

¹² Môt a bôm e môte mbok akekui a wu, ba ye fo'o wôé nye.

¹³ Nge a nji bôé nye ékolé ôba'a ôsu, ve Zambe émien nye a veya nye nye, ma ye telé wo vôm a ne nguleya ke sobô.

¹⁴ Ve nge môt a vañe wôé môte mbok ndimba, to'o a tele ata'a metuna'a dame yôp, wo ye vaa nye a wôé nye.

¹⁵ Môt a bibi ésaa nge nyia a ye wôéban.

¹⁶ Môt a wube môt a kuane nye nge ba'ale nye e mo mé, a ye wôéban.

¹⁷ Môt a yo'é ésaa nge nyia, a ye wôéban.

¹⁸ Eyoñ bôt bebaé ba wôman, nge wua ya été a lume nyô mbo'o akok nge bibi nye ékuta, ve nye teke wu, ve nalé a bo'o nye na a bômbô si,

¹⁹ nge a ne ngul ya beta kôlô si a wulu atan a *ntum, môt a nga bibi nye a ye kôlô teke étom, ve a ye tuni nye amu ntelan a nga telé nye ésaé. Nalé fe na a ye saé nye akekui a ntoo *mvo'é.

²⁰ Nge môt a bibi *ôlo vié a *ntum, to'o *ôlo te ô ne fam nge minga a be wu nye mo, a yiane tôban akuna'a.

²¹ Ve nge môse wua nge mibaé mia lôt *ôlo ôte teke wu, wo ye bo te kuneban amu ô ne e moné wé.

²² Nge befam ba luman, be jimbi mbubume minga, wô ve biaé teke mbia jam mfe, ba ye ya'ane aleman nnôme minga ate a ye yete be; ba ye ya'ane nye aval ane bekum ba ye jô.

²³ Ve nge jam e ne *abé da kui, éyoñe te ényiñ ja ye tañe ényiñ,

²⁴ nalé fe dis da ye tañe dis, asôñ da ye tañe asôñ, wo wo ye tañe wo, abo da ye tañe abo,

²⁵ ndi'an wo ye tañe ndi'an, aveñ da ye tañe aveñ a nlun wo ye tañe nlun.

²⁶ Nge môt a bibi e dis *ôlo vié, to'o ô ne fam nge minga, a dise te e tui, môt ate a ye suu *ôlo te ô ke fili, nalé a ne ma'ane ya dise dé.

²⁷ Nge a koé asôñe *ôlo ô ne fam nge minga, a ye suu wô fili, nalé a ne ma'an ya asôñe dé.

²⁸ Nge nnôme nyak a jii fam nge minga nlak wôna fam nge minga ate a wu, ba ye lume nnôme nya'a ate *mekok a ba ye di minsône mié a môt a ne nye a ye bo teke étom.

²⁹ Ve nge nnôme nya'a ate a tameya zu a lume bôte minlak, be kate fe môt a ne nye nalé, ve nye teke ba'ale nye, ba ye lume nye *mekok nge a wôé fam nge minga, ba ye wôé môt a ne nye.

³⁰ Nge môt a ne nye a ne ntindane ya ya'an aleman mfa'a ya kôté ényiñe jé a ye ve tañ ése é ne nye ntindane ya ve.

³¹ Nge nyak ja jimbi mona fam nge mona minga, avale bi yeneya mvus, nne fe ba ye wulu ajô te nalé.

³² Nge nyak ja jimbi *ôlo ô too fam nge minga, ba ye ya'ane môt a ne *ôlo te tañe besikel be silba mewôm mela, éyoñe te fe ba lume nnôme nyak ate *mekok.

³³ Nge môt éziñ a ye li'i mfa'an anjeñ ô yoo, nge na môt a ye fa'a anjeñ te buti de, wôna nnôme nyak nge éjakas bi kpwele été,

³⁴ miene anjeñ a ye ya'an miene éyem ja te ku anjeñ moné éjiane ya éyem, a émien a ye nyoñe mbim éyeme te.

³⁵ Nge nnôme nya'a môt éziñ a jii nnôm nya'a e môte mbok minlak a wôé nye, bôte bete ba ye kuane nnôme nyak a vee a kabane moné; avale te fe ba ye kabane nnôme nyak a ne ñwuan.

³⁶ Ve nge nnôme nyak a te wôé nyô mbok a tame zu a bo nalé, môt a ne nye te ba'ale nye, môt a ne nye a ye ya'an nnôme nyak a vee éjiane nyô a nga wu.

Metiñ ma nambe ndamane biôm

³⁷ Nge môt éziñ a wub nnôme nyak nge mone ntômba, nge a tyi'i nye *tyiñ nge kuane nye, nnôme nya'a wua a ye ya'ane betan a bone biyem benyin señe mone ntômba.